تۇركىستان وبلىسىندا رۋحاني كەلىسىم كۇنىنە وراي ءوزارا سىيلاستىق پەن بىرلىكتى ناسيحاتتاۋ ماقساتىنداعى ءتۇرلى ءىس-شارالار وتكىزىلىپ جاتىر.
وبلىستىق ءدىن ىستەرى باسقارماسىنىڭ ۇيىمداستىرۋىمەن وتكەن «ويلان, تاپ!» ينتەللەكتۋالدى ويىنى سول يگى ىستەردىڭ ءبىرى. سايىس ءۇش كەزەڭنەن تۇردى. سۇراقتار ەلىمىزدىڭ جانە تۇركىستان وبلىسىنىڭ تاريحى, ادەبيەت, ۇلتتىق سالت-داستۇرلەر, ءدىن سالاسىنداعى زاڭنامالار جانە سپورت تاقىرىپتارىن قامتىدى. قاتىسۋشىلاردىڭ ءبىلىمى مەن تاپقىرلىعىن كاسىبي قازىلار القاسى باعالادى. تارتىسقا تولى وتكەن ينتەللەكتۋالدى سايىستىڭ جەڭىمپازى – وتىرار اۋدانىنىڭ قۇراما كومانداسى 500 000 تەڭگەنى يەلەندى. جۇلدەلى ءىى ورىندى سايرام اۋدانى جانە ء«دىن ماسەلەلەرىن زەرتتەۋ ورتالىعى» كمم كوماندالارى السا, ءۇشىنشى ورىن ورداباسى جانە تولەبي اۋداندارىنا بۇيىردى. سونىمەن قاتار كوماندالار اراسىندا ۇلتتىق ناقىشتاعى كيىم ۇلگىلەرىمەن ەرەكشەلەنگەن جەتىساي, سارىاعاش, سوزاق اۋداندارىنىڭ جانە «بالابي قاري» قۇران جاتتاۋ ورتالىعىنىڭ قۇرامالارى «كورەرمەن كوزايىمى» اتالىمىنا قارجىلاي سىيلىقتارعا يە بولدى.
جۇلدەگەرلەر مەن جەڭىمپازداردى ماراپاتتاعان وبلىس اكىمىنىڭ ورىنباسارى ەرتاي التاەۆ ينتەللەكتۋالدى سايىس قاتىسۋشىلاردىڭ زياتكەرلىك الەۋەتىن ارتتىرىپ, شىعارماشىلىق ويلاۋ قابىلەتىن دامىتىپ قانا قويماي, ولاردىڭ وتانسۇيگىشتىك سەزىمىن, ۇجىمدىق رۋحىن ارتتىراتىنىن اتاپ ءوتتى.
سونداي-اق تۇركىستاندا رۋحاني كەلىسىم كۇنىنە وراي ءدىني كونفەسسيالار اراسىنداعى ءوزارا تۇسىنىستىك پەن دوستىقتى نىعايتۋ, سالاماتتى ءومىر سالتىن ناسيحاتتاۋ ماقساتىندا سپارتاكيادا ءوتتى. «استانا» سپورت كەشەنىندەگى سايىسقا وبلىس اۋماعىنداعى ءدىني كونفەسسيا وكىلدەرى جانە ءدىن سالاسىنداعى مەكەمە قىزمەتكەرلەرىنەن قۇرالعان 8 كوماندا قاتىستى. جارىس جەڭىمپازدارىنا ارنايى ديپلومدار مەن سىيلىقتار تابىستالدى.
تۇركىستان وبلىسى