ەلىمىزدىڭ دەنساۋلىق ساقتاۋ مينيسترلىگى ءدارى-دارمەك باعاسىنىڭ اشىقتىعىن ارتتىرۋ ماقساتىندا Naqty Onim قوسىمشاسىندا جاڭا تسيفرلىق سەرۆيستى ىسكە قوستى. ەندى ەل ازاماتتارى ءدارىنىڭ شەكتى باعاسىن تەكسەرىپ, شاعىمدانا الادى, دەپ حابارلايدى Egemen.kz.
ەستەرىڭىزگە سالا كەتەيىك, 2024 جىلدىڭ شىلدەسىنەن باستاپ قازاقستاندا بارلىق ءدارى-دارمەك مىندەتتى تۇردە تاڭبالانۋى ءتيىس. بۇل جۇيە پاتسيەنتتەردى جالعان ونىمدەردەن قورعاپ, ءدارىنىڭ زاۋىتتان دارىحاناعا دەيىنگى جولىن تولىق باقىلاۋعا مۇمكىندىك بەرەدى.
تاڭبالاۋ ناتيجەسىندە تەگىن بەرىلەتىن پرەپاراتتاردىڭ زاڭسىز ساتىلۋ دەرەكتەرى انىقتالعان. باس پروكۋراتۋرامەن بىرلەسكەن تەكسەرىستەر باستالدى. مينيسترلىكتىڭ مالىمەتىنشە, جۇيەنىڭ اشىقتىعى فارماتسەۆتيكا سالاسىنداعى سالىق تۇسىمدەرىن 24 پايىزعا ارتتىرعان.
سونىمەن قاتار كەپىلدەندىرىلگەن تەگىن مەديتسينالىق كومەك جانە مىندەتتى مەديتسينالىق ساقتاندىرۋ باعدارلامالارى بويىنشا 2900 ءدارى-دارمەكتىڭ باعاسى قايتا قارالعانى حابارلاندى. سونداي-اق, بيىلعى جىلدىڭ قازان ايىندا بولشەك ساۋدا جەلىسىن باقىلاۋ اياسىندا ەڭ تانىمال ءدارى-دارمەكتەردىڭ باعاسى ورتا ەسەپپەن 11%-عا تومەندەدى.
بۇگىن دەنساۋلىق ساقتاۋ مينيسترلىگى امبۋلاتوريالىق ءدارى-دارمەكتەر تىزىمىنە ەنگىزىلگەن وزگەرىستەرگە قاتىستى تۇسىنىكتەمە بەردى. قانت ديابەتى, رەۆماتويدتى ارتريت, تسەرەبرالدى سال اۋرۋى جانە باسقا دا سوزىلمالى اۋرۋلارى بار ناۋقاستار قاجەتتى ءدارى-دارمەكتەردى تولىق كولەمدە الۋدى جالعاستىرادى.
ايتا كەتەيىك, بيىل 1 723 ءدارى مەن مەديتسينالىق بۇيىم ساراپتامادان ءوتىپ, ونىڭ ىشىندە ساپاسىز دەپ تانىلعان 43 اتاۋلى پرەپارات نارىقتان الىنعان.