اقتوبە وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى تەمىر اۋدانى قوپا اۋىلىندا بولعان قىلمىسقا قاتىستى ۇكىم شىعاردى, دەپ جازادى Egemen.kz.
وقيعا وتكەن جىلدىڭ 2 قىركۇيەگىندە ءتۇن ىشىندە ورىن العان. قوپا اۋىلى مەكتەبىنىڭ ءبىر توپ 10,11 سىنىپ وقۋشىسى 9-سىنىپتا وقيتىنداردى «قۇرمەتسىزدىك تانىتتى» دەگەن جەلەۋمەن شاقىرىپ الىپ, ۇرىپ سوعۋ سالدارىنان 9-سىنىپ وقۋشىسى قايتىس بولدى. قىلمىسقا قاتىسى بار 18 ءجاسوسپىرىم ۇستالىپ, تەرگەۋگە الىنعانىمەن, التى ءجاسوسپىرىمنىڭ ءىسى عانا سوتقا جەتتى.
مەملەكەتتىك ايىپتاۋشى سوتتالۋشىلارعا 6 جىل 8 اي باس بوستاندىقتارىنان ايىرۋ جازاسىن تاعايىنداۋدى سۇرادى. قك-ءنىڭ ءۇش بابىمەن جازاعا تارتىلعان سوتتالۋشىلاردىڭ بارلىعى دا كامەلەتكە تولماعاندار. ءىستى قاراۋ كەزىندە ءۇش سوتتالۋشىنىڭ قىلمىستى ۇيىمداستىرۋدا اسا بەلسەندىلىك تانىتقانى انىقتالدى. «ب» مەن «ت» قىلمىستى الدىن الا ۇيىمداستىرىپ, دەنساۋلىققا قاساقانا زيان كەلتىرىپ, ابايسىزدا جابىرلەنۋشىنىڭ ولىمىنە سوقتىرعانى جانە الدىن الا ءسوز بايلاسۋ ارقىلى توپتاسا بىرنەشە رەت بۇزاقىلىق جاساعانى ءۇشىن 6 جىل جانە 8 اي مەرزىمگە باس بوستاندىقتارىنان ايىرۋ جازاسىنا كەسىلدى.
ال, «م» دەنساۋلىققا قاساقانا زيان كەلتىرىپ, ابايسىزدا جابىرلەنۋشىنىڭ ولىمىنە اكەلدى دەگەن ايىپپەن 6 جىل 8 ايعا سوتتالدى. توپ بولىپ توبەلەسكە قاتىسقان تاعى ءۇش جاسوسپىرىمگە 1 جىل باس بوستاندىقتارىنان ايىرۋ جازاسى تاعايىندالدى.
وعان قوسا, باستى ايىپكەر «ت»-نىڭ زاڭدى وكىلىنەن قايتىس بولعان بالانىڭ وتباسىنا 5 ميلليون تەڭگە مورالدىق زالال ءوندىرىلدى. سوت شەشىمى ءالى زاڭدى كۇشىنە ەنگەن جوق.
اقتوبە وبلىسى