ناپاقا تابۋعا نيەت بولسا, كاسىپتىڭ كوزى كوپ ەكەن. نۇرگۇل ءۇيىنىڭ اياداي عانا بولمەسىنە ميكروجاسىل وسكىن ءوسىرىپ, كاسىپ قىلىپ وتىر. جايقالعان جاسىل جەلەگىن اپتا سايىن مەيرامحانالارعا وتكىزىپ, پايدا تابادى. ال تاعامعا قولداناتىن بۇل وسىمدىكتەردىڭ اعزاعا پايداسى ادەتتەگى كوكونىستەرگە قاراعاندا ون ەسە كوپ.
ءۇيىنىڭ تورگى بولمەسىنە ارنايى سورەلەر جاساپ, 24 ساعات قوسىلىپ تۇراتىن جارىق تارتقان. بولمە تەمپەراتۋراسى 25 گرادۋس, ال ىلعالدىلىعى 60–70 پايىز. ءار سورەدە ميكرو جاسىل وسىمدىكتىڭ سان ءتۇرى قۇلپىرىپ تۇر. جەتىلگەن جەلەكتى تۇتىنۋشىلارعا ءوزى جەتكىزىپ بەرەدى. وسىمدىكتىڭ ءبىرى كادىمگى اس بۇرشاق ىسپەتتى بولسا, ەندى ءبىرى – قىزىلشا جاپىراقتارىنىڭ شاعىن ءتۇرى. ءدامى دە سول كوكونىستەردەن اينىمايدى. پايداسى ۇشان-تەڭىز. سونى اسپازدار ءتۇرلى تاعامعا قوسىپ ساندەيدى, ارلەيدى. مەيرامحانالار عانا ەمەس, جەكەلەگەن تۇرعىندار تاراپىنان دا سۇرانىس بار. وسىناۋ ەشكىمنىڭ ويىنا كەلە قويمايتىن كاسىپ ءتۇرىن نۇرگۇل الپىسبايقىزى قايدان تاۋىپ العان دەيمىز عوي.
«وسىدان ءتورت جىل بۇرىن ۇيدە بالامەن وتىرىپ, ينتەرنەتتەن كاسىپ تۇرلەرىن ىزدەدىم. بالا-شاعاعا قاراۋىما كەدەرگى بولمايتىنداي جۇمىس كەرەك بولدى. ءسويتىپ ءجۇرىپ, ميكرو جاسىل وسىمدىكتەرگە قىزىقتىم. اۋەلدە ءبارى ءساتتى بولا قويمادى. دەگەنمەن زەرتتەپ ءجۇرىپ, ءادىس-ءتاسىلىن تاپتىم. قازىر ۇزدىكسىز ءوسىرىپ, ساتىپ وتىرمىن», دەيدى نۇرگۇل الپىسبايقىزى.
ايتۋىنشا, وسكىندەرگە ەرەكشە كۇتىم قاجەت ەمەس. بار بولعانى بولمە تەمپەراتۋراسىن رەتتەپ, ۋاقتىلى سۋىن قۇيىپ وتىرۋ كەرەك. البەتتە, تۇقىمدى دۇرىس تاڭداعان ءجون. تۇقىمدى كۇنتىزبەمەن سەبەدى. ول دا وسكىننىڭ جايقالىپ وسۋىنە اسەرى بار. ءبىر قىزىعى, تۇقىم توپىراققا ەمەس, ارنايى ماتا ىسپەتتى ماتەريالعا ەگىلەدى. سودان كەيىن جۇيەلى تۇردە سۋارىلادى, قۇنار بەرەتىندەي زاتتار قوسىلادى. كەيبىر ميكرو جاسىل وسكىندەرگە سۋدان گورى تىڭايتقىش كوبىرەك قاجەت. كوپتەگەن تاجىريبە جاساپ, ەرىنبەي ەڭبەكتەنگەننىڭ ارقاسىندا اياداي عانا بولمەدە جىل ون ەكى اي جاسىل جەلەك جايقالىپ تۇرادى. ميكرو جاسىلداردى العاش 80-جىلدارى اقش-تاعى تاماقتانۋ ورىندارىندا تۇتىنا باستاعان. 90-جىلداردىڭ ورتاسىنان باستاپ الەمگە تاراعان. ءار جاسىل وسكىن تاعامعا ەرەكشە ءدام مەن حوش ءيىس بەرەدى. اسپازداردىڭ تاماعى سونىمەن دە ءدامدى.
ء«بىز نۇرگۇلمەن باياعىدان جۇمىس ىستەيمىز. ونىڭ ميكرو جاسىل ونىمدەرى ساپالى. وسىمدىكتەر ءبىر جاعىنان ادەمى كورىنەدى. تاعاممەن تارتقاندا داستارقاندى جايناتىپ جىبەرەدى. ەكىنشىدەن, پايدالى», دەيدى سۋشەف اسپاز ەلدار عافۋروۆ.
عالىمدار دا ميكرو جاسىلداعى دارۋمەننىڭ كادىمگى كوكونىستەرگە قاراعاندا 10 ەسە كوپتىگىن انىقتاعان. سيرەك كاسىپ تۇرىمەن اينالىساتىن نۇرگۇل الپىسبايقىزى الداعى ۋاقىتتا كاسىبىن كەڭەيتۋدى دە كوزدەيدى. ەڭ باستىسى, سۇرانىس بار.
وسكەمەن