19 قازان ەلىمىزدە قۇتقارۋشىلار كۇنى اتالىپ وتەدى. بۇل ەل تىنىشتىعىن كۇزەتىپ, وت پەن سۋدىڭ ورتاسىندا جۇرگەن جانداردىڭ ەڭبەگىنە تاعزىم ەتەر كۇن. ولار كۇن سايىن ءوز ءومىرىن قاۋىپكە تىگىپ, وزگەنىڭ ءومىرىن اراشالاپ قالادى. وسىنداي ەرلەردىڭ ءبىرى – سولتۇستىك قازاقستان وبلىسى توتەنشە جاعدايلار دەپارتامەنتىنىڭ پەتروپاۆل قالاسى توتەنشە جاعدايلار باسقارماسىنا قاراستى №2 مامانداندىرىلعان ءورت ءسوندىرۋ ءبولىمىنىڭ كومانديرى رۋسلان رۇستەم ۇلى كوبەتاەۆ. كۇنى كەشە ول راقىمجان قوشقارباەۆ اتىنداعى III دارەجەلى «ايبىن» وردەنىمەن ماراپاتتالدى, دەپ جازادى Egemen.kz.
رۋسلان كوبەتاەۆ قىزمەت جولىن 2014 جىلى استانا قالاسىندا باستاعان. ول العاشقى كۇننەن-اق بۇل سالانىڭ جاي ماماندىق ەمەس, ومىرلىك مىندەت ەكەنىن تۇسىنگەن. كەيىن سولتۇستىك قازاقستان وبلىسىنا اۋىسىپ, پەتروپاۆلداعى ءورت ءسوندىرۋ بولىمىندە كومانديرلىك قىزمەتكە تاعايىندالدى. وسى ون جىلدان استام ۋاقىت ىشىندە تالاي قاۋىپ-قاتەردىڭ ورتاسىندا ءجۇرىپ, تالاي ادامنىڭ ءومىرىن ساقتاپ قالعان.
ء«بىزدىڭ قىزمەت – سەكۋندپەن ولشەنەتىن جۇمىس. ءورت كەزىندە ءاربىر شەشىمنىڭ ارتىندا ادام تاعدىرى تۇر. سول سەبەپتى كوماندير رەتىندە باستى مىندەتىم – دۇرىس شەشىم قابىلداۋ جانە ارىپتەستەرگە ناقتى باعىت بەرۋ. قيىن جاعدايدا سالقىنقاندىلىق پەن تاجىريبە عانا ەمەس, رۋحاني دايىندىق تا قاجەت», دەيدى رۋسلان رۇستەم ۇلى.
3 تامىز كۇنى پەتروپاۆل قالاسىندا بولعان ءورت وقيعاسى ونىڭ ەسىندە ەرەكشە ساقتالعان. ءتۇن ورتاسىندا كوپقاباتتى تۇرعىن ءۇيدىڭ ءبىر پاتەرىنەن ءورت شىعىپ, قويۋ ءتۇتىن مەن جالىن بۇكىل قاباتتى شارپىعان. وقيعا ورنىنا جەتكەن رۋسلان كوبەتاەۆ جاعدايدىڭ كۇردەلى ەكەنىن بىردەن اڭعارعان.
«گاز-تۇتىننەن قورعاۋ زۆەنوسىن دەرەۋ ىسكە قوستىق. ءورتتىڭ تارالۋ باعىتىن انىقتاپ, ءوزىم توپتى باستاپ پاتەرلەرگە كىردىم. ءتۇتىن قويۋ, تەمپەراتۋرا جوعارى, بىراق ادامداردىڭ ءۇنى ەستىلەدى. سول باعىتقا ۇمتىلدىق. ەڭ باستىسى – ساسپاۋدى ۇيرەنۋ. ءار سەكۋند ساناۋلى ەدى. ونداي ساتتە ويىڭدا ءبىر عانا نارسە – ادامداردى قۇتقارۋ. ءورت دەگەن تەك جالىن ەمەس, ول ادامنىڭ ءۇمىتى سىنالاتىن ءسات», دەپ ەسكە الدى ول.
رۋسلان كوبەتاەۆ ءۇشىن بۇل ماراپات جەكە ەڭبەكتىڭ ەمەس, بۇكىل ۇجىمنىڭ ورتاق جەتىستىگى.
«ارينە, كەز كەلگەن ازامات ءۇشىن پرەزيدەنتتىڭ قولىنان ماراپات الۋ – ۇلكەن ابىروي. بىراق بۇل مەنىڭ عانا ەمەس, مەنىمەن بىرگە كۇن سايىن ورتكە كىرىپ, ادامداردى قۇتقارىپ جۇرگەن جىگىتتەردىڭ ەڭبەگىنىڭ باعالانۋى. بۇل وردەن بىزگە ودان ءارى دە سەنىمدى اقتاپ, جۇمىستى جوعارى جاۋاپكەرشىلىكپەن اتقارۋ مىندەتىن جۇكتەيدى», دەيدى كەيىپكەرىمىز.
قۇتقارۋشى ماماندىعى سىرت كوزگە باتىرلىقتىڭ سيمۆولى بولىپ كورىنگەنىمەن, ونىڭ ارتىندا تىنىمسىز ەڭبەك پەن تەمىردەي ءتارتىپ جاتىر. رۋسلان سەكىلدى جالىنمەن بەتپە-بەت كەلىپ, ءۇمىت وتىن وشىرمەيتىن جاندار باردا, ەل جۇرەگى تىنىش سوعادى.