مەملەكەت باسشىسىنىڭ تاپسىرماسىن ورىنداۋ جانە ەلىمىزدىڭ كولىك-لوگيستيكالىق الەۋەتىن دامىتۋ تۇجىرىمداماسىن جۇزەگە اسىرۋ شەڭبەرىندە پاۆلودار وبلىسىندا اۋەجايدى جاڭعىرتۋعا كىرىسىپ جاتىر, دەپ حابارلايدى Egemen.kz.
جوبا جاساندى ۇشۋ-قونۋ جولاعىن, بۇرۋ-قوزعالۋ جولىن, پەرروندى رەكونسترۋكتسيالاۋ جۇمىستارىن قامتيدى.
جوبا ارناۋلى مەملەكەتتىك قور ەسەبىنەن قارجىلاندىرىلادى. ۇكىمەت بۇل ماقساتقا 9,3 ملرد تەڭگە ءبولدى.
جوبانى جۇزەگە اسىرۋ ۇشۋ سالماعى بويىنشا شەكتەۋسىز اۋە كەمەلەرىنىڭ زاماناۋي تۇرلەرىن قابىلداۋعا مۇمكىندىك بەرەدى. پاۆلوداردىڭ گەوگرافيالىق ورنالاسۋىن ەسكەرسەك, بۇل ءوڭىردىڭ ترانزيتتىك الەۋەتىن ارتتىرادى. ينفراقۇرىلىمدى جاڭارتۋ سونىمەن بىرگە, وبلىستىڭ كولىك قولجەتىمدىلىگىن جاقسارتۋعا, جولاۋشىلار اعىنىن ارتتىرۋعا جانە ىسكەرلىك بەلسەندىلىكتى دامىتۋعا ىقپال ەتەدى دەپ كۇتىلۋدە.
جوبانىڭ نەگىزگى ماقساتى – اۋەجاي پارامەترلەرىن حالىقارالىق ICAO ستاندارتتارىنىڭ تالاپتارىنا سايكەستەندىرۋ.
جوسپارلى جۇمىستىڭ نەگىزگى تۇرلەرىنە مىنالار جاتادى:
ۇشۋ-قونۋ جولاعىن 45 مەتردەن 60 مەترگە دەيىن رەكونسترۋكتسيالاۋ جانە كەڭەيتۋ; بۇرۋ-قوزعالۋ جولى مەن پەرروندى جاڭارتۋ; ەنەرگيامەن جابدىقتاۋ جۇيەسىن جاڭعىرتۋ; پەريمەترى بويىنشا جارىقپەن سيگنال بەرۋ جابدىقتارى مەن بەينەباقىلاۋ جۇيەسىن ورناتۋ.جوندەۋ جۇمىستارىن جۇرگىزۋ جانە ۇشۋ قاۋىپسىزدىگىن قامتاماسىز ەتۋ قاجەتتىلىگىنە بايلانىستى اۋەجاي قىزمەتى وتكەن جىلدىڭ ءساۋىر ايىنان بەرى ۋاقىتشا توقتاتىلعان. وسى ۋاقىتقا دەيىن اۋە ايلاعى استانا جانە الماتى باعىتتارى بويىنشا تۇراقتى رەيستەرگە قىزمەت كورسەتتى.