ءماجىلىس دەپۋتاتتارى شىعىس قازاقستاندا ءتۋريزمدى دامىتۋ ءۇشىن ۇكىمەتكە جول كارتاسىن قابىلداۋدى ۇسىندى

دەپۋتاتتاردىڭ مالىمەتىنشە, وسكەمەننەن باستالىپ ۇلان, سامار اۋداندارىن قامتيتىن, بۇقتىرما سۋ قويماسىنداعى جاڭا كوپىر ارقىلى كۇرشىم, تارباعاتاي, زايسان اۋداندارىنا وتەتىن, مارقاكول – «ەسكى اۆستريالىق» جول – قاتونقاراعاي باعىتى قالىپتاسقان.

«2025 جىلى وسى مارشرۋتتى تاڭداعان تۋريستەر سانى بىلتىرمەن سالىستىرعاندا بەس ەسە ارتتى», - دەپ كورسەتىلگەن ساۋالدا.

سونىمەن بىرگە ءتۋريزمدى تەجەيتىن ماسەلەلەر اتالدى: ساپالى قوناق ءۇي, تاماقتانۋ جانە سەرۆيس ينفراقۇرىلىمىنىڭ جەتكىلىكسىزدىگى; قوقىس پەن ءورت قاۋىپسىزدىگىنە قاتىستى ەكولوگيالىق تاۋەكەلدەر; قاتون-قاراعاي ۇلتتىق پاركى مەن مارقاكول قورىعىن ساقتاۋ قاجەتتىلىگى.

«جەرگىلىكتى حالىق ۇيلەرىن جالعا بەرىپ, قىمىز, بال, قۇرت سەكىلدى ونىمدەردى ساتىپ تابىس تاپقانىمەن, بۇل الەۋەتتى تولىق اشۋعا جەتكىلىكسىز», - دەلىنگەن قۇجاتتا.

دەپۋتاتتار ۇسىنعان نەگىزگى شارالار:

شقو بويىنشا تۋريستىك باعىتتاردى دامىتۋعا ارنالعان جول كارتاسىن قابىلداۋ; 2026–2028 جىلدارعا ارنالعان رەسپۋبليكالىق بيۋدجەتكە جاڭا اۋە باعىتتارىن سۋبسيديالاۋ ماسەلەسىن ەنگىزۋ; زايسان – ءۇرىمشى حالىقارالىق باعىتىن اشۋ مۇمكىندىگىن زەردەلەۋ; مارقاكول مەن زايساندا شەتەلدىك تۋريستەرگە ارنالعان دەمالىس ورىندارى مەن ويىن-ساۋىق نىساندارى (ونىڭ ىشىندە كازينولار) جوبالارىن قولداۋ – ينۆەستيتسيا تارتۋ ءۇشىن; گلۋبوكوە اۋدانى مەن ريددەر قالاسىندا تاۋ شاڭعىسى كۋرورتتارىن سالۋدى «بايتەرەك» ۇبح» اق قارجىلاندىرۋىمەن قامتاماسىز ەتۋ.

ساۋالدا پرەزيدەنت تاپسىرماسىنا سايكەس زايسان جانە قاتونقاراعاي اۋداندارىندا جاڭا اۋەجايلار سالىنىپ جاتقانىن, بۇل تۋريستىك اعىندى ۇلعايتاتىنى اتاپ وتىلگەن.

«ريددەر تاۋ كلاستەرى ستراتەگيالىق ماڭىزى بار جوبا رەتىندە جاڭا جۇمىس ورىندارىن اشىپ, سالىق تۇسىمدەرىن ارتتىرىپ, حالىقارالىق دەڭگەيدەگى كەشەندى تۋريستىك ءونىم قالىپتاستىرادى», - دەپ تۇيىندەلگەن.

دەپۋتاتتار كونستيتۋتسيالىق زاڭعا سايكەس اتالعان دەپۋتاتتىق ساۋالعا زاڭدا بەلگىلەنگەن مەرزىمدە جازباشا جاۋاپ بەرۋدى سۇرايدى.