تۇركىستان وبلىسى جەتىساي اۋدانىنىڭ العاباس اۋىلىندا ەكى قاباتتى جەكە تۇرعىن ءۇي ورتەنىپ, 12 ادام مەرت بولدى. پرەزيدەنت قاسىم-جومارت توقاەۆ قايعىلى وقيعاعا بايلانىستى مارقۇمداردىڭ جاقىندارىنا كوڭىل ايتتى. ۇكىمەت پەن تۇركىستان وبلىسىنىڭ اكىمىنە زارداپ شەككەن ازاماتتاردىڭ تۋعان-تۋىستارىنا بارلىق قاجەتتى كومەك كورسەتىپ, اتالعان جاعدايدى جان-جاقتى تەكسەرۋدى تاپسىردى.
تۇركىستان وبلىسى توتەنشە جاعدايلار دەپارتامەنتىنىڭ «101» پۋلتىنە سەيسەنبى كۇنى تاڭعى ساعات 6-عا جاقىن العاباس اۋىلىنداعى ەكى قاباتتى جەكە تۇرعىن ءۇيدىڭ ورتەنگەنى تۋرالى حابارلاما تۇسكەن. وقيعا ورنىنا ءورت سوندىرۋشىلەر جەتكەنگە دەيىن تۇرعىن ءۇي تولىقتاي ورتكە ورانعان. قىزىل جالىن 360 شارشى مەتردى شارپىعان. 5 ءورت ءسوندىرۋ تەحنيكاسى, 16 جەكە قۇرام جۇمىلدىرىلعان. ءۇيدىڭ ىشىنەن (1 ەر, 2 ايەل, 9 كامەلەتكە تولماعان بالا), ون ەكى ءمايىت تابىلدى. قۇتقارۋشىلاردىڭ ايتۋىنشا, ءورتتى ءسوندىرۋ كەزىندە ۇيدەن ەس-ءتۇسسىز كۇيدەگى ءۇش ادام شىعارىلىپ, جەدەل جاردەم بريگاداسىنا تاپسىرىلعان.
قايعىلى وقيعا بولعان ءۇي كورشىلەرىنىڭ ايتۋىنشا, الدىڭعى كۇنى ءۇي يەلەرى سۇندەت توي وتكىزگەن. ۇيدە اعالى-ءىنىلى, ياعني وتاعاسىنىڭ جانە تۋعان اعاسىنىڭ وتباسى بولعان. ەكى قاباتتى كىرپىشتەن سوعىلعان ءۇي گازبەن جىلىتىلادى. ءورتتىڭ شىعۋ سەبەپتەرى انىقتالىپ جاتىر.
مەملەكەت باسشىسىنىڭ تاپسىرماسىمەن قۇرىلعان, پرەمەر-ءمينيستردىڭ ورىنباسارى قانات بوزىمباەۆ توراعالىق ەتەتىن ۇكىمەتتىك كوميسسيا قۇرامىنا توتەنشە جاعدايلار, ىشكى ىستەر, دەنساۋلىق ساقتاۋ, ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ, تۇركىستان وبلىسى اكىمدىگىنىڭ باسشىلىعى ەنگىزىلدى. زارداپ شەككەندەر مەن قازا تاپقانداردىڭ وتباسىلارىنا بارلىق قاجەتتى مەديتسينالىق جانە پسيحولوگيالىق كومەك كورسەتىلىپ جاتىر. اكىمدىككە ءورت سالدارىنان قازا تاپقانداردى جەرلەۋدى ۇيىمداستىرۋعا جاردەمدەسۋ تاپسىرىلدى.
بالا قۇقىقتارى جونىندەگى ۋاكىل دينارا زاكيەۆا الەۋمەتتىك جەلىدەگى پاراقشاسىندا قازا بولعانداردىڭ وتباسىنا كوڭىل ايتتى. «وڭىرلىك ۋاكىل پسيحولوگيالىق قولداۋ ورتالىعى ماماندارىمەن بىرگە وقيعا ورنىنا شىقتى. ءورتتىڭ شىعۋ سەبەبى مەن ءمان-جايى تەرگەلىپ جاتىر. قازا بولعانداردىڭ تۋىستارىنا كوڭىل ايتامىز», دەپ جازدى د.زاكيەۆا.
جەتىساي اۋدانىندا بولعان ورتكە بايلانىستى ءوڭىردىڭ مەديتسينالىق قىزمەتى زارداپ شەككەندەرگە جەدەل تۇردە كومەك كورسەتىپ جاتىر. مەديتسينالىق مەكەمەلەرگە ءۇش ادام – ەكى ەرەسەك جانە ءبىر بالا جەتكىزىلگەن. دارىگەرلەردىڭ ايتۋىنشا, بارلىعى رەانيماتسيا بولىمىندە جاتىر, جاعدايلارى وتە اۋىر. ولارعا ينتەنسيۆتى تەراپيانىڭ تولىق كەشەنى جۇرگىزىلىپ, جاعدايى سالالىق مامانداردىڭ باقىلاۋىنا الىنعان.
جەتىساي اۋدانىندا بولعان ءورت وقيعاسى بويىنشا سوتقا دەيىنگى تەرگەپ-تەكسەرۋ باستالدى. قازىر اتالعان جاعدايدىڭ بارلىق ءمان-جايىن انىقتاۋعا باعىتتالعان قاجەتتى ءىس-شارالار جۇرگىزىلىپ جاتىر. تەرگەۋ ناتيجەسىمەن پروتسەستىك شەشىم قابىلداناتىن بولادى.
تۇركىستان وبلىسى