ۇلتتىق اسكەري-پاتريوتتىق ورتالىقتا «باس رەداكتورلار كلۋبى» قوعامدىق بىرلەستىگى مەن قازاقستان رەسپۋبليكاسىنىڭ قورعانىس مينيسترلىگى اراسىندا ىنتىماقتاستىق تۋرالى مەموراندۋمعا قول قويۋ ءراسىمى ءوتتى. قۇجات مەديا قاۋىمداستىق پەن مەملەكەتتىك سەكتور اراسىنداعى ورنىقتى سەرىكتەستىكتى قالىپتاستىرۋعا, سونداي-اق اسكەري تاقىرىپتى كاسىبي ءارى جاۋاپتى تۇردە جاريالاۋدى دامىتۋعا باعىتتالعان.
مەموراندۋمعا باس رەداكتورلار كلۋبىنىڭ پرەزيدەنتى, قازاقستان رەسپۋبليكاسى پارلامەنتى سەناتىنىڭ دەپۋتاتى بيبىگۇل جەكسەنباي جانە قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى, ۆيتسە-ادميرال سەرىك بورامباەۆ قول قويدى.
باق سالاسىنداعى ارىپتەستەرىمىز اسكەري ازاماتتارمەن پىكىر الماسىپ, ءتۇرلى سۇراقتارىنا جاۋاپ العان ماڭىزى زور باسقوسۋدا اقپاراتتىق جۇمىستى كۇشەيتۋ تەتىكتەرى دە تالقىلاندى. ويتكەنى قازاق ارمياسىنىڭ بەدەلىن بيىكتەتۋ, وڭ ءيميدجىن قالىپتاستىرۋ – ءاربىر ازاماتتىڭ پارىزى. قازىر قوعامعا اسكەرىمىزدىڭ الەۋەتىن پاش ەتەتىن اقپاراتتىق ءىس-شارالار دا كەڭ اۋقىمدا اتقارىلىپ جاتىر ەكەن. ءجيى ۇيىمداستىرىلاتىن ءباسپاسوز تۋرلارى, گارنيزونداردىڭ جاي-كۇيىمەن تانىستىرۋ, جاۋىنگەرلەردىڭ تۇرمىستىق جاعدايى مەن اسحاناسىنداعى مازىرگە دەيىن ەل نازارىنا ۇسىنىلىپ ءجۇر. بۇل ارينە دۇرىس.
رەسپۋبليكالىق ارنالاردان بالالارعا ارنالعان انيماتسيالىق فيلمدەر, ەرەسەكتەرىمىز كورەتىن سەريالدار مەن اسكەري باعدارلامالارعا باسىمدىق بەرىلمەك. جاڭالىقتاردان ءبىر-بىرىنەن اۋمايتىن سيۋجەتتەر دە, گازەت بەتتەرىنەن ءباسپاسوز تۋرلارى جايىنداعى جازبالاردى دا ءجيى كوزىمىز شالادى.
قازىر وقۋلىق شىعارۋمەن, بالالارعا ارنالعان كوركەم ادەبيەت باسۋمەن اينالىساتىن «اRMAN-PV» باسپاسىندا جۇمىس ىستەپ جۇرگەندىكتەن اسكەري سالانى كىشكەنتاي بالالار ساناسىنا ءسىڭىرۋ باعىتى دا قولعا الىنسا جاقسى بولار ەدى. وتان قورعاپ جۇرگەن جاۋىنگەرلەر تۋرالى شاعىن كىتاپتار, كىشكەنتاي وقىرماندارىمىزعا تۇسىنىكتى كوميكستەر, تانىمدىق ادەبيەت باسىلسا دەگەن تىلەك بار. ماسەلەن وقۋشى كۇنىمدە توقتار اۋباكىروۆتىڭ بالا كەزى, ۇشقىش بولۋعا تالپىنعان ءجاسوسپىرىم كەزەڭىن باياندايتىن شاعىن كىتاپتى وقىپ شىققاندا كەرەمەت اسەر ەتىپ ەدى. سول كىتاپشا مەنىڭ عانا ەمەس كوپتەگەن زامانداسىمنىڭ وسكەندە كىم بولامىن دەگەن باعىتىن ايقىنداپ بەرگەنى انىق. عارىشكەر, ۇشقىش, اسكەري ازامات بولسام دەگەن ماقسات قويعان بالالار سانى ارتقانى اقيقات. قازىر سەريال, باعدارلاما تۇسىرۋگە قارجى بولۋگە بەل بۋىپ وتىرعان قورعانىس مينيسترلىگى وسىنداي باعىتتاعى كىتاپتار شىعارسا تاماشا بولماق. كىتاپ وقيتىن ۇلتقا اينالۋدى ماقسات ەتىپ وتىرعان كەزەڭدە تەلەۆيزيالىق جوبالارعا عانا ەمەس كىتاپقا دا كوڭىل بولىنسە دەگەن ۇسىنىس بىلدىرگىم كەلەدى. باستاۋىش پەن جوعارى سىنىپ وقۋشىلارى بالا كۇنىنەن ءوزىمىزدىڭ اسكەرىمىزگە دەگەن وڭ كوزقاراسى قالىپتاسىپ ءوسۋى وتە ماڭىزدى.
سونداي-اق, بىزدە بۇگىنگى زاماننىڭ ارمياسى جايلى كوركەم ادەبيەت مۇلدەم جوق دەسەك بولادى. وزدەرىڭىزگە ءمالىم «زاڭ-مەديا» جشس دەتەكتيۆ جانرىن جانداندىرۋ ماقساتىندا كەمەل توقاەۆ اتىنداعى ادەبي بايقاۋدى بيىل سەگىزىنشى رەت ۇيىمداستىردى. وسىلايشا دەتەكتيۆ باعىتىندا بىرقاتار كىتاپ جارىققا شىعىپ, شىم-شىتىرىق وقيعالار تۋرالى جازاتىن قالامگەرلەر شوعىرى قالىپتاستى. ال بىزدە اسكەري تاقىرىپتاعى كوركەم شىعارما نەلىكتەن دامىمايدى؟ وسى ولقىلىقتىڭ دا ورنى تولسا دەگەن ۇسىنىس بار.
«ايقىن» گازەتىنىڭ باس رەداكتورى امانگەلدى قۇرمەتتىڭ اڭگىمەسىن تىڭداساڭىز, اسكەري تاقىرىپقا قىزىعۋشىلىق ارتادى. ول كىسىنىڭ بىلمەيتىنى جوق. قورعانىس سالاسىن ساۋاتتى, جان-جاقتى جازا بىلەتىن مامانداردىڭ ماتەريالى كوپ بولسا ۇتىلماس ەدىك. نەگە دەسەڭىز گازەت وقىعاندا اسكەري تاقىرىپتاعى جالاڭ اقپارات قانا الدىمىزدان شىعادى. سول سەبەپتى اسكەري ساراپشىلار پۋلىن قۇرىپ, تانىمدىق, ساراپتامالىق باعىتتاعى ماقالالاردىڭ سانى ارتسا جاقسى بولار ەدى. ويتكەنى قازىر جاۋىنگەرلەرىمىزدىڭ گارنيزوندارى جىلى, تاماقتارى توق ەكەنىنە جاڭالىقتار ارقىلى ابدەن كوزىمىز جەتتى.
بۇل ۇسىنىستارىمىزعا ەلىمىزدىڭ قورعانىس ءمينيسترى داۋرەن جۇماتاي ۇلى, ءمينيستردىڭ تاربيە جانە يدەولوگيالىق جۇمىستار جونىندەگى ورىنباسارى سەرىك جاقسىعالي ۇلى وڭ كوزقاراس تانىتادى دەگەن ءۇمىت بار.
ەڭ باستىسى – ءوزارا مەموراندۋمنىڭ بەرەرى كوپ, قازاقستان اسكەرىنىڭ ابىرويى اسقاق بولسىن دەپ تىلەيمىز.
ميراس مۇقاش,
«اRMAN-PV» باسپاسى
باس ديرەكتورىنىڭ كەڭەسشىسى,
باس رەداكتورلار
كلۋبىنىڭ مۇشەسى