استانا قالاسىندا 2025-2026 وقۋ جىلىندا ءبىرىنشى سىنىپقا شامامەن 31 مىڭ وقۋشى قابىلدانادى. بۇل تۋرالى ەلوردانىڭ كوممۋنيكاتسيالار قىزمەتىندەگى بريفينگتە قالالىق ءبىلىم باسقارماسى باسشىسىنىڭ ورىنباسارى مارجانگۇل قايىرباەۆا مالىمدەدى, دەپ جازادى Egemen.kz.
ونىڭ ايتۋىنشا, قازىردىڭ وزىندە 30 057 بالا 1-سىنىپقا تىركەلگەن. سونىڭ ىشىندە 26 666 وقۋشى مەملەكەتتىك مەكتەپتەرگە, ال 3 190-ى جەكەمەنشىك مەكتەپتەرگە قابىلدانعان.
قالادا بيىل 206 ورتا ءبىلىم بەرۋ ۇيىمى جۇمىس ىستەيدى: 122-ءسى مەملەكەتتىك, 77-ءسى جەكەمەنشىك, 7-ەۋى رەسپۋبليكالىق.
بيىل ەلوردالىق مەكتەپتەردە بارلىعى 310 مىڭنان استام وقۋشى وقيدى دەپ جوسپارلانىپ وتىر. وتكەن وقۋ جىلىندا بۇل كورسەتكىش 288 مىڭ بولعان, ونىڭ ىشىندە 28 مىڭعا جۋىق بالا ءبىرىنشى سىنىپقا بارعان.
الەۋمەتتىك قولداۋ شارالارى دا جالعاسىپ جاتىر. 30 قىركۇيەككە دەيىن الەۋمەتتىك وسال ساناتتاعى وتباسىلاردىڭ بالالارىنا مەكتەپ كەرەك-جاراقتارىنا 46 مىڭ تەڭگە كولەمىندە كومەك بەرىلەدى. 2 تامىزدان باستالعان «مەكتەپكە جول» اكتسياسى اياسىندا 8,5 مىڭنان استام بالا دەمەۋشىلەر ەسەبىنەن قاجەتتى زاتتارمەن قامتاماسىز ەتىلدى.