مەملەكەتىمىزدىڭ مەرەيلى مەرەكەسى قازاقستان رەسپۋبليكاسى كونستيتۋتسياسىنىڭ 30 جىلدىعىنا وراي تالعار اۋداندىق ورتالىق اۋرۋحاناسىندا «اشىق ەسىك كۇنى» ءوتتى, دەپ جازادى Egemen.kz.
ءىس-شاراعا «A-Class Medical» باسقارۋشى كومپانياسىنىڭ وكىلدەرى جانە اۋرۋحانا ديرەكتورى مايرا ابدىحالىققىزى قاتىسىپ, تۇرعىنداردىڭ دەنىنىڭ ساۋلىعى – ەلىمىزدىڭ باستى بايلىعى ەكەنىن ايرىقشا اتادى. وسى ماقساتتا اۋدانداعى مەديتسينا سالاسىن جەتىلدىرىپ, حالىققا قولجەتىمدىلىگىن ارتتىرۋ جولىندا بىرقاتار وڭ قادامدار جاسالىپ جاتقاندىعىن دا تىلگە تيەك ەتتى.
«تالعار اۋداندىق ورتالىق اۋرۋحاناسى ءاردايىم دالەلدى مەديتسينا قاعيداتتارىنا جانە عىلىمي نەگىزدەلگەن حاتتامالارعا ساي زاماناۋي كلينيكالىق تاسىلدەردى ەنگىزە وتىرا, بەكىتىلگەن تۇرعىنداردىڭ دەنساۋلىعىن نىعايتۋعا ەرەكشە كوڭىل بولۋدە. بۇگىنگى «اشىق ەسىك كۇنى» اۋدان تۇرعىندارى مەن مەديتسينالىق ۇيىم اراسىنداعى اشىق ديالوگتى نىعايتا وتىرىپ, ازاماتتاردىڭ دەنساۋلىعىن تەكسەرىپ, مەديتسينالىق كەڭەستەر بەرىلۋدە», – دەدى مەكەمە باسشىسى.
ءىس-شارا اياسىندا بەكىتىلگەن تۇرعىندار الدىن الا جازىلۋسىز جانە جولداماسىز اۋرۋحانانىڭ جەتەكشى ماماندارىنىڭ قابىلداۋىنا كەلىپ, تەكسەرىلىپ, كەڭەس الدى. ولاردى اۋرۋحانانىڭ بىلىكتى دارىگەرلەرى, نەۆروپاتولوگ ەرلان بەكتەمىروۆ, كارديولوگ ديانا دوسباەۆا, تەراپەۆت ۇلان سۇلتانمۇراتوۆ جانە ەندوكرينولوگ روزا دوسمۇحانوۆا قابىلدادى.
«قازىر دارىگەرگە بارۋ ءۇشىن الدىن الا جازىلىپ, اپتالاپ اۋىرەلەنىپ جۇرەتىنىمىز جاسىرىن ەمەس. كونستيتۋتسيا كۇنىنە وراي ۇيىمداستىرىلعان بۇل مەرەكەلىك شارا بارىسىندا مەديتسينا قىزمەتكەرلەرىنىڭ تۇرعىندارعا ەرەكشە كوڭىل بولگەنىن سەزىندىك. ءوزىم كارديولوگتان كەڭەس العانىما قۋانىپ وتىرمىن», – دەيدى قالا تۇرعىنى جاقسىلىقوۆا.
دارىگەرلەردىڭ قابىلداۋىنا كەلگەن ءاربىر تۇرعىن مامانداردان وزدەرىن قىزىقتىرعان سۇراقتارىنا جاۋاپ الىپ, اۋرۋلاردىڭ الدىن الۋ مەن ەمدەۋ بويىنشا ۇسىنىستار الدى. ماسەلەن, سالاۋاتتى ءومىر سالتى قاعيداتتارىن ءتۇسىندىرىلىپ, جۇرەك-قان تامىرلارى جانە ەندوكرينولوگيالىق اۋرۋلاردىڭ, ينسۋلت پەن ينفاركتتىڭ الدىن الۋ جانە ەرتە انىقتاۋ بويىنشا كەڭەستەر بەرىلىپ, حالىقتى امبۋلاتورلىق جانە ستاتسيونارلىق كومەك الۋ مۇمكىندىكتەرى جونىندە قۇلاعداندىردى.
الماتى وبلىسى.