رەسپۋبليكا كۇنىنە وراي مادەنيەت جانە اقپارات ءمينيسترى ايدا بالاەۆا وتاندىق مادەنيەت, ونەر جانە مەديا سالاسىنىڭ دامۋىنا ەلەۋلى ۇلەس قوسقان 62 قايراتكەرگە مەملەكەتتىك ناگرادا تابىستادى. ماراپاتتاۋ ءراسىمى استانادا كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە ءوتتى, دەپ حابارلايدى Egemen.kz.
«بۇگىن مەملەكەت باسشىسى رەسپۋبليكا كۇنى قارساڭىندا ءبىر توپ ازاماتتى مەملەكەتتىك ناگرادالارمەن ماراپاتتاۋ تۋرالى جارلىققا قول قويدى. ولاردىڭ قاتارىندا حالىقپەن ەتە جۇمىس ىستەپ جۇرگەن قاراپايىم ەڭبەك ادامدارى دا بار. بۇل ماراپات سىزدەردىڭ كوپجىلدىق ەسەلى ەڭبەكتەرىڭىزدىڭ لايىقتى باعالانۋى دەپ بىلەمىن. ويتكەنى ءبىرىڭىز اقپارات ايدىنىندا ايانباي ەڭبەك ەتىپ, حالىق پەن بيلىك اراسىندا التىن كوپىر بولىپ جۇرسەڭىزدەر, ال ەندى بىرەۋلەرىڭىز ونەر سالاسى ارقىلى ەلىمىزدىڭ رۋحىن كوتەرىپ, مادەني مۇرالارىمىزدى جاڭعىرتۋدا زور ەڭبەك ەتىپ كەلەسىزدەر», دەدى ايدا بالاەۆا.
مينيسترلىكتىڭ مالىمەتىنشە ماراپات يەلەرىنىڭ قاتارىندا «استانا وپەرا» مەملەكەتتىك وپەرا جانە بالەت تەاترى, ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ, ە.راحماديەۆ اتىنداعى مەملەكەتتىك اكادەميالىق فيلارمونياسى, ر.باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ جانە باسقا دا مادەنيەت مەكەمەلەرىنىڭ قىزمەتكەرلەرى بار.
سونىمەن قاتار «حابار» اگەنتتىگى, «Qazaqstan» تەلەارناسى, رەسپۋبليكالىق «كازاحستانسكايا پراۆدا», «ەگەمەن قازاقستان» گازەتتەرىنىڭ, ۇلتتىق اكادەميالىق كىتاپحانا جانە باسقا دا ۇيىمداردىڭ قىزمەتكەرلەرى ەلەۋسىز قالمادى.
سالتاناتتى ءراسىمنىڭ سوڭىندا ەلىمىزدىڭ جەتەكشى شىعارماشىلىق ۇجىمدارى ونەرپازدارىنىڭ قاتىسۋىمەن كونتسەرت ۇيىمداستىرىلدى.