الماتى وبلىسىنىڭ ەڭبەكشىقازاق اۋدانىنا قاراستى تولە بي اۋىلىندا 450 ورىندىق جاڭا مەكتەپ اشىلدى, دەپ حابارلايدى Egemen.kz.
ونىڭ قۇرىلىسى قارجىلاندىرۋ تاپشىلىعىنا بايلانىستى ءتورت جىلعا جۋىق ۋاقىتقا سوزىلىپ كەتكەن ەدى. وسى ۋاقىت ارالىعىندا 600-دەن استام وقۋشى تار ءارى جارتى عاسىر بۇرىن سالىنعان ەسكى عيماراتتا ءبىلىم الۋعا ءماجبۇر بولدى. جوبانىڭ اياقتالۋىنا «AMANAT» پارتياسىنىڭ تىكەلەي ارالاستى. پارتيا باستاماسىمەن وبلىستىق بيۋدجەتتەن قوسىمشا قاراجات ءبولىنىپ, فراكتسيا دەپۋتاتتارى قۇرىلىس بارىسىن تۇراقتى باقىلاۋدا ۇستادى.
پارتيانىڭ وبلىستىق فيليالىنىڭ اتقارۋشى حاتشىسى ەرلان جاقىپوۆتىڭ ايتۋىنشا, باستاپقىدا نىساندى اياقتاۋعا مەملەكەتكە زاڭسىز شىعارىلىپ, كەيىن قايتارىلعان اكتيۆتەر ەسەبىنەن 1,5 ملرد تەڭگە بولىنگەن. الايدا بۇل سوما جەتكىلىكسىز بولدى.
«وسى كەزدە جاعدايعا «AMANAT» پارتياسى ارالاستى. پارتيانىڭ باستاماسىمەن وبلىستىق بيۋدجەتتەن قوسىمشا قاراجات ءبولىندى. دەپۋتاتتار ءار كەزەڭدە جۇمىس ساپاسىن باقىلاپ وتىردى. سونىڭ ناتيجەسىندە اۋىل تۇرعىندارىنىڭ كوپتەن كۇتكەن ارمانى ورىندالىپ, جاڭا مەكتەپ ءوز ەسىگىن اشتى», – دەدى ول.
بۇدان بولەك, جاڭا وقۋ جىلىندا الماتى وبلىسىندا تاعى سەگىز مەكتەپ پايدالانۋعا بەرىلدى. ولاردىڭ بارلىعى ۇلتتىق «كەلەشەك مەكتەپتەرى» جوباسى اياسىندا سالىنعان. ايرىقشا اتاپ وتەرلىگى – ىلە اۋدانىنا قاراستى مۇحامەدجان تۇيمەباەۆ اۋىلىندا اشىلعان 900 ورىندىق مەكتەپ. بۇل نىسان «AMANAT» پارتياسىنىڭ سايلاۋالدى باعدارلاماسى اياسىندا بوي كوتەرىپ, پارتيانىڭ تىكەلەي باقىلاۋىندا بولدى.
«پارتيا اپاتتى جانە ءۇش اۋىسىمدى مەكتەپتەردى جويۋدى مىندەت ەتىپ قويدى. ەكى جىل بۇرىن وبلىستا مۇنداي 52 مەكتەپ بولعان. بۇگىنگى مەكتەپتىڭ اشىلۋى – سول ۋادەنىڭ ورىندالعانىنىڭ دالەلى. ول جول كارتاسىندا بەلگىلەنگەن 63 نىساننىڭ ءبىرى. مۇندا STEM زەرتحاناسى, روبوتوتەحنيكا كابينەتى, سپورت جانە شىعارماشىلىق سىنىپتار جابدىقتالعان», – دەپ اتاپ ءوتتى وبلىستىق فيليالدىڭ اتقارۋشى حاتشىسىنىڭ ورىنباسارى اسلان كوبەنتاەۆ.
ايتا كەتەيىك, ءبىلىم بەرۋ ينفراقۇرىلىمىن دامىتۋ – «AMANAT» پارتياسىنىڭ باستى باسىمدىقتارىنىڭ ءبىرى. جاڭا مەكتەپتەردىڭ اشىلۋى ءۇش اۋىسىمدى وقىتۋدى ازايتىپ قانا قويماي, مۇعالىمدەر ءۇشىن تۇراقتى جۇمىس ورىندارىن كوبەيتۋگە, سونداي-اق مىڭداعان وقۋشىعا زاماناۋي ءارى قاۋىپسىز جاعدايدا ءبىلىم الۋعا مۇمكىندىك بەرەدى.بۇگىن وبلىسىمىزداعى 491 مەكتەپ ەسىگىن ايقارا اشىپ, 362 مىڭنان اسا وقۋشى وقۋ جىلىن باستادى. وسى وقۋ جىلىندا تەك 1 سىنىپتاردىڭ وزىنە 35 500 بالا قابىلدانىپ وتىر. بۇل بارلىق بالا سانىنىڭ 10% پايىزىن قۇرايدى جانە وڭىردە بالا سانىنىڭ قارقىندى ءوسىپ وتىرعاندىعىن كورسەتەدى.
الماتى ولبلىسى.