استانادا «SARAP» ەكسپەرتتىك كلۋبىنىڭ ء«حىى ازاماتتىق فورۋم ناتيجەلەرى: ازاماتتىق بەلسەندىلىك – ەل دامۋىنىڭ قاينار كوزى» تاقىرىبىندا وتىرىسى ءوتتى. ءىس-شارانى مادەنيەت جانە اقپارات مينيسترلىگىنىڭ قولداۋىمەن قازاقستاندىق قوعامدىق دامۋ ينستيتۋتى ۇيىمداستىردى, دەپ جازادى Egemen.kz.
جيىندا ءحىى ازاماتتىق فورۋم فورماتىنىڭ تيىمدىلىگى, فورۋم بارىسىنداعى ۇسىنىمدار, ۇەۇ بىلىكتىلىگىن ارتتىرۋ ماسەلەلەرى, سونداي-اق ازاماتتاردىڭ شەشىم قابىلداۋعا قاتىسۋىن كەڭەيتۋدەگى تسيفرلاندىرۋ مەن جاساندى ينتەللەكتىنىڭ ءرولى تالقىلاندى.
ءىس-شاراعا مەملەكەتتىك ورگاندار مەن اكادەميالىق قاۋىمداستىق وكىلدەرى, ۇەۇ مۇشەلەرى مەن ساراپشىلار قاتىستى.
مادەنيەت جانە اقپارات مينيسترلىگى ازاماتتىق قوعام ىستەرى كوميتەتىنىڭ توراعاسى گۇلبارا سۇلتانوۆا كىرىسپە سوزىندە XII ازاماتتىق فورۋمنىڭ ناتيجەلەرىنە جان-جاقتى تالداۋ جاساپ, نەگىزگى جەتىستىكتەر مەن وزەكتى ماسەلەلەرگە توقتالدى. ونىڭ ىشىندە ازاماتتىق قوعام ينستيتۋتتارىمەن ءوزارا ءىس-قيمىل سالاسىنداعى مەملەكەتتىك ساياساتتى ودان ءارى جەتىلدىرۋ باعىتتارىن اتاپ ءوتتى.
جيىنعا قازاقستاندىق قوعامدىق دامۋ ينستيتۋتى قوعامدىق پروتسەستەردى زەرتتەۋ ورتالىعىنىڭ باسشىسى ريززات تاسىم مودەراتور بولدى.
«ازاماتتىق فورۋم 2003 جىلدان باستاپ مەملەكەت پەن قوعامدىق بىرلەستىكتەردىڭ ىنتىماقتاستىعىن نىعايتۋ, وزەكتى مىندەتتەردى انىقتاۋ جانە ازاماتتىق سەكتوردى دامىتۋ ماسەلەلەرىن تالقىلاۋعا ارنالعان تۇراقتى الاڭعا اينالدى. ونىڭ ىشىندە بيىلعى فورۋم «ادىلەتتى قازاقستان: ازاماتتىق قوعام مەن مەملەكەتتىڭ سەرىكتەستىگى» تاقىرىبى اياسىندا جاۋاپكەرشىلىك پەن سەنىمگە نەگىزدەلگەن قوعامدىق ديالوگتى جاڭا دەڭگەيگە كوتەرۋگە دەگەن ۇمتىلىستى كورسەتتى. سوندىقتان ديالوگ ۇزدىكسىز بولۋى كەرەگىن جانە تالقىلاناتىن ماسەلەلەردىڭ اۋقىمىن ەسكەرىپ, «SARAP» ەكسپەرتتىك كلۋبىنىڭ وتىرىسىن XII ازاماتتىق فورۋمنىڭ قورىتىندىلارىنا ارنايمىز دەپ شەشتىك», دەدى ول.
«قازاقستاننىڭ ازاماتتىق اليانسى» زتب ۆيتسە-پرەزيدەنتى گۇلنار قۇربانباەۆا بيىلعى ازاماتتىق فورۋمنىڭ ۇيىمداستىرۋ بارىسىنا توقتالىپ, ح جانە ءحى فورۋمداردا ايتىلعان ۇسىنىمداردىڭ جۇزەگە اسۋ ناتيجەسىن باياندادى.
«تالداۋ كورسەتكەندەي, ح جانە ءحى فورۋمداردا ايتىلعان, ۇكىمەت جوسپارلارىنا ەنگىزىلگەن ۇسىنىستاردىڭ باسىم بولىگى جۇزەگە اسىرىلدى. بۇل ۇدەرىستى ازاماتتىق قوعام ينستيتۋتتارىنىڭ تالدامالىق جانە زەرتتەۋ جۇمىستارى سۇيەمەلدەدى, بۇل ۇسىنىلعان شارالاردىڭ وبەكتيۆتىگى مەن تاجىريبەلىك ماڭىزىن ارتتىرۋعا مۇمكىندىك بەردى»,دەدى سپيكەر.
قازاقستاندىق قوعامدىق دامۋ ينستيتۋتىنىڭ ساراپشىسى تەمىرلان تولەۋ «مەملەكەتتىك قارجىلاندىرۋ اياسىنداعى ۇەۇ الەۋمەتتىك جوبالارىنىڭ تيىمدىلىگىن باعالاۋ» اتتى زەرتتەۋ جۇمىسىنىڭ ناتيجەلەرىن تانىستىردى.
«زەرتتەۋ قاتىسۋشىلارىنىڭ, ساراپشىلاردىڭ, ۇەۇ وكىلدەرى مەن بەنەفيتسيارلاردىڭ پىكىرى ءبىر ارنادا توعىسادى: الەۋمەتتىك جوبالار, اسىرەسە, مەملەكەت قارجىلاندىراتىن جوبالار – ماقساتتى توپتاردىڭ ماسەلەلەرىن شەشۋدە ءتيىمدى قۇرال. دەگەنمەن قازىرگى ۋاقىتتا الەۋمەتتىك جوبالاردى ىسكە اسىرۋ مەحانيزمى تولىق جەتىلمەگەن, بىرنەشە پروبلەمالىق تۇسى بار. نەگىزگى ماسەلەنىڭ ءبىرى – قارجىلاندىرۋدىڭ قىسقامەرزىمدى سيپاتى. ساۋالناماعا قاتىسۋشىلاردىڭ ايتۋىنشا, بۇل فاكتور الەۋمەتتىك جوبالاردىڭ تۇراقتى ناتيجەلەرگە قول جەتكىزۋىنە جانە ولاردىڭ ۇزاقمەرزىمدى ىقپالىنا ايتارلىقتاي اسەر ەتەدى», دەدى ساراپشى.
ال Astana IT ۋنيۆەرسيتەتىنىڭ اسسيستەنت-پروفەسسورى, PhD مەرگەن دۇيسەنوۆ جاساندى ينتەللەكتىنىڭ ازاماتتىق قوعامنىڭ دامۋىنداعى رولىنە تەرەڭىرەك توقتالدى.
«جاساندى ينتەللەكت ازاماتتىق قوعام ءۇشىن قوعامدىق دەرەكتەردى تالداۋدان باستاپ, شەشىمدەر قابىلداۋ پروتسەسىنە بىرلەسە اتسالىسۋعا دەيىنگى جاڭا مۇمكىندىكتەرگە جول اشادى. بۇرىن ازاماتتار باقىلاۋشى نەمەسە پىكىر ءبىلدىرۋشى رولىندە بولسا, ەندى ولار جي كومەگىمەن تسيفرلىق باسقارۋدىڭ تولىققاندى قاتىسۋشىلارىنا اينالا الادى», دەدى ول.
ودان بولەك, «سەنىمەن بولاشاق» رقب توراعاسى جانسايا بەردىمۇراتقىزى ۇكىمەتتىك ەمەس ۇيىمداردىڭ بىلىكتىلىگىن ارتتىرۋ جونىندە بايانداما جاسادى. ال ل.ن. گۋميلەۆ ات. ەۇۋ فيلوسوفيا كافەدراسىنىڭ اعا وقىتۋشىسى, PhD تولعاناي مۇستافينا جي سالاسىنداعى ەلىمىزدىڭ مۇمكىندىكتەرى تۋرالى ايتتى.
ءىس-شارا اياعىندا قاتىسۋشىلار ءوزارا پىكىر الماسىپ, ۇسىنىستارىن ورتاعا سالدى ءارى الداعى ۋاقىتتا وسى سالاداعى باستامالاردىڭ ءساتتى جۇزەگە اسىرىلۋىنا مۇددەلى ەكەنىن جەتكىزدى.