ماڭعىستاۋ وبلىسىندا بيىل تىركەلگەن قىلمىستىق قۇقىق بۇزۋشىلىقتار سانى 15,7%-عا ازايدى. اتاپ ايتقاندا, اسا اۋىر قىلمىستار 73,7%-عا, اۋىر قىلمىستار 8,1%-عا, ورتاشا اۋىرلىقتاعى قىلمىستار 29,5%-عا, ونشا اۋىر ەمەس قىلمىستار 9,7%-عا تومەندەگەن. بۇل تۋرالى ماڭعىستاۋ وبلىستىق قوعامدىق كوممۋنيكاتسيا ورتالىعىندا وتكەن بريفينگتە وڭىرلىك پوليتسيا دەپارتامەنتىنىڭ باستىعى ساعىندىق اياعانوۆ ايتتى, دەپ حابارلايدى Egemen.kz.
سپيكەردىڭ ايتۋىنشا, كىسى ءولتىرۋ 50%-عا, زورلاۋ 9,1%-عا, ۇرلىق 43,8%-عا, الاياقتىق 14,8%-عا, بۇزاقىلىق 16,9%-عا ازايعان. بارلىق كىسى ءولتىرۋ, زورلاۋ, قاراقشىلىق, توناۋ جانە كولىك ايداپ كەتۋ فاكتىلەرى تولىق اشىلدى. جالپى قىلمىستاردىڭ اشىلۋ كورسەتكىشى 2,9%-عا جاقساردى.
-2025 جىل ىشكى ىستەر ءمينيسترى تاراپىنان «پروفيلاكتيكا جىلى» دەپ جاريالانىپ, پروفيلاكتيكالىق جۇمىستار كۇشەيتىلدى. سونىڭ ناتيجەسىندە قوعامدىق ورىنداردا جاسالعان قىلمىس 11,7%-عا, كوشەدەگى قىلمىس 5,4%-عا, جاسوسپىرىمدەر قاتىسقان قىلمىستار 24,2%-عا ازايدى. ەسىرتكى قىلمىسىنا قارسى كۇرەس تە قارقىندى جالعاسۋدا. زاڭسىز اينالىمنان 390 كەلىدەن استام ەسىرتكى زاتى تاركىلەندى, ونىڭ ىشىندە 4 كەلىگە جۋىق سينتەتيكالىق ەسىرتكى بار, دەدى ساعىندىق اياعانوۆ.
سونىمەن قاتار, وڭىردە تۇرمىستىق زورلىق-زومبىلىق, جاسوسپىرىمدەر اراسىنداعى توبەلەس جانە ناشاقورلىقتىڭ الدىن الۋ باعىتىندا تۇراقتى جۇمىستار جۇرگىزىلۋدە. بۇل شارالار وڭىردەگى قوعامدىق قاۋىپسىزدىك دەڭگەيىنىڭ ارتۋىنا وڭ اسەرىن تيگىزدى.
-پوليتسيا دەپارتامەنتى الداعى ۋاقىتتا دا قوعامدىق قاۋىپسىزدىكتى قامتاماسىز ەتۋ ءۇشىن بار كۇشىن سالادى. ءبىزدىڭ ماقساتىمىز – مانعىستاۋ وبلىسىن قاۋىپسىز ايماققا اينالدىرۋ, دەدى ساعىندىق اياعانوۆ.
ماڭعىستاۋ وبلىسى