كىتاپ – اقىل مەن ءبىلىمنىڭ قاينار كوزى. استانادا رەسپۋبليكا كۇنى قارساڭىندا جاڭا كىتاپحانا اشىلدى. سالتاناتتى اشىلۋ راسىمىنە استانا قالاسى ءماسليحاتىنىڭ توراعاسى تابيعات زەينۇلقابدەن, ءماسليحات دەپۋتاتتارى, سونداي-اق مادەنيەت سالاسىنىڭ وكىلدەرى قاتىستى. كىتاپحانا استانا قالاسى اكىمدىگىنىڭ ورتالىقتاندىرىلعان كىتاپحانالار جۇيەسىنە قارايدى.
كوركى كوز تارتاتىن جاڭا كىتاپحانانىڭ زاماناۋي وقۋ زالى مەن كوۆوركينگى, 3 مىڭنان استام كىتاپ قورى بار. ءبىر ۋاقىتتا التى مىڭ وقىرمانعا قىزمەت كورسەتە الادى. ۋنيۆەرسيتەت پەن مەكتەپكە, «Egemen Qazaqstan» گازەتىنىڭ رەداكتسياسىنا جاقىن ورنالاسقان بۇل كىتاپحاناعا كەلۋشىلەر قاراسى وتە كوپ. ءستيلى دە بولەك, كەڭ ءəرى زاماناۋي ۇلگىدە سالىنعان. ەڭ باستىسى, وقىرمانعا بارلىق جاعداي جاسالعان, كىتاپتى ۇيگە الىپ وقۋعا دا بولادى. جاڭا نىساننىڭ ىشكى ديزاينى دا جانعا جىلىلىق, ميعا تىنىشتىق سىيلايدى.
«كرەاتيۆتى كىتاپحانا دەپ اتاپ وتىرعانىمىز بەكەر ەمەس. ويتكەنى كەلەشەكتە كىتاپحانالار مەن كرەاتيۆتى يندۋستريا وكىلدەرى اراسىندا بايلانىس ورناتىپ, كىتاپحانا كەڭىستىگىن زياتكەرلىك پلاتفورماعا اينالدىرساق دەگەن ويدامىز. سونىمەن قاتار مۇندا وقۋ زالى, ارت-شەبەرحاناسى, پىكىرتالاس الاڭى, شىعارماشىلىق شەبەرحانالار سياقتى فۋنكتسيونالدىق ايماقتار جۇمىس ىستەيدى», دەيدى استانا قالاسى «ورتالىقتاندىرىلعان كىتاپحانالار جۇيەسىنىڭ» باسشىسى گۇلبادان مادىباەۆا.
ايتا كەتەيىك, ەلوردادا كىتاپحانا جۇيەسىن جاڭعىرتۋ جۇمىستارى جۇيەلى تۇردە جۇزەگە اسىپ جاتىر. ناقتىراق ايتساق, ەلوردادا 2023 جىلى ءتورت كىتاپحانا جوندەۋدەن وتسە, بىلتىر تاعى ءتورت نىسان جاڭعىرتىلىپ, ءتورت كىتاپحانا پايدالانۋعا بەرىلدى. ال بيىل ءۇش كىتاپحانا ىسكە قوسىلىپ وتىر. ءسويتىپ, قازىرگى ۋاقىتتا استانا قالاسىندا 25 كىتاپحانا جۇمىس ىستەپ تۇر.