15–19 قازان كۇندەرى گەرمانيانىڭ فرانكفۋرت قالاسىندا وتەتىن «Frankfurter Buchmesse 2025» حالىقارالىق كىتاپ جارمەڭكەسىندە قازاقستان ءوز ۇلتتىق ستەندىن اشىپ, وتاندىق باسپالاردىڭ جاڭا تۋىندىلارىن الەم جۇرتشىلىعىنا تانىستىردى, دەپ جازادى Egemen.kz.
15–19 قازان كۇندەرى گەرمانيانىڭ فرانكفۋرت قالاسىندا وتەتىن «Frankfurter Buchmesse 2025» حالىقارالىق كىتاپ جارمەڭكەسىندە قازاقستان ءوز ۇلتتىق ستەندىن اشىپ, وتاندىق باسپالاردىڭ جاڭا تۋىندىلارىن الەم جۇرتشىلىعىنا تانىستىردى.
بيىل 77-رەت ۇيىمداستىرىلىپ وتىرعان ايگىلى فرانكفۋرت كىتاپ جارمەڭكەسىنىڭ قۇرمەتتى قوناعى – فيليپپين مەملەكەتى. الەمنىڭ تۇكپىر-تۇكپىرىنەن كەلگەن باسپاگەرلەر مەن جازۋشىلار باس قوسقان ءىرى مادەني شاراعا قازاقستاننان 30-دان استام دەلەگاتسيا قاتىسۋدا. ولاردىڭ قاتارىندا ەلىمىزدىڭ جەتەكشى باسپالارى – «مەكتەپ», «الماتىكىتاپ», «اتامۇرا», «ARMAN-PV», «Steppe & World Publishing», «ەۆەرو», «Kazformoms», «اmalBooks» جانە باسقا دا وتاندىق باسپا وكىلدەرى بار.
قازاقستاندىق ستەند قر مادەنيەت جانە اقپارات مينيسترلىگىنىڭ قولداۋىمەن ۇيىمداستىرىلىپ, حالىقارالىق دەڭگەيدەگى باسپالارمەن ارىپتەستىك بايلانىستاردى دامىتۋعا جول اشتى. بيىل كورمەگە 350-گە جۋىق قازاقستاندىق كىتاپ قويىلىپ, ولاردىڭ ىشىندە كوركەم ادەبيەت, عىلىمي جانە بالالارعا ارنالعان جاڭا باسىلىمدار تانىستىرىلدى.
كورمەنىڭ باستى ماقساتى – كىتاپ ساۋداسىن حالىقارالىق دەڭگەيدە ىلگەرىلەتۋ, باسپا نارىعىن دامىتۋ جانە جازۋشىلار مەن باسپاگەرلەردىڭ ءوزارا بايلانىسىن كۇشەيتۋ. قازاقستان ستەندىنە كەلگەن شەتەلدىك قوناقتار ەلىمىزدىڭ ادەبي الەمىمەن, زاماناۋي باسپا ءىسىنىڭ دامۋىمەن جانە ۇلتتىق مادەنيەتپەن كەڭىنەن تانىسۋ مۇمكىندىگىنە يە بولدى.
جاڭا تۋىندىلاردىڭ تۇساۋكەسەرى
كورمە اياسىندا بىرقاتار ماڭىزدى تۇساۋكەسەرلەر وتكىزىلدى. اتاپ ايتقاندا, نەمىس جازۋشىسى Anja Tuckermann قاتىسقان جەتى تىلگە اۋدارىلعان «ابايدىڭ قارا سوزدەرى. ۇرپاققا ۇلاعات» كىتابىنىڭ تانىستىرىلىمى ۇلكەن قىزىعۋشىلىق تۋدىردى.
سونىمەن قاتار, «مەنىڭ قازاقستانىم» سەرياسىنداعى « ۇلى تۇلعالارعا» ارنالعان «شوقان. شىعىستىڭ جارىق جۇلدىزى», ورازالى سابدەننىڭ «تۇركى, الەم وركەنيەتى, قازاقستان جانە بولاشاق» («ەۆەرو» باسپاسى), «مەكتەپ» باسپاسىنان شىققان «سيمانتيكا. ءويۋ-ورنەكتەر» ء(ۇش تىلدە), «Arman-PV» باسپاسىنىڭ «كوشپەندىلەر ويىندارى / Nomad Games / يگرى كوچەۆنيكوۆ», «اتامۇرا» باسپاسىنىڭ «قازاقستان – قىزعالداقتار وتانى» اتتى ەڭبەكتەرى مەن «Steppe & World Publishing» باسپاسىنان جارىق كورگەن ىرىسبەك دابەيدىڭ «قوڭىز», ءۇمىت جۇبانىشەۆانىڭ «شاڭىراقتىڭ يەسىن ىزدەيمىن» كىتاپتارىنىڭ تۇساۋكەسەرلەرى بولماق.
سونداي-اق, اقىن دۇيسەنالى الىماقىننىڭ «امەريكا اشقان قازاقتار» اتتى ەڭبەگىنىڭ تانىستىرىلىمىندا گەرمانيالىق جۋرناليست جانە اۋدارماشى Artur Weigandt قاتىسادى.
«اmalBooks» باسپاسىنىڭ ديرەكتورى باقىتجان بۇقاربايدىڭ مودەراتارلىعىمەن «قازاقستاندىق اۆتورلاردىڭ ەڭبەكتەرىن شەت تىلدەرىنە اۋدارۋ ماسەلەلەرى جانە اۋدارما ىسىندەگى مۇمكىندىكتەر مەن كەدەرگىلەر» تاقىرىبى تالقىلانادى.
ال قازاق ادەبيەتىنىڭ كلاسسيكاسى سانالاتىن مىرجاقىپ دۋلاتوۆتىڭ «باقىتسىز جامال» رومانىنىڭ تانىستىرىلىمى ەرەكشە فورماتتا وتكىزىلمەك.
حالىقارالىق ارىپتەستىككە جول
قازاقستان رەسپۋبليكاسىنىڭ ماينداعى فرانكفۋرت قالاسىنداعى باس كونسۋلى ۇلتتىق ستەندكە ارنايى كەلىپ, وتاندىق دەلەگاتسياعا قولداۋ ءبىلدىردى.
كورمە بارىسىندا كانادا, قىتاي, تۇركيا, ازەربايجان, دانيا, گەرمانيا, سينگاپۋر جانە باسقا ەلدەردىڭ باسپاگەرلەرى قازاقستاندىق ارىپتەستەرىمەن كەزدەسۋ وتكىزىپ, ىنتىماقتاستىقتىڭ جاڭا باعىتتارىن تالقىلادى.
سونىمەن قاتار, قازاقستاندىق وكىلدەر وزگە مەملەكەتتەردىڭ ستەندتەرىنە بارىپ, باسپا ءىسى سالاسىنداعى تاجىريبە الماسۋ مەن سەرىكتەستىك مۇمكىندىكتەرىن قاراستىردى.