جەتىسۋ وبلىسىندا سۋ تاسقىنىنىڭ الدىن الۋعا باعىتتالعان ينجەنەرلىك جۇمىستار جۇيەلى تۇردە جۇرگىزىلۋدە. وبلىس اكىمىنىڭ ءباسپاسوز قىزمەتىنىڭ حابارلاۋىنشا, جىل باسىنان بەرى 2 كم قورعانىس دامبىلارى سالىنىپ, جوندەلگەن. سونىمەن قاتار 5,8 كم سۋ بۇرۋ ارنالارى مەن ارىقتار ورناتىلىپ, 2,7 كم وزەن جانە كانال ارنالارى مەحانيكالىق تازارتۋدان ءوتتى. وزەندەردىڭ 4 شاقىرىمىندا تەرەڭدەتۋ, ارنالاردى تۇزەۋ جانە جاعالاۋدى بەكىتۋ جۇمىستارى ورىندالعان, دەپ جازادى Egemen.kz.
تالدىقورعان قالاسىندا قاراتال وزەنىنىڭ ارناسىن مەحانيكالىق تازارتۋ مەن نىعايتۋ جۇمىستارى اياقتالۋعا جاقىن. پانفيلوۆ اۋدانىنىڭ ءسۇپتاي اۋىلىندا تىشقان وزەنىنىڭ ارناسى نىعايتىلىپ جاتىر. سۋ تاسقىنىنىڭ الدىن الۋعا باعىتتالعان 16 ءىس-شارانىڭ 8-ءى قازىر اياقتالعان.
اتقارىلعان جۇمىستاردىڭ قاتارىندا سارقاندا لەپسى, كوكسۋدا بىجى جانە جارلىوزەك وزەندەرىنىڭ 830 مەترلىك بولىگىندە ارنا تۇزەتۋ بار. مۇقانشى مەن مۇسابەك اۋىلدارىندا 2,7 كم سۋ بۇرۋ كانالدارى تەرەڭدەتىلىپ, كەربۇلاق اۋدانىنىڭ سارىوزەك اۋىلىندا 500 مەترلىك ارىق جاڭارتىلدى. قاراتال اۋدانى كوكدالا جانە اقسۋ اۋدانى قاپال اۋىلدارىندا 2,5 كم-گە جۋىق كانالدار تەرەڭدەتىلدى. تاعى سەگىز نىساندا جۇمىستار جالعاسىپ جاتىر.
جوسپاردان تىس ءىس-شارالار دا اتقارىلۋدا. كەربۇلاق اۋدانى شۇبار اۋىلىندا كەسكەنتەرەك وزەنىنىڭ ارناسى تەرەڭدەتىلىپ, تۇزەتىلدى. تالدىقورعاندا بالىقتى, قاراتال اۋدانى تاستوبە اۋىلىندا قاراتال وزەندەرىنىڭ جاعالاۋلارىن نىعايتۋ جۇمىستارى ءجۇرىپ جاتىر.
جالپى, سۋ تاسقىنىنىڭ الدىن الۋ اياسىندا 48 كم كانال, 71 كم ارىق جانە 1489 سۋ وتكىزۋ قۇرىلعىسى سانيتارلىق تازارتۋدان ءوتتى.
جەتىسۋ وبلىسى تجد وكىلى رينات تازابەكوۆتىڭ ايتۋىنشا, بۇل جۇمىستار ءوڭىردىڭ قاۋىپسىزدىگىن ارتتىرۋدا ماڭىزدى ءرول اتقارادى جانە الداعى ۋاقىتتا دا جالعاسىن تابادى.