قورعانىس ءمينيسترى, اۆياتسيا گەنەرال-لەيتەنانتى داۋرەن قوسانوۆ اسكەري وقۋ ورىندارىنىڭ پروفەسسورلىق-وقىتۋشىلىق قۇرامى مەن كۋرسانتتارعا ارناپ ءسوز سويلەپ, جاڭا وقۋ جىلىنىڭ باستالۋىمەن قۇتتىقتادى. ول اسكەري ءبىلىم بەرۋدىڭ ماڭىزدىلىعىنا توقتالىپ, سالانىڭ الدىندا تۇرعان باستى مىندەتتەردى اتاپ ءوتتى, دەپ حابارلايدى Egemen.kz.
مينيستر مەملەكەت باسشىسى تامىز كونفەرەنتسياسىندا ايتقان ءبىلىم مەن تاربيەنىڭ ۇلتتىڭ باسەكەگە قابىلەتتىلىگىن ايقىندايتىن شەشۋشى فاكتور ەكەندىگى جونىندەگى تۇجىرىمداردى ەسكە سالىپ, بۇل قاعيداتتىڭ اسكەري ءبىلىم بەرۋ سالاسىنا دا تولىقتاي قاتىستى ەكەنىن جەتكىزدى.
«تامىز كونفەرەنتسياسىندا مەملەكەت باسشىسى ءبىلىم بەرۋ مەن تاربيەنىڭ ۇلتتىڭ باسەكەگە قابىلەتتىلىگىن ايقىندايتىن باستى نەگىز ەكەنىنە نازار اۋداردى. بۇل تۇجىرىمدار تىكەلەي اسكەري ءبىلىم بەرۋ سالاسىنا دا قاتىستى, سەبەبى مۇندا ارميانىڭ زياتكەرلىك جانە كاسىبي الەۋەتى قالىپتاسادى», دەدى ول.
داۋرەن قوسانوۆ اسكەري مامانداردى دايارلاۋدىڭ ساپاسىن ارتتىرۋعا باعىتتالعان جاڭاشىلدىقتاردى اتادى. ماسەلەن, ۇلتتىق قورعانىس ۋنيۆەرسيتەتىندە جۇمىلدىرۋ دايىندىعى فاكۋلتەتى اشىلدى, «جاس ۇلان» مەكتەپتەرى اسكەري كوللەدجدەر مارتەبەسىنە يە بولدى, ال جاۋىنگەرلىك دايارلىق جوسپارى وقۋ ۇدەرىسىمەن ينتەگراتسيالاندى.
«قازىرگى جاعدايدا اقپاراتتىق-كوممۋنيكاتسيالىق تەحنولوگيالار, راديوەلەكتروندىق كۇرەس, جاساندى ينتەللەكت پەن جوعارى ءونىمدى ەسەپتەۋ جۇيەلەرىنىڭ ماڭىزى ايتارلىقتاي ارتىپ وتىر. بۇل جۇيەلەر ۇرىس ارەكەتتەرىن مودەلدەۋگە جانە شەشىم قابىلداۋعا ينتەللەكتۋالدى قولداۋ كورسەتۋگە مۇمكىندىك بەرەدى. مۇنىڭ ءبارى اسكەري كادرلاردى دايارلاۋعا جاڭا تالاپتار قويادى. ولار ەڭ كۇردەلى تەحنيكا مەن زاماناۋي قارۋ-جاراقتى قولدانا الۋى, گيبريدتى قاۋىپ-قاتەر جاعدايىندا ارەكەت ەتىپ, وزگەرمەلى احۋالعا تەز بەيىمدەلۋى ءتيىس», دەدى مينيستر.
ۆەدومستۆو باسشىسى وقۋ باعدارلامالارىن جاڭارتۋ, ماماندىقتاردىڭ اياسىن كەڭەيتۋ, ءبىلىم الۋشىلاردىڭ اكادەميالىق ۇتقىرلىعىن ارتتىرۋ, ولاردى عىلىمي-زەرتتەۋ جۇمىستارىنا, قولدانبالى جوبالارعا جانە حالىقارالىق سەرىكتەستىككە بەلسەندى تارتۋ مىندەتتەرىن جۇكتەدى. سونداي-اق اسكەري وقۋ ورىندارىن زاماناۋي قارۋ-جاراقپەن, بروندى تەحنيكامەن, اسكەري اۆتوكولىكتەرمەن, ارنايى جابدىقتارمەن, بارلاۋ جانە بايلانىس جۇيەلەرىمەن قامتاماسىز ەتۋ, سونىمەن بىرگە وق اتۋ جانە جۇرگىزۋگە ارنالعان ترەناجەرلاردى ەنگىزۋ تاپسىرىلدى.
ءسوز سوڭىندا داۋرەن قوسانوۆ اسكەري پەداگوگتاردىڭ تاباندى ەڭبەگىنىڭ ارقاسىندا قويىلعان مىندەتتەر ورىندالىپ, ەلدىڭ اسكەري قاۋىپسىزدىگى مەن ەگەمەندىگىن نىعايتۋعا ەلەۋلى ۇلەس قوسىلاتىنىنا سەنىم ءبىلدىردى.