الماتىداعى جەدەل مەديتسينالىق كومەك كورسەتۋ اۋرۋحاناسىندا تسيفرلىق كەلىسىمدەر جۇيەسىن ەنگىزۋ جوباسى باستالدى. بيىل تامىز ايىندا اۋرۋحانا مەن «TrustMe IT» كومپانياسى جاڭا تسيفرلىق شەشىم ەنگىزۋ جونىندە مەموراندۋمعا قول قويىپ, قاناتقاقتى جوبا رەسمي تۇردە ىسكە قوسىلدى.
بۇعان دەيىن مەديتسينالىق كومەككە كەلىسىم بەرۋ نەمەسە باس تارتۋ راسىمدەرى تەك قاعاز تۇرىندە جۇرگىزىلىپ كەلگەن. قۇجاتتاردى مۇراعاتقا جيناقتاپ, كۇن سايىن جۇزدەگەن بەتتى سكانەرلەۋ جانە بازاعا قولمەن ەنگىزۋ قىزمەتكەرلەردىڭ ۋاقىتىن الىپ, قاعاز شىعىنىن ارتتىراتىن. جاڭا جۇيە بۇل ماسەلەلەردى شەشۋگە باعىتتالعان. ەندى كەلىسىمدەر SMS ارقىلى راسىمدەلەدى. بارلىق كەلىسىمدەر مەن باس تارتۋلار اۆتوماتتى تۇردە جۇيەدە جاسالىپ, ەلەكتروندى فورماتتا ساقتالادى. قازىردە تەك باس تارتۋلار عانا قولمەن ەنگىزىلسە, بولاشاقتا كەلىسىمدەر دە تولىق اۆتوماتتاندىرىلىپ, بىرىڭعاي دەرەكتەر قورى قالىپتاسادى. «TrustMe IT» كومپانياسىنىڭ نەگىزىن قالاۋشى شىڭعىس داۋلەتباەۆ جاڭا جوبانىڭ مەديتسيناداعى تسيفرلىق ۇدەرىستەردى ىلگەرىلەتۋدە ەرەكشە ماڭىزى بار ەكەنىن اتاپ ءوتتى. ونىڭ ايتۋىنشا, زاماناۋي جۇيە قاعازباستىلىقتى ازايتىپ قانا قويماي, اقپاراتتىڭ ساپالى ءارى جەدەل وڭدەلۋىن قامتاماسىز ەتەدى.
قاناتقاقتى جوبا ءساتتى جۇزەگە اسقان جاعدايدا, جۇيە اۋرۋحانا قىزمەتىمەن تولىق ينتەگراتسيالانىپ, كەلىسىمدەردى بىردەن ىشكى جۇيە ارقىلى راسىمدەۋگە مۇمكىندىك بەرەدى.
سونداي-اق جاساندى ينتەللەكت تەحنولوگيالارىن ەنگىزۋ جوسپارلانىپ وتىر. بۇل مەديتسينالىق كارتالاردى تولتىرۋدى جەدەلدەتىپ, دەرەكتەردەگى قاتەلىك تاۋەكەلىن ازايتادى. جۇيەنى كادر ءبولىمى, بۋحگالتەريا, اكىمشىلىك سەكىلدى وزگە قۇرىلىمداردا دا قولدانۋ مۇمكىندىگى قاراستىرىلعان.
جوبا مەديتسينالىق قىزمەتكەرلەردىڭ جۇمىسىن جەڭىلدەتىپ قانا قويماي, پاتسيەنتتەردىڭ ءومىر ساپاسىن جاقسارتۋعا ىقپال ەتەدى. الداعى ۋاقىتتا مۇنداي تاجىريبە ەلىمىزدىڭ وزگە وڭىرلەرىندە دە ەنگىزىلىپ, دەنساۋلىق ساقتاۋ سالاسىن تسيفرلاندىرۋ قارقىنىن جەدەلدەتەدى.
اسحات قويشىعارا