بۇگىندە وڭاي ولجاعا كەنەلۋدى كوزدەيتىن جاستار ەسىرتكى تاسىمالداپ, الەۋمەتتىك جەلى ارقىلى ساۋدالاپ ءجۇر. ارەكەتى اشكەرە بولعاندار قىلمىستىق جاۋاپكەرشىلىكتەن قۇتىلمايدى. سەبەبى زاڭ بويىنشا ەسىرتكى ساۋداسىنا قاتىسقاندار 14 جاستان باستاپ جازا ارقالايدى. جاستار بالعىن شاقتان قاتاڭ تۇرمە تەزىنە ءتۇسىپ, بولاشاعىنا بالتا شاپپاس ءۇشىن ەل اۋماعىندا ءتۇسىندىرۋ جۇمىستارى بەلسەندى جۇرگىزىلىپ جاتىر, دەپ جازادى Egemen.kz.
ساكەن سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىندە وتكەن كەزەكتى «استانا – ەسىرتكىسىز قالا» اكتسياسىنا قۇقىق قورعاۋ ورگاندارىنىڭ قىزمەتكەرلەرىمەن قاتار تانىمال سپورتشىلار, مەديا تۇلعالار مەن دارىگەرلەر دە قاتىستى.
«زاڭ جانە ءتارتىپ» قاعيداتى اياسىندا ۇيىمداستىرىلعان اكتسيادا كاسىپقوي بوكسشى انگەلينا لۋكاس, اۋىر اتلەتيكا شەبەرى يليا يلين, مما جاۋىنگەرى ۆاسيلي تاحتاي, كيوكۋشينكاي جانە كاراتەدەن الەم چەمپيونى نۇرسۇلتان الياقباروۆ, بلوگەر الىبەك ەرماعامبەتوۆ تاقىرىپقا قاتىستى تۇيگەندەرىن ورتاعا سالدى. قوناقتاردىڭ ەسىرتكى تۇتىنۋ مەن ونىڭ ساۋداسىنا ۇلەس قوسۋدىڭ سالدارى تۋرالى كەلەلى كوزقاراستارى جينالعان جاستاردىڭ ساناسىن سەرپىلتىپ, قاتەگە بوي الدىرماۋعا ۇندەدى.
ءوز كەزەگىندە يليا يلين تەرىس جولعا تۇسپەۋدىڭ ءتيىمدى جولى ءوزىڭدى دامىتۋ, ىزدەنۋ ەكەنىن اتاپ ءوتتى.
«مەن جاستاردى ءبىلىم الۋعا شاقىرامىن. ءوزىن دامىتۋعا ۇمتىلعان ۇرپاق, الدىندا ماقساتى بار ازامات ەشقاشان قوعامعا زيان كەلتىرەتىن جولدى تاڭدامايدى. ەسىرتكى تۇتىنۋ مەن ساۋدالاۋعا اياق باسپايدى. بۇگىن مەن ءجۇرىپ وتكەن جولىم ارقىلى قانداي جاعدايدا دا ءوزىن جوعالتپاۋدىڭ سىرىمەن ءبولىستىم. وسى ەسىرتكىگە قارسى جۇرگىزگەن ۇگىت-ناسيحاتىمىز بولاشاقتا جەمىسىن بەرەتىنىنە سەنەمىن», دەدى يليا يلين.
ءىىم وكىلدەرى وسى جىلدىڭ مامىرىنا دەيىن ەلىمىزدە 1 445 ەسىرتكىگە بايلانىستى قىلمىستىق ءىس تىركەلىپ, ونىڭ 276-سى استاناعا تيەسىلى ەكەنىن جەتكىزدى. سوندىقتان ءبىلىم مەن جۇمىس ىزدەپ باس قالاعا اعىلاتىن جاستارمەن ءجيى جۇزدەسىپ, ەسىرتكىنىڭ دەنساۋلىققا تيگىزەتىن زيانى مەن زاڭ شەڭبەرىندەگى جازاسىن جەتە ءتۇسىندىرۋ – ارقاشان وزەكتى.
«بۇگىن سالاماتتى قوعامنىڭ نەگىزىنە بالاناتىن جاستار الدىندا ارنايى جەدەل ارەكەت ەتۋ جاساعىنىڭ (سوبر) جاۋىنگەرلەرى ەل اراسىندا «زاكلادچيك» اتالىپ كەتكەندەردىڭ ءىزىن كەسۋ, ەسىرتكى جاسىرىلعان ورىنداردى ىزدەپ, تابۋ باعىتىندا جاسالاتىن قىراعى قادامدارىن ناقتى كورسەتتى. وسىنداي جۇيەلى ارەكەتتەردىڭ ارقاسىندا قىلمىس بۇگىن نەمەسە ەرتەڭ اشىلاتىنىن جاستار اڭداماي جاتادى. سوندىقتان وسى ىسكە بارۋدىڭ سالدارىن كوز الدارىندا كورسەتتىك. الدىمەن ءوزىن, اتا-اناسىن ويلايتىن سانالى جاس ەسىرتكىگە اۋەستەنبەۋى كەرەك», دەپ ءتۇسىندىردى پوليتسيا پودپولكوۆنيگى, ەسىرتكى قىلمىسىنا قارسى كۇرەس باسقارماسىنىڭ قىزمەتكەرى دامير بايبازاروۆ.
عاسىر دەرتىنە بالانعان ەسىرتكىنىڭ قاۋىپ-قاتەرىن تۇسىنەتىن جاستار دا از ەمەس. ولار ەسىرتكىگە قارسى كۇرەس شارالارىنا شاما-شارقىنشا قولداۋ كورسەتىپ كەلەدى. ماسەلەن, «استانا جاستارى» ۇيىمىنىڭ بەلسەندىلەرى ءىىم ماماندارىمەن بىرلەسىپ, 2 500-دەن استام ەسىرتكى جارناماسى سالىنعان گراففيتيدىڭ جويىلۋىنا سەپتەسكەن.
اكتسيا اياسىندا قالالىق پسيحيكالىق دەنساۋلىق ورتالىعىنىڭ دارىگەر-ناركولوگتارى ر.مولداحمەتوۆا مەن ن.وماروۆا ەسىرتكى تۇتىنۋدىڭ دەنساۋلىققا, ادام ومىرىنە كەلتىرەتىن كەرى سالدارىن جەتە ءتۇسىندىردى.
اۋقىمدى جيىن سوڭىندا پوليتسيا پودپولكوۆنيگى د.بايبازاروۆ ستۋدەنتتەر اراسىندا ەسىرتكىنىڭ زاڭسىز اينالىمىنا قارسى كۇرەس ىسىنە قاتىستى ينتەراكتيۆتى ساۋالناما جۇرگىزدى. ستۋدەنتتەر اتالعان ساۋالناما ارقىلى بىلگەنىن شەگەلەپ, زاڭناماعا قاتىستى ماڭىزدى مالىمەتتەرگە قانىقتى.