بىلتىر «ورلەۋ» بىلىكتىلىكتى ارتتىرۋ ۇلتتىق ورتالىعىندا 80 مىڭنان استام پەداگوگ تەگىن كۋرستاردان وتكەن. ونىڭ ىشىندە 57,8 پايىزى – اۋىل مەكتەپتەرىنىڭ مۇعالىمدەرى, دەپ جازادى Egemen.kz.
وقۋ-اعارتۋ مينيسترلىگىنىڭ مالىمەتىنشە, جىل باسىنان بەرى مۇنداي كۋرستاردا 39 مىڭنان استام پەداگوگ بىلىكتىلىگىن شىڭداعان. جەلتوقسان ايىنا دەيىن تاعى 30 مىڭنان استام مۇعالىمدى قامتۋ جوسپارلانعان.
باعدارلامالار باستاۋىش سىنىپتان باستاپ, قوعامدىق-گۋمانيتارلىق جانە جاراتىلىستانۋ-ماتەماتيكالىق باعىتتاعى ءپان مۇعالىمدەرىن قامتيدى. سونداي-اق تىڭداۋشىلاردىڭ ءبىر بولىگى ينكليۋزيۆتى ءبىلىم بەرۋ, كوشباسشىلىق, يننوۆاتسيالار مەن تسيفرلىق قۇزىرەتتىلىككە قاتىستى ءبىلىمىن جەتىلدىرەدى.
ولاردىڭ ىشىندە 80 ساعاتتىق 43 كۋرس وفلاين فورماتتا وتسە, 2 كۋرس ونلاين فورماتتا ۇيىمداستىرىلعان. اسىرەسە «ينكليۋزيۆتى ءبىلىم بەرۋدى ىسكە اسىراتىن پەداگوگتەردىڭ بازالىق قۇزىرەتتەرىن قالىپتاستىرۋ», «قارجىلىق ساۋاتتىلىق نەگىزدەرى», «وقۋ ۇدەرىسى جانە جي: گەنەراتيۆتى مودەلدەر مەن پرومت-ينجينيرينگ ونەرى» جانە كەلەشەك مەكتەپتەرىنىڭ پەداگوگتەرىنە ارنالعان كۋرستارعا باسىمدىق بەرىلەدى.