ۇكىمەت قىزمەتىنىڭ 2025 جىلداعى قورىتىندىسىن شىعارۋ شەڭبەرىندە پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ سالانى دامىتۋعا قاتىستى ءباسپاسوز ءماسليحاتىن وتكىزدى. بۇگىندە ەلىمىز جاساندى ينتەللەكتىنى اۋقىمدى ەنگىزۋ جانە تسيفرلىق ەكونوميكانىڭ نەگىزگى كورسەتكىشتەرىنىڭ تۇراقتى ءوسۋىن قامتاماسىز ەتۋ ارقىلى جەتەكشى تسيفرلىق دەرجاۆا مارتەبەسىن نىعايتىپ كەلەدى, دەپ جازادى Egemen.kz.
جاسلان ماديەۆ جىل قورىتىندىسى بويىنشا ەلىمىز حالىقارالىق رەيتينگتەردەگى پوزيتسياسىن نىعايتقانىن, جي دامۋىنىڭ ينستيتۋتسيونالدىق نەگىزىن قالىپتاستىرعانىن, alem.cloud ۇلتتىق سۋپەركومپيۋتەرلىك كلاستەرىن ىسكە قوسقانىن جانە مەملەكەتتىك قىزمەتتەرگە, ەكونوميكاعا جانە الەۋمەتتىك سالاعا تسيفرلىق جانە جي شەشىمدەرىن اۋقىمدى ەنگىزۋدى قامتاماسىز ەتكەنىن اتاپ ءوتتى.
حالىقارالىق باعالاۋلارعا سايكەس, بۇگىنگى تاڭدا قازاقستان ەلەكتروندىق ۇكىمەتتىڭ دامۋ يندەكسىندە (EGDI) 24-ءشى ورىندا جانە ونلاين-قىزمەتتەر يندەكسى (OSI) بويىنشا الەمنىڭ توپ-10 ەلىنە كىرەدى. سونىمەن قاتار alem.cloud ۇلتتىق سۋپەركومپيۋتەرلىك كلاستەرى الەمدەگى ەڭ ءىرى سۋپەركومپيۋتەرلەردىڭ TOP-500 رەيتينگىنە ەنىپ, 86-شى ورىنعا يە بولدى. وسىلايشا, قازاقستان ەسەپتەۋ قۋاتى بويىنشا ءوڭىر كوشباسشىلارىنىڭ ءبىرى رەتىندەگى مارتەبەسىن راستادى.
«بۇل ۇستانىمدار تسيفرلىق جەتىلۋ دەڭگەيىن عانا ەمەس, سونىمەن قاتار مەملەكەتتىڭ باسقارۋ تاجىريبەسىنە جاساندى ينتەللەكتىنى اۋقىمدى تۇردە ەنگىزە الۋ قابىلەتىن دە كورسەتەدى», دەدى جاسلان ماديەۆ.