باتىس قازاقستان وبلىسىنىڭ اقجايىق اۋدانىندا جىل بويى قايىرىمدىلىعىمەن كوزگە تۇسكەن جاندار «جومارت جۇرەك – 2025» سىيلىعىمەن ماراپاتتالدى, دەپ جازادى Egemen.kz.
جەرلەستەرىن قۋانتىپ, جاقسىلىققا سەپ بولعان قايىرىمدى جاندارعا اقجايىق اۋدانىنىڭ اكىمى مۇرات سەردالين, اۋداندىق ءماسليحات توراعاسى سالىمگەرەي سيراجەۆ, اۋدان پروكۋرورى الماس تاسپيحوۆ, ەڭبەك ارداگەرلەرى باستاعان حالىق وكىلدەرى العىس ايتتى.
– قوعام تەك ەكونوميكالىق كورسەتكىش, دامىعان ينفراقۇرىلىممەن العا باسپايدى. قوعامدى العا جەتەلەيتىن – ادامدار اراسىنداعى ءوزارا قولداۋ, مەيىرىم مەن سەنىم. وسىنداي قۇندىلىقتاردى كۇندەلىكتى ومىردە ناقتى ىسپەن ناسيحاتتاپ جۇرگەن ازاماتتار – ەلدىگىمىزدىڭ شىنايى تىرەگى. بۇگىنگى ماراپات – ءبىر ادامنىڭ ەڭبەگىنە بەرىلگەن باعا عانا ەمەس, جاقسىلىقتى دارىپتەۋ, جاۋاپكەرشىلىكتى ارتتىرۋ جولىنداعى ماڭىزدى قادام. قايدا جۇرسە دە تۋعان اۋىلىنىڭ وركەندەۋىنە ۇلەس قوسقان ازاماتتار جاساي بەرسىن! – دەدى اۋدان باسشىسى مۇرات امانگەلدى ۇلى.
بيىل اقجايىق اۋدانىندا جەرلەستەردىڭ, مەكتەپ تۇلەكتەرىنىڭ مۇرىندىق بولۋىمەن 70 ملن تەڭگە جينالىپ, ءتۇرلى دەڭگەيدەگى 19 جوبا جۇزەگە اسقان ەكەن. بۇل كوزگە كورىنەتىن, اۋىز تولتىرىپ ايتاتىن ءىرى ىستەر عانا.
جاقسىنىڭ جاقسىلىعىن ايت, نۇرى تاسىسىن دەگەندەي, ولاردىڭ كەيبىرىن ايتا كەتەيىك: كونەككەتكەن اۋىلدىق وكرۋگىنىڭ قامىستىكول اۋىلىنداعى شاعىن مەكتەپتى 1995 جىلى تامامداعان تۇلەكتەر وزدەرى ءبىلىم العان مەكتەپ كىتاپحاناسىنا 80 دانا جاڭا كىتاپ سىيلاعان. بۇعان قوسا سىنىپتاستار اۋىل كوشەلەرىنە جارىق شامدارىن ورناتىپ, جارقىراتىپ قويىپتى. ال وكرۋگ ورتالىعىنىڭ 2005 جىلعى تۇلەكتەرى وزدەرىنىڭ التىن ۇياسى وراز يساەۆ اتىنداعى مەكتەپتىڭ اكت زالىن تولىقتاي جاڭارتىپ بەرگەن. كورشى اۋىل ەسەنسايدا وسىدان 10 جىل مەكتەپ بىتىرگەن ۇل-قىزدار مۇقتاج جانعا جاڭا باسپانا ساتىپ الىپ بەرگەن. جامبىل اۋىلىندا 1983 جىلعى تۇلەكتەر اۋىل ىشىندە مەملەكەتتىك رامىزدەر الاڭىن جاساقتاپ, پاتريوت جاستاردىڭ باس قوساتىن ءمۇيىس پايدا بولىپتى. اۋدان ورتالىعىنىڭ 2000 جىلعى تۇلەكتەرى «اۋىلىم – التىن بەسىگىم» جارىق ديودتى كومپوزيتسياسىن ورناتسا, شاعىن عانا جاڭاجول اۋىلىنىڭ 2004-2005 جىلعى تۇلەكتەرى دە وسىنداي ارحيتەكتۋرالىق نىسان سالىپ, اۋىلعا كىرەبەرىس جولعا ەڭسەلى قاقپا ورناتقان. بازارتوبەنى اۋىلىنىڭ 2005 جىلعى تۇلەكتەرى مەن 1988 جىلى تۋعان اۋىل ازاماتتارى تۋعان جەردىڭ اتاۋىن ادەمى ەسكەرتكىش بەلگىگە اينالدىرسا, 2005 جىلعى تۇلەكتەر المالى اۋىلىنىڭ كىرە بەرىس جولىن سامالاداي جارقىراتىپ بەرگەن. قابىرشاقتى, ءىلبىشىن اۋىلدارىنا كىرە بەرىستەگى ءساندى اركا, اقسۋاتتاعى جازعى ساحنا, المالى مەكتەبىندەگى سۋبۇرقاق, بۋدارين اۋىلىنداعى «جاستار» ويىن الاڭى دا وسىنداي ۇيىمشىلدىق ناتيجەسىندە پايدا بولعان. بازارشولاندىق ءبىر توپ ازامات 15 ملن تەڭگەدەي قارجى جيناپ, اۋىلعا سپورت كەشەنىن سالىپ بەرسە, تايپاقتا اۋىل تۇرعىندارى مەن بەلدى كاسىپكەرلەر بىرلەسىپ, جالپى قۇنى 24 ملن تەڭگەدەن اساتىن جازعى سپورت الاڭى مەن فۋتبول الاڭىن ەل يگىلىگىنە سىيعا تارتقان.
ارينە, بۇل اقجايىقتاعى اتىمتاي جومارتتار اتقارعان ىستەردىڭ تولىق ءتىزىمى ەمەس. ەڭ باستىسى, جەرلەستەرىنە جۇرەك جىلۋىن سىيلاعان جاندار ەلدىڭ ىقىلاسىنا بولەندى.
باتىس قازاقستان وبلىسى