سوڭعى جىلدارى ەلىمىزدە كەي ينفەكتسيالىق اۋرۋلارمەن سىرقاتتانۋشىلار سانى ارتقان. ۇلتتىق ستاتيستيكا بيۋروسىنىڭ 2019 جانە 2024 جىلدار ارالىعىندا 100 مىڭ تۇرعىنعا شاققانداعى جۇرگىزگەن ەسەبىنشە, كوكجوتەل جۇقتىرعاندار – 19 ەسە, سكارلاتينا اۋرۋى – 5,4 ەسە, ۆيرۋستىق گەپاتيت – 3,1 ەسە, قىزىلشا – 2 ەسە كوبەيگەن, دەپ جازادى Egemen.kz.
مامانداردىڭ ايتۋىنشا, ينفەكتسيالىق اۋرۋعا شالدىعاتىنداردىڭ باسىم بولىگى ءتيىستى ەكپەنى سالدىرماعاندار ەكەن.
سونىمەن قاتار ەلىمىزدە بالاسىنا ەكپە سالدىرۋعا قارسى اتا-انالار جىل وتكەن سايىن كوبەيىپ كەلەدى. ماسەلەن, 2007 جىلى 5300 اتا-انا بالاسىنا ەكپە سالدىرۋدان باس تارتسا, وتكەن جىلى ولاردىڭ سانى 20 700-گە جەتكەن. ال بيىلدىڭ وزىندە 20 000 اتا-انا ەكپەدەن باس تارتۋ تۋرالى ءوتىنىشتى تولتىرعان.
حالىقارالىق يۋنيسەف ۇيىمىنىڭ زەرتتەۋ دەرەگىنە ساي ەلىمىزدەگى اتا-انالاردىڭ 60%-ى مۇنداي شەشىمدى ناقتى كەلەڭسىز جاعدايلاردان كەيىن قابىلداعان.
ال ەرەسەكتەردىڭ 12%-ى ءدىني سەبەپتەرگە بايلانىستى ەكپە الماعان بولسا, تاعى 12%-ى ەكپەگە سەنىمسىزدىك تانىتقان. رەسپوندەنتتەردىڭ 6%-ى ەكپەدەن باس تارتۋىنا الەۋمەتتىك جەلىدەگى اقپاراتتار اسەر ەتكەنىن مويىنداعان.
جۇرتشىلىق اراسىنداعى ەكپەگە قاتىستى تەرىس پايىمداردى سەيىلتۋ ءۇشىن قوعامدىق دەنساۋلىق ساقتاۋ ۇلتتىق ورتالىعى ەكپە سالدىرۋ ءىسى بويىنشا رەسمي ونلاين-پورتالدى ىسكە قوسقان.
پورتالدا ەكپە اسەرى اۋتيزم اۋرۋىن تۋدىرمايتىنى تۋرالى اقپاراتتار جاريالانادى. سونداي-اق ەكپەگە قاتىستى كوپشىلىكتىڭ كوكەيىندەگى ساۋالدارعا جاۋاپ بەرۋ جۇيەسى جولعا قويىلعان.