10 جەلتوقسان كۇنى ۇلكەن ەكرانعا شىققان «رۋىڭ كىم» ءفيلمى ەندى كينوتەاترلاردان كورسەتىلمەيدى. كۇنى كەشە ءماجىلىس دەپۋتاتى ەرلان سايروۆ سىنعا العان فيلم پروكاتتان الىنىپ تاستالدى. بۇل تۋرالى ءفيلمدى تۇسىرگەن Tiger Films پروديۋسسەرلىك ورتالىعى الەۋمەتتىك جەلىدەگى پاراقشاسىندا مالىمدەدى, دەپ جازادى Egemen.kz.
فيلم پروكاتقا شىققان ۋاقىت ارالىعىندا 208 ميلليون تەڭگە كاسسا جيناعان. Tiger Films پروديۋسسەرلىك ورتالىعى ءفيلمدى تالقىلاۋ بارىسىندا قوعامدىق شيەلەنىستىڭ الدىن الۋ ۇشىن كينوتەاترلاردىڭ رەپەرتۋارىنان الىپ تاستاۋ تۋرالى شەشىم قابىلداعان.
ء«بىز ءفيلمدى ەڭ ىزگى, وڭ نيەتپەن تۇسىردىك. باستى ماقساتىمىز – قازاقستان حالقىن بىرلىك پەن تاتۋلىققا ۇندەۋ. ساتيرا مەن يۋمور ءتىلى ارقىلى رۋلارعا ءبولىنۋ, ءبىر رۋدى ەكىنشىسىنەن جوعارى قويۋعا ۇمتىلۋ قاتە تۇسىنىك ەكەنىن كورسەتكىمىز كەلدى. ءبىزدىڭ تاراپىمىزدان زاڭبۇزۋشىلىق بولعان جوق. الايدا فيلمگە قاتىستى ەكىۇشتى پىكىرلەر تۋىنداپ, ونى تالقىلاۋ بارىسىندا قوعامدىق شيەلەنىستىڭ بولماۋى ءۇشىن, ءبىز ءفيلمدى قازاقستانداعى بارلىق كينوتەاترلاردىڭ رەپەرتۋارىنان ءوز ەركىمىزبەن الىپ تاستاۋ تۋرالى شەشىم قابىلدادىق», دەلىنگەن پروديۋسسەرلىك ورتالىقتىڭ مالىمدەمەسىندە.
ايتا كەتەيىك, ءماجىلىس دەپۋتاتى ە.سايروۆ ۇكىمەت باسشىسى ولجاس بەكتەنوۆكە جولداعان ساۋالىندا «رۋىڭ كىم» فيلمىنىڭ قاجەتسىز تاقىرىپتى ارقاۋ ەتكەنىنە نازار اۋدارعان بولاتىن.
«قازاقتىڭ رۋلارىن سالىستىراتىن, كەمسىتەتىن فيلمدەردىڭ ماقساتى قانداي؟ تىپتى بۇل ءفيلمدى جارنامالاۋ ءۇشىن جاسالعان ارنايى ەكسپوزيتسيادا رۋعا ءبولىنۋدى قويىپ, قازاقستاننىڭ كارتاسىن ءۇش جۇزگە ءبولىپ قويعانىن كوردىك. بۇل نە دەگەن باسسىزدىق؟ ول ۇلت ءۇشىن ەڭ سەزىمتال تاقىرىپتى ايقايلاتىپ الەۋمەتتىك كونتەنت, كينو تاقىرىبىنا اينالدىرىپ, كورەرمەن جيناۋ. ءتۇبى بۇل جاقسىلىققا اكەلمەيدى», دەگەن ەدى دەپۋتات.
ماجىلىسمەن جاسوسپىرىمدەر ءۇشىن كينو جانە مەدياكونتەنتتىڭ تاربيەلىك ىقپالى جوعارى ەكەنىن ەسكەرىپ, وسىعان قاتىستى ءبىرشاما ۇسىنىسىن ورتاعا سالعان ەدى.