بۇگىن الماتىنىڭ وڭىرلىك كوممۋنيكاتسيالار قىزمەتى الاڭىندا جۇرەك كىناراتتارىمەن (تجا) تۋعان بالالاردى ەرتە دياگنوستيكالاۋ مەن قولداۋ ماسەلەلەرىنە ارنالعان ءباسپاسوز ءماسليحاتى ءوتىپ, وعان «Heart Center Foundation» قوعامدىق قورىنىڭ ديرەكتورى مۇرات زاۋىروۆ, University Medical Center كلينيكالىق اكادەميالىق پەدياتريا دەپارتامەنتىنىڭ ديرەكتورى, بالالار كارديولوگى تاتيانا يۆانوۆا-رازۋموۆا, UMC جۇرەك ورتالىعىنىڭ بالالار كارديولوگى ايكەرىم جاناتقىزى قاتىسىپ, اتا-انالار مەن دارىگەرلەرگە ارنالعان اۋقىمدى ءبىلىم بەرۋ باعدارلاماسى تۋرالى باياندادى. بۇل باعدارلاما جۇرەكتىڭ تۋا ءبىتتى كەسەلدەرى جونىندە قوعامنىڭ حاباردارلىعىن ارتتىرا وتىرىپ, بۇل دەرتتەردى اسقىندىرماي دياگنوستيكالاۋدى دامىتۋدى كوزدەيدى, دەپ جازادى Egemen.kz.
ساراپشىلاردىڭ ايتۋىنشا, بۇگىندە قازاقستاندا تجا دياگنوزى قويىلعان 380 مىڭنان استام بالا بار. جىل سايىن شامامەن 2,5 مىڭ جاڭا جاعداي تىركەلەدى, ونىڭ 400-گە جۋىعى الماتى قالاسىندا تۇرادى. تەك 2025 جىلدىڭ العاشقى التى ايىندا الماتىدا 18 جاڭا تۋعان نارەستەگە وتا جاسالدى. 2024 جىلى ەلىمىزدە بالالارداعى جۇرەك اقاۋلارىن تۇزەتۋدىڭ 1,7 مىڭ وتاسى جاسالىپ, ونىڭ شامامەن 500-ءى استاناداعى UMC جۇرەك ورتالىعىندا ءوتتى.
ء«تۋابىتتى جۇرەك اقاۋلارى – بالالار اراسىنداعى ەڭ ءجيى كەزدەسەتىن پاتولوگيالاردىڭ ءبىرى, ول العاشقى اپتالار مەن ايلاردا كوبىنە بەلگىلەرى كورىنبەيدى اتا-انالاردىڭ بىلمەستىگى مەن دياگنوستيكاعا قولجەتىمدىلىكتىڭ بىركەلكى بولماۋى اۋرۋدى كەش انىقتاۋدىڭ باستى سەبەپكەرى بولىپ وتىر», – دەدى مۇرات زاۋىروۆ.
دەر كەزىندە مەديتسينالىق كومەك كورسەتىلمەسە, مۇنداي اۋرۋلار وتە اسقىنىپ, ءتىپتى ومىرگە قاۋىپ ءتوندىرۋى مۇمكىن. ءوز كەزەگىندە تاتيانا يۆانوۆا-رازۋموۆا قازىرگى زامانعى پرەناتالدىق سكرينينگ ادىستەرى جۇكتىلىكتىڭ 18–21 اپتاسىندا اۋىر جۇرەك اقاۋلارىنىڭ 85%-ىنا دەيىن انىقتاۋعا مۇمكىندىك بەرەتىنىن ايتا كەلە:
«جۇكتىلىكتىڭ ەكىنشى تريمەسترىندە جاسالاتىن فەتالدى ەحوكارديوگرافيا – كۇردەلى جۇرەك اقاۋلارىن ەرتە انىقتاۋعا مۇمكىندىك بەرەتىن ماڭىزدى قۇرال. ەرتە دياگنوستيكا اتا-انالارعا بوسانۋعا دايىندالىپ, كەيىنگى ەم قابىلدايتىن كلينيكانى تاڭداۋعا مۇمكىندىك بەرەدى», دەدى.
بۇگىندە قازاقستاندا جاڭا تۋعان نارەستەلەرگە, سونىڭ ىشىندە سالماعى تومەن بالالارعا دا كارديوحيرۋرگيالىق وپەراتسيالار جاساۋعا تولىق تەحنيكالىق مۇمكىندىك بار. مۇنداي وتالار كوبىنە ءومىرىنىڭ العاشقى ايلارىندا جاسالىپ, بالالارعا تولىققاندى ءومىر سۇرۋگە جانە دامۋعا جاعداي جاسايدى. ءاربىر جاعداي جەكە قاراستىرىلعانىمەن, كۇردەلى تۋا بىتكەن جۇرەك اقاۋلارىندا حيرۋرگيالىق ارالاسۋ نەگىزگى تۇزەتۋ ءادىسى بولىپ قالا بەرەدى.
وسى ورايدا الماتىدا «Heart Center Foundation» قوعامدىق قورى اتا-انالار مەن دارىگەرلەرگە ارنالعان پاتسيەنتتەر مەكتەبىن ۇيىمداستىرىپ وتىر. باعدارلاما ەكى باعىتتان تۇرادى: اتا-انالارعا ارنالعان اقپاراتتىق سەسسيا جانە پەدياترلار, نەوناتولوگتار مەن فۋنكتسيونالدىق دياگنوستيكا دارىگەرلەرىنە ارنالعان ەحوكارديوگرافيا بويىنشا شەبەرلىك ساباعىنان تۇرادى. ساراپشىلار اتا-انالارعا جۇكتىلىك كەزىندە قانداي تەكسەرۋلەر ماڭىزدى ەكەنىن جانە وپەراتسيادان كەيىن بالانى قالاي كۇتۋ كەرەكتىگىن تۇسىندىرەدى.
مۇرات زاۋىروۆتىڭ ايتۋىنشا, باعدارلامانىڭ ماقساتى – قوعام مەن دارىگەرلەر اراسىنداعى سەنىم مەن ءوزارا بايلانىس دەڭگەيىن ارتتىرۋ.
ء«بىز بالالارعا كومەك كورسەتۋدەگى اتا-انالاردىڭ حاباردارلىعى مەن دارىگەرلەر دەر كەزىندە دياگنوز قويىپ, كومەكتەسە الاتىن مادەنيەتتى قالىپتاستىرعىمىز كەلەدى. بۇل تەك مەديتسينا ەمەس, بۇكىل قوعامنىڭ ورتاق ءىسى», دەيدى.
سوندىقتان ماماندار ەرتە دياگنوستيكا – بالانىڭ ءومىرى مەن دەنساۋلىعىن ساقتاپ قالۋدىڭ باستى مۇمكىندىگى ەكەنىن العا تارتتى.