اشحاباد قالاسىندا مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ (مسشۇك) 91-وتىرىسى ءوتىپ, وعان سالا ءمينيسترى نۇرجان نۇرجىگىتوۆ,تۇرىكمەنستاننىڭ سۋ شارۋاشىلىعى مەملەكەتتىك كوميتەتىنىڭ توراعاسى دۋردى گەندجيەۆ, وزبەكستاننان سالا ءمينيسترى شاۆكات حامراەۆ,تاجىكستاننىڭ ەنەرگەتيكا جانە سۋ رەسۋرستارى ءبىرىنشى ورىنباسارى دجامشەد شودي شويمزودا, باقىلاۋشى رەتىندە قىرعىزستاننىڭ تۇرىكمەنستانداعى ەلشىلىگىنىڭ كەڭەسشىسى ەميل شادىحانوۆ قاتىستى, دەپ حابارلايدى Egemen.kz.
مينيسترلىكتىڭ مالىمەتىنشە, وتىرىستا تاراپتار 2025 جىلعى ۆەگەتاتسيا كەزەڭىنىڭ قورىتىندىلارىن تالقىلادى. سونداي-اق 2025-2026 جىلدارداعى ۆەگەتاتسياارالىق كەزەڭگە ارنالعان نارىن-سىرداريا سۋ قويمالارى كاسكادىنىڭ بولجامدىق جۇمىس كەستەسى بەكىتىلدى. وسى كەستەگە سايكەس شاردارا سۋ قويماسىنا كەلەتىن بولجامدى سۋ كولەمى كەلىسىلدى. بۇدان بولەك, تاراپتار ارالدى قۇتقارۋ حالىقارالىق قورىنىڭ نەگىزىن قالاۋشى مەملەكەتتەر باسشىلارىنىڭ سامميتتەرىندە بەرىلگەن تاپسىرمالاردىڭ ورىندالۋ بارىسى تۋرالى ەسەپ بەردى. مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ كەلەسى, 92-وتىرىسى كەلەسى جىلى تاجىكستاندا وتەدى.
ەلىمىزدىڭ سۋ ۆەدومستۆوسى باسشىسى نۇرجان نۇرجىگىتوۆتىڭ ايتۋىنشا, وتكەن سۋارۋ ماۋسىمى كۇردەلى كليماتتىق جاعدايدا ءوتتى.
«الايدا مسشۇك قۇرامىنداعى مەملەكەتتەردىڭ ءوزارا ۇيلەسىمدى ارەكەتتەسۋى ۆەگەتاتسيا كەزەڭىن تۇراقتى وتكىزۋگە مۇمكىندىك بەردى. وسىنداي كەزدەسۋلەر ارقىلى ورتاق كەلىسىمدەر جاسالىپ, الداعى ىنتىماقتاستىقتىڭ نەگىزى قالانادى. ورتالىق ازيا ەلدەرىندەگى ارىپتەستەرىمىزبەن بىرگە ترانسشەكارالىق سۋ رەسۋرستارىن بارلىق تاراپتىڭ مۇددەسىن ەسكەرە وتىرىپ, ءادىل بولۋگە نيەتتىمىز», دەدى ن.نۇرجىگىتوۆ.