قاراقيا اۋدانىنىڭ مۇنايشى جانە جەتىباي اۋىلدارىندا انگار تيپىندەگى جاڭا سپورت زالداردىڭ سالتاناتتى اشىلۋ ءراسىمى ءوتتى, دەپ حابارلايدى Egemen.kz.
اتالعان سپورت زالدار اۋىل جاستارى مەن تۇرعىندارىنىڭ سالاۋاتتى ءومىر سالتىن ۇستانۋىنا جانە بۇقارالىق سپورتتى دامىتۋعا مۇمكىندىك بەرەدى. ءار نىساننىڭ جالپى اۋماعى – 1488 شارشى مەتر, ءبىر مەزەتتە 50 ادامعا دەيىن قابىلداي الادى. زالدا كۇرەس تۇرلەرى, فۋتبول, ۆولەيبول جانە باسكەتبول بويىنشا ۇيىرمەلەر جۇمىس ىستەمەك.
سالتاناتتى ءىس-شارا بارىسىندا وبلىس اكىمى نۇرداۋلەت قيلىباي تۇرعىنداردى جاڭا سپورت زالداردىڭ اشىلۋىمەن قۇتتىقتاپ, بۇل نىسانداردىڭ اۋىل جاستارىنىڭ بوس ۋاقىتىن ءتيىمدى وتكىزۋىنە جانە ولاردىڭ سپورتقا قىزىعۋشىلىعىن ارتتىرۋعا زور ىقپال ەتەتىنىن اتاپ ءوتتى.
«مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, وڭىرلەردە بۇقارالىق سپورتتى دامىتۋعا جانە جاستاردى سپورتقا تارتۋعا ەرەكشە نازار اۋدارىلىپ كەلەدى. بۇگىن اشىلىپ وتىرعان زالدار – سونىڭ ناتيجەسى. وسىنداي زاماناۋي سپورت نىساندارى ارقىلى اۋىل جاستارىنىڭ دەنساۋلىعى نىعايىپ, ەل نامىسىن قورعايتىن جاڭا چەمپيوندار ءوسىپ شىعادى دەپ سەنەمىن», دەدى ايماق باسشىسى.
بيىل وبلىس اكىمىنىڭ تاپسىرماسىنا سايكەس جەتىباي اۋىلىندا تۇڭعىش رەت بالالار مەن جاسوسپىرىمدەرگە ارنالعان سپورت مەكتەبى قۇرىلدى. الداعى ۋاقىتتا اتالعان ەكى سپورت نىسانى وسى مەملەكەتتىك مەكەمەنىڭ تەڭگەرىمىنە بەرىلەتىن بولادى.
ماڭعىستاۋ وبلىسى