الداعى 2026 جىلدان باستاپ الماتىدا الەۋمەتتىك ماڭىزعا يە تاعى دا 11 ءتۇرلى كەسەلدى انىقتاۋ, باقىلاۋ مەن ەمدەۋ جاعى ساقتاندىرىلعان, ساقتاندىرىلماعانىنا قاراماستان تەگىن بولادى, دەپ جازادى Egemen.kz.
وسى ورايدا مەگاپوليستەگى وڭىرلىك كوممۋنيكاتسيالار قىزمەتىندە الماتى قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءلايلا يمانعاليەۆا الەۋمەتتىك ماڭىزى بار اۋرۋلاردىڭ تىزىمىنە تۋبەركۋلەز, ايتۆ, قاتەرلى ىسىكتەر, سوزىلمالى ۆيرۋستى گەپاتيتتەر مەن باۋىر تسيرروزى, پسيحيكالىق جانە مىنەز-ق ۇلىقتاعى اۋىتقۋلار, ورفاندىق اۋرۋلار, ەپيلەپسيا, ينسۋلت پەن جەدەل ميوكارد ينفاركتى, سونداي-اق جۇيكە جۇيەسىنە قاتىستى ءبىراز اۋرۋدىڭ ءتۇرى كىرەتىنىن اتادى.
«ماڭىزدى وزگەرىستىڭ ءبىرى – الەۋمەتتىك ماڭىزعا يە دەرتكە شالدىققان جاعدايدا ناۋقاستىڭ ساقتاندىرىلماعاندىعىنا قاراماستان, قاجەتتى دياگنوستيكالىق تەكسەرۋلەر تاعايىندالادى. بۇعان دەيىن مۇنداي مۇمكىندىك تۋبەركۋلەز نەمەسە ايتۆ-ينفەكتسياسىن جۇقتىردى دەگەن كۇدىك تۋىنداعان جاعدايدا عانا قاراستىرىلاتىن», دەيدى ءلايلا يمانعاليەۆا.
ول 2025 جىلعى قىركۇيەكتەن باستاپ الماتىنىڭ بارلىق تۇرعىنى ونكولوگيالىق اۋرۋلاردى ەرتە انىقتاۋ ماقساتىندا سكرينينگتىك تەكسەرۋلەردەن تەگىن وتەتىنىن دە ەسكە سالدى. بۇرىن مۇنداي مۇمكىندىككە ساقتاندىرىلعان ازاماتتاردىڭ عانا قولى جەتەتىن.
سونىمەن قاتار 2026 جىلدان باستاپ ءمامس پاكەتى دە كەڭەيتىلەدى. وعان ديسپانسەرلىك ەسەپتە تۇرعان سوزىلمالى اۋرۋلارى بار ناۋقاستار, ونىڭ ىشىندە قانت ديابەتى, ارتەريالىق گيپەرتەنزيا, جۇرەكتىڭ يشەميالىق اۋرۋى, بۇيرەك, تىنىس الۋ اعزالارى, تىرەك-قيمىل جۇيەسى اۋرۋلارى مەن باسقا دا دەرتپەن اۋىراتىن ازاماتتار ەنگىزىلەدى.
«بۇل پاتسيەنتتەرگە تەگىن ءدارى-دارمەك الۋعا, امبۋلاتوريالىق, ستاتسيونارلىق جاعدايدا ەمنىڭ بارلىق قاجەتتى ءتۇرىن, ونىڭ ىشىندە قىمبات پرەپاراتتار الۋىنا مۇمكىندىك بەرەدى», دەيدى مامان.