ارقالىق اۋرۋحاناسىندا 61 جاستاعى قالا تۇرعىنى تاسبولات ساقىپوۆ وتا ۇستىندە جان تاپسىردى, دەپ جازادى Egemen.kz.
وپەراتسيانى وبلىستىق اۋرۋحانانىڭ نەيروحيرۋرگيا ءبولىمىنىڭ مەڭگەرۋشىسى ەۆگەني كوۆالەۆ جاساعان. مارقۇمنىڭ بالالارى «دارىگەر ماس كۇيىندە وتا جاسادى, ايتپەسە, اكەمىز اۋرۋحاناعا ءوز اياعىمەن بارعان, جاعدايى سونشالىقتى مۇشكىل ەمەس ەدى» دەپ وتىر.
«دارىگەردىڭ اياعىنان ارەڭ تۇرعانىن, ءتىپتى كابينەتتە ۇيىقتاپ قالعانىن مەدبيكەلەر دە كورگەن. نەيروحيرۋرگتىڭ ءوزى دە تەرگەۋشىلەرگە ەكى بوكال سىرا ىشكەنىن مويىنداعان. اكەم باسى قاتتى اۋىرىپ اۋرۋحاناعا كەلگەن سوڭ, ماماندار كومپتەرلىك توموگرافياعا ءتۇسىرىپ, قان تامىرىندا ىسىك بار ەكەنىن, وتا كۇردەلى ەمەس ەكەنىن ايتقان», دەيدى مارقۇمنىڭ قىزى اسەل وسپانوۆا.
اسەلدىڭ سوزىنشە, ءساتسىز وتادان سوڭ دارىگەر سىرتقا شىعىپ, ۋايىمداپ كۇتىپ وتىرعان مارقۇمنىڭ تۋىستارىنا قايعىلى جاعدايدى ەستىرتۋدىڭ ورنىنا, بوي تاسالاپ كەتىپ قالماق بولعان.
«باۋىرىم وتا بولمەسىنە كىرىپ, وپەراتسيا ۇستەلىندە بەتى جابىق جاتقان اكەمدى كورەدى دە, اۋرۋحانادان شىعىپ ۇلگەرمەگەن ەۆگەني كوۆالەۆتى ۇستاپ قالادى. دەرەۋ پوليتسياعا حابارلاسادى. كەيىن الكوتەستەر ارقىلى دارىگەردىڭ ماس ەكەنى انىقتالدى», دەيدى اسەل.
دارىگەردىڭ ساۋ ەمەس ەكەنى الەۋمەتتىك جەلىدە تاراعان ۆيدەودان دا انىق كورىنىپ تۇر. مارقۇمنىڭ ۇلى ءتۇسىرىپ العان ۆيدەودا شايقالاقتاپ ازەر تۇرعان ەۆگەني كوۆالەۆ قويىلعان سۇراققا دۇرىس جاۋاپ بەرە المايدى. ساۋ ادام مەن ماس ادامنىڭ ديالوگى بىلايشا ءوربيدى.
– نەگە ماسسىڭ؟
– نەگە؟ سۇراق. نەگە؟
– بۇل قالاي بولدى؟ جاعدايدى نەگە تۇسىندىرمەيسىز؟
– ...
– بۇل نە؟ ماس كۇيدە كەلدىڭىز بە؟
– جوق
– قالاي, جوق. مەن كورىپ تۇرمىن عوي ساۋ ەمەس ەكەنىڭدى.
– ...
ۆيدەودا مارقۇمنىڭ ۇلى دارىگەر مىنگەن كولىكتىڭ ەسىگىن اشىپ, ىشىنەن پاكەت تولى سىرانىڭ بوس بوتەلكەلەرىن الىپ شىعادى.
ءارى قاراي بەينەجازبادا پوليتسيانىڭ قاتىسۋىمەن ءجۇرىپ جاتقان مەديتسينالىق كۋالاندىرۋ ۇدەرىسى كورسەتىلەدى. بۇل جەردە دە الكوتەستەردىڭ دارىگەردىڭ قانىنداعى الكوگولدىڭ 3 پروميللەدەن جوعارى ەكەنىن كورسەتىپ تۇر.
وبلىستىق پوليتسيا دەپارتامەنتىنىڭ مالىمەتىنشە, قايعىلى وقيعاعا قاتىستى قىلمىستىق ءىس قوزعالعان.
«ارقالىق قالاسىندا وتا جاساۋ كەزىندە ناۋقاستىڭ قايتىس بولۋ فاكتىسى بويىنشا پوليتسيا سوتقا دەيىنگى تەرگەۋدى باستادى. قازىر بولعان وقيعانىڭ بارلىق ءمان-جايىن انىقتاۋعا باعىتتالعان قاجەتتى تەرگەۋ امالدارى جۇرگىزىلىپ جاتىر. قر قپك-ءنىڭ 201-بابىنا سايكەس وزگە اقپارات جاريا ەتىلمەيدى» دەيدى وبلىستىق پد-نىڭ ءباسپاسوز حاتشىسى كارينا بازارباەۆا.
كەشە وبلىستىق جەدەل جاردەم ورتالىعىندا وسى وقيعاعا قاتىستى ءباسپاسوز جيىنى وتكەن. بريفينگكە دەنساۋلىق ساقتاۋ باسقارماسىنىڭ باسشىسى كەلمەدى. جۋرناليستەردىڭ الدىندا وبلىستىق جەدەل جاردەم ستانتسياسىنىڭ باس دارىگەرى مىندەتىن اتقارۋشى ولەگ مەلەشكو مەن مەديتسينا قىزمەتكەرلەرى كاسىپوداعى جەرگىلىكتى فيليالىنىڭ ءتورايىمى تاتيانا بۋلگاتسەۆيچ سويلەدى.
«دوكتور قوستانايدان ارقالىققا رەانيموبيلمەن جەتكىزىلدى. سول جەردە وتا جاسادى. وكىنىشكە قاراي وتا ءساتسىز اياقتالدى. ناۋقاس جان تاپسىردى. مارقۇمنىڭ نەدەن كوز جۇمعانىن سوت ساراپتاماسى انىقتايدى», دەدى ولەگ مەلەشكو.
دارىگەرلەر ناۋقاستىڭ جاعدايى اۋىر بولعانىن تۇسىندىرۋگە تىرىستى. الايدا قۇقىقتىق باعانى قۇزىرلى ورىندار بەرەتىنىن ايتىپ, نەيروحيرۋرگتىڭ ماس كۇيىندە وتا جاساعانى تۋرالى جاق اشقان جوق.
قازىر ەلدى دۇرلىكتىرگەن قايعىلى وقيعانىنىڭ ءمان-جايىن پوليتسيا تەكسەرىپ جاتىر. سونىمەن قاتار, وبلىستىق دەنساۋلىق ساقتاۋ دەپارتامەنتى دە ىشكى قىزمەتتىك تەكسەرۋ جۇمىسىن باستادى.
قوستاناي وبلىسى