استانا قالاسىنىڭ مادەنيەت باسقارماسى قازاق پوەزياسىنىڭ كورنەكتى وكىلى, مەملەكەتتىك سىيلىقتىڭ لاۋرەاتى نەسىپبەك ايت ۇلىنىڭ 75 جىلدىق مەرەيتويىنا ارنالعان رەسپۋبليكالىق ءمۇشايرا جاريالادى, دەپ جازادى Egemen.kz.
«بوستاندىق جىرىنىڭ بوزجورعاسى» دەپ اتالعان بۇل ادەبي بايگە – ۇلتتىق رۋح پەن ەركىن ويدى, ەلدىك پەن ازاتتىق جىرىن دارىپتەيتىن رۋحاني مەرەكە بولماق. ءمۇشايرانىڭ باستى ماقساتى – ءوز ءداۋىرىنىڭ ءور داۋىسىنا اينالعان اقىن مۇراسىن ناسيحاتتاۋ, جاس بۋىندى ەلدىك رۋح پەن وتانشىلدىققا باۋلۋ.
بايقاۋعا قاتىسۋشىلار ەكى ولەڭ ۇسىنۋى ءتيىس. ءبىرى – نەسىپبەك ايت ۇلىنا ارنالعان ارناۋ, ەكىنشىسى – ەركىن تاقىرىپتاعى تۋىندى (ليريكا, تولعاۋ, باللادا جانە ت.ب.). جولدانعان شىعارمالار بۇرىن ەش جەردە جاريالانباعان ءارى باسقا مۇشايرالارعا قاتىسپاعان بولۋى قاجەت.
وتىنىمدەر 1 جەلتوقسانعا دەيىن قابىلدانادى. اقىندار ءوز تۋىندىلارىن قىسقاشا ومىربايانىمەن جانە بايلانىس دەرەكتەرىمەن بىرگە astanapoets@gmail.com ەلەكتروندى پوشتاسىنا جولدايدى.
جەڭىمپازدارعا لايىقتى سىياقىلار تاعايىندالعان: باس جۇلدە – 3 300 000 تەڭگە, ءبىرىنشى ورىن – 2 200 000 تەڭگە, ەكىنشى ورىن – 1 100 000 تەڭگەدەن ەكى اقىنعا, ءۇشىنشى ورىن – 660 000 تەڭگەدەن ءۇش اقىنعا, ىنتالاندىرۋ سىيلىعى – 330 000 تەڭگەدەن بەس قاتىسۋشىعا بەرىلەدى.
ءمۇشايرا – ەلدىك رۋحتىڭ ەڭسەسىن كوتەرىپ, ەركىن ويدىڭ كوكجيەگىن كەڭەيتەر ادەبي الاڭ بولماق.