الەمدىك وپەرا ساحناسىنىڭ تورىندە اتاقتى كومپوزيتور دجۋزەپپە ۆەرديدىڭ «ريگولەتتو» قويىلىمى ەڭ ۇزدىكتەردىڭ قاتارىندا. «ريگولەتتو» الەمدىك رەپەرتۋاردىڭ ەڭ تانىمال وپەرالارىنىڭ قاتارىنا جاتادى. «استانا وپەرا» تەاترى قازان ايىنىڭ 3-نەن باستاپ قاتارىنان ءۇش كۇن وسى الەمدىك دەڭگەيدەگى عاجايىپ تۋىندىنى ەلوردالىقتارعا, قالا قوناقتارىنىڭ نازارىنا رانتسۋز رەجيسسەرى ارنو بەرناردىڭ جاڭا قويىلىمىندا جانە قويۋشى ديريجەر قازاقستاننىڭ ەڭبەك سىڭىرگەن قايراتكەرى, قر مەملەكەتتىك سىيلىعىنىڭ لاۋرەاتى الان بورىباەۆتىڭ باسشىلىعىمەن ۇسىنىپ وتىر.
كەشە تەاتردا «ريگولەتتو» پرەمەراسىنىڭ وتۋىنە وراي ونەر ۇجىمىنىڭ جۋرناليستەرمەن ارنايى ءباسپاسوز ءماسليحاتى ءوتتى.
ەلوردادا وتكەن پرەمەرانىڭ باستى ەرەكشەلىگى نەدە؟ وعان دۇنيەجۇزىلىك ونەر ساحنالارىندا جارقىراي تانىلعان مايتالمانداردىڭ قاتىسۋى ايرىقشا ەتە تۇسەدى. ونىڭ ءبىرى – وڭتۇستىك كورەيالىق باريتون چجۋنحەك فەليكس پاكتىڭ قاتىسۋى.
ءباسپاسوز ءماسليحاتى كەزىندە سپيكەرلەر وسى وپەرانىڭ پاتشا كوڭىلدى كورەرمەننىڭ جۇرەگىنە جەتۋى ءۇشىن وزگە تۋىندىلارعا ۇقسامايتىن ەرەكشەلىگىن, قاراما-قايشىلىققا تولى قىزىقتى سيۋجەتىن, پارتيالاردى ورىنداعان ونەر مايتالماندارىنىڭ ۇلكەن ساحناداعى وراسان ەڭبەگىن ايرىقشا اتاپ ءوتتى.
«ريگولەتتوداي» سيرەك, كۇردەلى وپەرانىڭ «استانا وپەرا» ساحناسىندا قويىلۋى – ونەر كەڭىستىگىندەگى ەلەۋلى وقيعانىڭ ءبىرى. مۋزىكاسى مەن قويىلىمى, جارقىن كوستيۋمدەرى ۇيلەسكەن, شىن مانىندە ساحنا جۇلدىزدارى جارقىراعان وپەرالىق شىعارما – تەك تەاتردىڭ عانا ەمەس, الەمدىك مادەنيەتتىڭ ەڭ ەلەۋلى وقيعالارىنىڭ ءبىرى ەدىم, سوندىقتان دا استانالىق كورەرمەندەردى, قوناقتارىمىزدى وسىنداي باقىتتى ساتكە بولەگىمىز كەلدى, تاعى ءبىر كەرەمەت تۋىندىمىزبەن قۋانتقىمىز كەلدى», دەدى «استانا وپەرا» ديرەكتورى الەكساندر سوۆوستيانوۆ.
«دجۋزەپپە ۆەردي شىعارماداعى ءاربىر پارتيتۋرانى, ءاربىر نوتانى قانىمەن, جانىمەن جازعان تاڭعاجايىپ ماەسترو. ونىڭ شىرقالعان ءاربىر اۋەنى ادامزاتتى تۇڭعيىق, تەرەڭ ىزدەنىسكە, بيىك ماقساتتارعا جەتەلەيدى. شىعارما سونىسىمەن دە قۇندى», دەيدى قويۋشى ديريجەر, «استانا وپەرانىڭ» باس ديريجەرى الان بورىباەۆ.
قويۋشى رەجيسسەر ارنو بەرناردىڭ ايتۋىنشا, «ەكى ساعاتتان استام ۋاقىتقا سوزىلاتىن شىعارمانى تىڭداعان, كورەرمەنى بولعان ادامنىڭ جان دۇنيەسىندە وزگەرىستەر بولىپ, تىلسىم كۇي كەشەدى, ونەردىڭ قۇدىرەتتىلىگى سونداي, تاماعىڭا اششى وكسىك تىرەلەدى» دەپ اقتارىلدى.
دەكوراتسيالار بويىنشا سۋرەتشى ريككاردو ماسيروني, كوستيۋمدەر بويىنشا سۋرەتشى اننا ۆەردە وپەرانى قويۋ بارىسىندا كەزدەسكەن شىعارماشىلىق پروتسەسس تۋرالى قىزىقتى ايتىپ ءوتتى.
پرەمەرانىڭ الدىن الا كورسەتىلىمى كەزىندە ريگولەتتو پارتياسىن ورىنداۋشى, «استانا وپەرا» تەاترىنداعى وپەرا ترۋپپاسىنىڭ ديرەكتورى تالعات مۇساباەۆ پەن گەرتسوگ پارتياسىن ورىنداۋشى, وپەرا ءسوليسى جان ءتاپيننىڭ ساحناداعى جارقىن بەينەسىنە, بيىك ونەردىڭ سالتاناتىنا تاعى دا كۋا بولىپ, الەمدىك شەدەۆر دۇنيەنىڭ قازاق ساحناسىندا ۇيلەسىم تاپقانىنا قۋانىپ قايتتىق. بەكزات ونەردىڭ ومىرشەڭدىگىن سەزىندىك.
گۇلشات ساپارقىزى.