ەلورداداعى ارحيتەكتۋرا مەن قۇرىلىس سالاسىنىڭ دامۋىنا زور ۇلەس قوسقان بەلگىلى ساۋلەتشى, دارىندى باسشى, كەڭ جۇرەكتى ابزال ازامات, مەملەكەتتىك سىيلىقتىڭ لاۋرەاتى باير فاردەن ۇلى دوسماعامبەتوۆ 71-دەن اسقان شاعىندا دۇنيەدەن وزدى. بۇل – مارقۇمنىڭ وتباسى-اۋلەتى, استانا جۇرتشىلىعى, اكىمدىگى مەن ءماسليحاتى ءۇشىن اۋىر قايعى.
باير فاردەن ۇلى 1954 جىلى الماتى قالاسىندا ومىرگە كەلىپ, قازىرگى اباي وبلىسىنداعى باقتى اۋىلىندا شەكاراشى وفيتسەر وتباسىندا ءوستى. ول بارلىق سانالى ءومىرىن وتاندىق ساۋلەت سالاسىنا ارنادى. ماسكەۋدەگى ساۋلەت ينستيتۋتىن تامامداعاننان كەيىن «قازگورقۇرىلىسجوبا» جوبالاۋ ينستيتۋتىندا قاراپايىم ساۋلەتشىدەن باستاپ, شەبەرحانا باسشىسىنا دەيىنگى جولدان ءوتتى. بۇدان سوڭ قازاق كسر قۇرىلىس ىستەرى جونىندەگى مەملەكەتتىك كوميتەتىنىڭ ساۋلەت جانە قالا قۇرىلىسى جونىندەگى باس باسقارماسىنىڭ باسشىسى بولدى. ەلىمىز تاۋەلسىزدىك العاننان كەيىن ساۋلەت جانە قۇرىلىس جونىندەگى مەملەكەتتىك كوميتەت توراعاسىنىڭ ءبىرىنشى ورىنباسارى, قۇرىلىس, تۇرعىن ءۇي جانە اۋماقتاردى دامىتۋ ءمينيسترىنىڭ ءبىرىنشى ورىنباسارى جانە توتەنشە جاعدايلار جونىندەگى مەملەكەتتىك كوميتەتى توراعاسىنىڭ ورىنباسارى سەكىلدى جاۋاپتى قىزمەتتەردى اتقاردى.
باير فاردەن ۇلى ەل استاناسىن الماتىدان ارقا تورىنە كوشىرۋگە ايرىقشا ۇلەس قوستى. 1995 جىلى ول جوعارى جانە ورتالىق مەملەكەتتىك ورگاندارىن اقمولا قالاسىنا كوشىرۋ جونىندەگى مەملەكەتتىك كوميسسيا توراعاسىنىڭ ورىنباسارى, كەيىن ءبىرىنشى ورىنباسارى – كوميسسيا اپپاراتىنىڭ باسشىسى لاۋازىمىنا تاعايىندالىپ, وسى جاۋاپتى قىزمەتتى 1998 جىلعا دەيىن اتقاردى. ال 1998–2000 جىلدارى – استانانىڭ باس ساۋلەتشىسى, ەلوردالىق ساۋلەت جانە قالا قۇرىلىسى دەپارتامەنتىنىڭ ديرەكتورى بولدى. ونىڭ باسشىلىعىمەن جاس استانا باس جوسپارىنىڭ ۇزدىك يدەياسىنا ارنالعان حالىقارالىق ساۋلەت كونكۋرسى ۇيىمداستىرىلدى. سونداي-اق ونىڭ ۇسىنىسىمەن «استاناگەنپلان» جوبالاۋ ينستيتۋتىن قۇرۋ تۋرالى شەشىم قابىلدادى. باير فاردەن ۇلى بۇل ينستيتۋتتى 2000 جىلدان باستاپ, 2015 جىلعا دەيىن باسقاردى. ول كەز كەلگەن جۇمىستى شىعارماشىلىق كوزقاراسپەن اتقارىپ ۇلكەن بەدەلگە يە بولدى. بىلىكتى ساۋلەتشىنىڭ تىكەلەي قاتىسۋىمەن استانانىڭ باس جوسپارى مەن تۇزەتۋى, ەلوردانى جانە ونىڭ اگلومەراتسيا ايماعىن دامىتۋعا ارنالعان قالا قۇرىلىسى قۇجاتتاماسى ازىرلەندى. ەلوردانىڭ كەلبەتىن ايشىقتايتىن, كورىكتى نىساندارعا اينالعان بىرنەشە ساۋلەت بايقاۋى وتكىزىلدى. مەملەكەت تاراپىنان ەڭبەگى دە جوعارى باعالاندى. «ەرەن ەڭبەگى ءۇشىن» مەدالى مەن «قۇرمەت» وردەنىن الدى. 2008 جىلى «دوڭگەلەك الاڭ» ساۋلەتتىك كەشەنى ءۇشىن مەملەكەتتىك سىيلىقتىڭ لاۋرەاتى اتاندى.
شىن مانىندە, باير فاردەن ۇلىنىڭ ەسىمى ەلىمىزدەگى ساۋلەت ونەرى مەن جاس ەلوردانىڭ قالىپتاسۋ تاريحىنا التىن ارىپپەن جازىلدى. ايتۋلى ازامات وتباسىندا سۇيىكتى جارى مەن بالالارىنا قامقور وتاعاسى بولدى. ونىڭ ىزگى نيەتتى, زيالى, ادامگەرشىلىگى مول قاسيەتىن ۇمىتپايمىز. باير فاردەن ۇلىنىڭ ماڭداي تەرى, ساۋلەت سالاسىنداعى كاسىبي باستامالارى ەلوردا عيماراتتارى مەن داڭعىلدارىندا ساۋلەتشىنىڭ وزىنە ورناتىلعان ەسكەرتكىشتەي اسقاقتايتىنى ءشۇباسىز.
تابيعات زەينۇلقابدەن,
استانا قالاسى ءماسليحاتىنىڭ توراعاسى