بىشكەكتە اۋىر اتلەتيكادان قىرعىز ەلىنىڭ ماقتانىشى, ماسكەۋ وليمپياداسىنىڭ جەڭىمپازى, الەمنىڭ ءتورت دۇركىن چەمپيونى قانىبەك وسموناليەۆتىڭ جۇلدەسى ءۇشىن حالىقارالىق تۋرنير ءوز مارەسىنە جەتتى, دەپ جازادى Egemen.kz.
اتالعان جارىستا قازاقستاننىڭ زىلتەمىرشىلەرى تابىستى ونەر كورسەتتى. اتاپ ايتساق, سايرامكەز اقمولدا (65 كگ), ايانات جۇماعالي (77 كگ), ءسانيا ورمانباەۆا (86 كگ) جانە اقەركە بايماناپ (+86 كگ) التىن السا, مارتا داۆلەتياروۆا (86 كگ) كۇمىس مەدالدى يەلەندى. بۇل سپورتشىلاردىڭ بارلىعى دا مايتالمان مامانداردىڭ نازارىندا جۇرگەندەر. سول سەبەپتى ولاردىڭ بۇل تابىسى جانكۇيەرلەردى تاڭداندىرعان جوق. جالپى ەسەپتە جەرلەستەرىمىز جارىس قوجايىندارىنان كەيىنگى ەكىنشى ورىندى يەلەندى.