2026 جىلعا ارنالعان بولجام بويىنشا الماتى, استانا جانە اتىراۋ وبلىسى رەسپۋبليكالىق بيۋدجەتكە ءوز ۇلەسىن قوسىپ قانا قويماي, قالعان وڭىرلەرگە دە قارجىلاي كومەك كورسەتەدى. ال قالعان ايماقتار سۋبۆەنتسياعا تاۋەلدى, دەپ حابارلايدى Egemen.kz.
Energy Analytics ارناسىنىڭ مالىمەتىنشە, اسىرەسە تۇركىستان وبلىسى بيۋدجەتكە ەڭ كوپ تاۋەلدى ءوڭىر رەتىندە ەرەكشەلەنەدى. ونىڭ قاجەتتىلىكتەرى ءۇش ءوڭىردىڭ جالپى ۇلەسىن قۇرايتىن قاراجاتتان اسىپ تۇسەدى.
بيۋدجەتكە نەلىكتەن تەك ءۇش ءوڭىر عانا ۇلەس قوسادى؟اتىراۋ وبلىسى – مۇنايلى ايماق. مۇندا ءىرى كەن ورىندارى مەن ولارعا قىزمەت كورسەتەتىن سەرۆيستىك سەكتور بار.
استانا – ەلدىڭ اكىمشىلىك جانە ەكونوميكالىق ورتالىعى. مۇندا ۇلتتىق كومپانيالار مەن ءىرى مۇناي-گاز كومپانيالارىنىڭ باس كەڭسەلەرى تىركەلگەن, ياعني نەگىزگى تابىس باتىستا جاسالسا دا, سالىق ءتۇسىمى ەلوردادا قالادى.
الماتى – قارجى سەكتورىنىڭ ورتالىعى: بانكتەر, ساقتاندىرۋ كومپانيالارى, قور نارىعى جانە قوسالقى قىزمەتتەر.
Jai Sandar ارناسىنىڭ مالىمەتىنشە, ۇلتتىق بانكتىڭ ەلورداعا كوشىرىلۋىنە قاراماستان, الماتى «قارجىلىق استانا» مارتەبەسىن ساقتاپ وتىر. ايتا كەتەيىك, بۇعان دەيىن ماڭعىستاۋ, باتىس قازاقستان جانە اقتوبە وبلىستارى بيۋدجەتكە ايتارلىقتاي ۇلەس قوسىپ كەلگەن.
ساراپشىلاردىڭ بولجامىنشا, الداعى جىلدارى تىزىمگە پاۆلودار وبلىسى مەن ماڭعىستاۋ قوسىلۋى مۇمكىن. بىراق ايماقتار سانىنىڭ ازايۋى, ولاردىڭ تابىسىنان شىعىنىنىڭ كوپ بولۋى ماسەلەگە اينالىپ بارادى. تۇتاستاي العاندا ەلدىڭ جالپى ەكونوميكاسى ءوز مۇمكىندىگىنە ساي دامىماي, بەلگىلى ءبىر وڭىرلەر مەن سالالارعا تاۋەلدى بولىپ وتىر.
Energy Analytics جازۋىنشا, ەگەر بيۋدجەت جانە وڭىرلىك ساياسات قايتا قارالماسا, قازاقستان رەنتالىق ەكونوميكا مودەلىندە قالا بەرەدى. ياعني, شەكتەۋلى وڭىرلەر مەن سالالار قالعان ايماقتاردى قارجىلاندىرۋعا ءماجبۇر بولادى. بۇل جەرگىلىكتى سالىق بازاسىن كەڭەيتۋ مەن وڭىرلىك ەكونوميكانى دامىتۋعا جول بەرمەيدى.