تاراز قالاسىندا جاسوسپىرىمدەر اراسىندا 1 قىركۇيەك كۇنى جانجال بولىپ, سالدارىنان 14 جاستاعى وقۋشى پىشاق جاراقاتىنان كوز جۇمدى. كۇدىكتى رەتىندە تاۋ-كەن تەحنولوگيالىق كوللەدجىنىڭ ستۋدەنتى ۇستالدى, دەپ حابارلايدى Egemen.kz كتك تەلەارناسىنا سىلتەمە جاساپ.
قايعىلى جاعداي 1 قىركۇيەكتە كەشكى ۋاقىتتا تارازداعى اۋلالاردىڭ بىرىندە بولدى. قانسىراپ جاتقان ءجاسوسپىرىمدى كەزدەيسوق ءوتىپ بارا جاتقان ادامدار بايقاپ قالعان. ولاردىڭ ايتۋىنشا, جەدەل جاردەم شاقىرىلعان ساتتە بالا ءالى ءتىرى بولعان, الايدا كەلگەن دارىگەرلەر ونىڭ ومىردەن وتكەنىن راستادى.
كۇدىكتى سول كۇنى ۇستالدى. ول – 15 جاستاعى تاۋ-كەن تەحنولوگيالىق كوللەدجىنىڭ ستۋدەنتى. ەكى ءجاسوسپىرىم دە تاڭەرتەڭ مەكتەپتەگى سالتاناتتى جيىنعا قاتىسقان, ال كەشكە ارالارىندا باستالعان جانجال توبەلەسكە ۇلاسىپ, سوڭى پىشاقتاسۋعا دەيىن بارعان.
قازىر بۇل وقيعا بويىنشا قىلمىستىق ءىس قوزعالدى.
«جەدەل-ىزدەستىرۋ شارالارى ناتيجەسىندە كامەلەتكە تولماعان كۇدىكتى وقيعا ءىزى سۋىماي ۇستالىپ, ۋاقىتشا ۇستاۋ يزولياتورىنا قامالدى. قازىرگى تاڭدا بولعان جايتتىڭ بارلىق ءمان-جايىن انىقتاۋعا باعىتتالعان تەرگەۋ امالدارى جۇرگىزىلىپ جاتىر», دەپ حابارلادى پوليتسيا.