ارال ءوڭىرىن قالپىنا كەلتىرۋگە باعىتتالعان بىرەگەي ESG-جوباسى ءۇشىن الماتى مەنەدجمەنت ۋنيۆەرسيتەتىنىڭ عالىمدارى «Trophées des Entreprises 2025» حالىقارالىق سىيلىعىنا يە بولدى.
«Syr qorǵany – sekseýil» جوباسى – ارال وڭىرىندەگى سەكسەۋىل ەكوجۇيەسىن قالپىنا كەلتىرۋگە جانە ورتالىق ازياداعى شولەيتتەنۋگە قارسى كۇرەسكە باعىتتالعان ەرىكتىلەر باستاماسى.
بىلتىر ناۋرىز ايىندا Almaty Management University ەرىكتىلەرى قۇرعاپ قالعان ارال تەڭىزىنىڭ تابانىنا 5 100 سەكسەۋىل كوشەتىن وتىرعىزدى. بۇل ەل تاريحىندا ستۋدەنتتەردىڭ, كاسىپكەرلەردىڭ جانە حالىقارالىق ەرىكتىلەردىڭ جاپپاي قاتىسۋىمەن جۇزەگە اسقان العاشقى جوبا بولدى. بۇعان دەيىن بۇل جۇمىستار ونداعان جىل بويى تەك مەملەكەتتىك ورمان شارۋاشىلىقتارى تاراپىنان اتقارىلىپ كەلدى.
بيىل «AlmaU» ستۋدەنتتەرى ارالدى قۇتقارۋ حالىقارالىق قورى مەن «Freedom Bank» ۇيىمداستىرعان حالىقارالىق ەكولوگيالىق اكتسياعا قاتىسىپ, 60 گەكتار اۋماقتاعى 18 000 سەكسەۋىل كوشەتىنىڭ 8 000-ىن وتىرعىزدى. وسىلايشا, جوبانىڭ ەكى جىلدىق كەزەڭىندە بارلىعى 13 100 سەكسەۋىل كوشەتى ەگىلدى. باستاماعا ورتالىق ازيا ەلدەرى مەن ەۋروپا جانە امەريكا قۇراما شتاتتارىنان 160-تان استام قاتىسۋشى تارتىلدى. ءسويتىپ, Almaty Management University ارال ءوڭىرىن قالپىنا كەلتىرۋگە قوعامدىق جانە كورپوراتيۆتىك قاتىسۋدىڭ جاڭا جولىن اشتى.
قازىر «Syr qorǵany – sekseýil» جوباسى سەكسەۋىل ورمانىن قالپىنا كەلتىرۋگە باعىتتالعان تۇراقتى قوعامدىق-كورپوراتيۆتىك قوزعالىسقا اينالدى. جوبانىڭ بىرەگەيلىگى ۋنيۆەرسيتەتتىڭ «living lab» مودەلىن قولدانىپ, ول دالالىق ەكولوگيالىق جۇمىستى, عىلىمي ءتاسىلدى, ءبىلىم بەرۋ مودۋلدەرىن جانە ەرىكتىلەردى بىرىكتىردى. سەكسەۋىلدى تابيعي توسقاۋىل رەتىندە پايدالانۋ شولەيتتەنۋگە قارسى كۇرەس جونىندەگى بۇۇ كونۆەنتسياسىنىڭ ۇسىنىمىنا سايكەس كەلەدى جانە كليماتتىق بەيىمدەلۋ مەن ارال وڭىرىندەگى شاڭدى داۋىلدى ازايتۋ جونىندەگى جاھاندىق كۇن تارتىبىنە ۇلەس قوسادى.
«AlmaU» ەكولوگيالىق كوشباسشىلارىنىڭ جاڭا بۋىنىن قالىپتاستىرا وتىرىپ, ورتالىق ازيا ۋنيۆەرسيتەتتەرىنىڭ جاھاندىق ماڭىزى بار ەكولوگيالىق داعدارىستاردى شەشۋىنە اتسالىسپاقشى.
الماتى