ۇكىمەتتە ۆيتسە-پرەمەر – ۇلتتىق ەكونوميكا ءمينيسترى سەرىك جۇمانعاريننىڭ جەتەكشىلىگىمەن ۇلتتىق اۋىل شارۋاشىلىعى ساناعىنىڭ بارىسى تالقىلاندى, دەپ حابارلايدى Egemen.kz.
ۇلتتىق ستاتيستيكا بيۋروسىنىڭ دەرەگىنشە, 2025 جىلعى 28 تامىزداعى جاعداي بويىنشا Sanaq.gov.kz پورتالىندا 236,9 مىڭ اۋىل شارۋاشىلىعى قۇرىلىمى تىركەلگەن. سونىڭ ىشىندە 226,2 مىڭى نەمەسە جوسپارداعى كورسەتكىشتىڭ 85,3%-ى ساۋالنامانى تولتىرعان. جالپى اۋىل شارۋاشىلىعى وندىرۋشىلەرىنىڭ 75,4%-ى ەسەپ بەرسە, ولاردىڭ 82,2%-ى ناقتى جۇمىس ىستەپ تۇرعان سۋبەكتىلەر.بيۋرو باسشىسى ماقسات تۇرلىباەۆ ساناققا بارلىق شارۋاشىلىق ەنگىزىلگەن, ونىڭ ىشىندە سوڭعى جىلدارى ەش مالىمەت بەرمەگەندەرى دە بار ەكەندىگىن اتاپ ءوتتى. مۇنداي كاسىپورىنداردىڭ سانى 13 مىڭنان اسادى (بارلىق ءتىزىمنىڭ 4,5%-ى). ال جەكە قوسالقى شارۋاشىلىقتاردان 277,9 مىڭ ءۇي شارۋاشىلىعى ساۋالناماعا قاتىسىپ, بۇل جوسپارلانعان مەجەدەن 1,5 ەسە كوپ كورسەتكىشكە جەتكەن. ەڭ بەلسەندى وڭىرلەر قاتارىندا قوستاناي, سولتۇستىك قازاقستان جانە باتىس قازاقستان وبلىستارى بار. كەرىسىنشە, تۇركىستان مەن قاراعاندى وبلىستارىندا جانە رەسپۋبليكالىق ماڭىزى بار قالالاردا قاتىسۋ دەڭگەيى تومەن. وسىعان بايلانىستى ۇيىمداسقان شارۋاشىلىقتار ءۇشىن ونلاين كەزەڭدى 20 قىركۇيەككە دەيىن ۇزارتۋ ۇسىنىلعان. بۇل تولىق قامتۋدى قامتاماسىز ەتىپ, وفلاين كەزەڭگە زيان تيگىزبەۋ ءۇشىن جاسالىپ وتىر.ايتا كەتەيىك, ونلاين كەزەڭگە شارۋالار قىزىعۋشىلىق تانىتقانىن جانە بىرقاتار وڭىرلەردە ستاتيستيكتەردىڭ اكىمدىكتەرمەن ءتيىمدى بايلانىس ورناتا العانىن كورسەتكەن.
«20 قىركۇيەكتەن باستاپ ەڭ جاۋاپتى كەزەڭ – دالالىق ساناق باستالادى. ول ءبىر ايعا سوزىلىپ, 20 قازاندا اياقتالادى. بۇل ۋاقىتتا ينتەرۆيۋەرلەر شارۋاشىلىقتارعا بارىپ, جەكە سۇحبات ارقىلى دەرەكتەر جينايدى. وسى كەزەڭدە سەنىمدى قارىم-قاتىناس ورناتىپ, بارىنشا ناقتى اقپارات الۋ قاجەت», دەدى ماقسات تۇرلىباەۆ.
جيىن سوڭىندا سەرىك جۇمانعارين ونلاين كەزەڭدەگى شارۋالاردىڭ جوعارى بەلسەندىلىگىنە ريزاشىلىق ءبىلدىردى.
ء«بارىمىز اۋىل شارۋاشىلىعىنداعى ستاتيستيكانى رەتكە كەلتىرۋدىڭ قانشالىقتى ماڭىزدى ەكەنىن جاقسى تۇسىنەمىز. بۇعان مەملەكەتتىك قولداۋ شارالارى, سالانىڭ دامۋ جوسپارلارى, سالىق تۇسىمدەرىنىڭ بولجامى جانە باسقا دا ماسەلەلەر بايلانىستى. ونلاين كەزەڭدە شارۋالاردىڭ جوعارى بەلسەندىلىگى قۋانتتى. دالالىق جۇمىستا دا جاقسى ناتيجەلەر كۇتەمىن», دەدى ۆيتسە-پرەمەر.