اتا زاڭىمىزدىڭ 30 جىلدىعىنا وراي, قوناەۆ قالاسىنىڭ تۇرعىندارى زور قۋانىشقا بولەندى. مەرەيلى مەرەكە قارساڭىندا 42 وتباسى باسپانالى بولدى. كىلتتەردى قالا اكىمى اسحات بەردىحانوۆ سالتاناتتى تۇردە تابىستادى, دەپ جازادى Egemen.kz.
الداعى جىلدارى قالا بويىنشا جالپى اۋدانى 161 مىڭ شارشى مەتردى قۇرايتىن 72 تۇرعىن ءۇي سالۋ كوزدەلگەن. قۇرىلىستىڭ قارقىندى جۇرگىزىلۋىنىڭ ناتيجەسىندە پاتەر كەزەگى جىلدام قوزعالىپ, تۇرعىندار باسپانالى بولماق. قوناەۆ قالاسى – وبلىس ورتالىعى بولعالى بەرى 193 وتباسى قونىستويىن تويلاعان. بيىلدىڭ وزىندە 108 پاتەر كىلتى سالتاناتتى تۇردە تابىستالعانىن اتاپ وتكەن قالا اكىمى, جىل سوڭىنا دەيىن جۇزەگە اساتىن شارالاردى دا تىلگە تيەك ەتتى.
«بۇگىنگى كۇنى «قارلىعاش» شاعىناۋدانىندا 18 جەر ءۇي كوپبالالى وتباسىلار, جەتىم, الەۋمەتتىك وسال توپتاعى ازاماتتارعا بەرىلىپ وتىر. بۇدان بولەك, 24 پاتەر كىلتى تابىستالۋدا. جالپى سانى 42 وتباسى باسپانالى بولدى. جىل سوڭىنا قاراي ءۇيلى بولاتىن وتباسىلاردىڭ سانى 200-دەن اسادى دەپ كۇتىلۋدە. كونستيتۋتسيا كۇنىمەن قاتار كەلگەن قۋانىشتارىڭىز قۇتتى بولسىن!», – دەدى شاھار باسشىسى.
بۇل كۇنى شاڭىراقتارى شاتتىققا تولعان تۇرعىنداردىڭ ءبىرى – دينارا تاۋىرباەۆا بولدى. مۇگەدەكتىگى بار ەكى بالانى تاربيەلەپ وتىرعان ول, كەزەكتە تۇرعانىنا بىرنەشە جىلدىڭ ءجۇزى بولعانىن العا تارتتى.
«قۋانىشىم قوينىما سىيماي تۇر. ءار وتباسىعا وسىنداي جاقسىلىق بۇيىرسىن. ەل ىرگەسى مىعىم بولسىن. اتا زاڭىمىزدىڭ 30 جىلدىعى قارساڭىندا قۋانىشقا كەنەلتكەن ەل ازاماتتارىنا العىسىمىز شەكسىز», – دەدى ول.
ايتا كەتەيىك, بەرىلگەن جەر ۇيلەر مەن پاتەرلەر ساتىپ الۋ قۇقىعىمەن جالعا بەرىلدى. العاشقى جارناسىن تولەۋ ارقىلى ۇيلەردى جەكەشەلەندىرىپ الۋعا بولادى. جالپى قوناەۆ قالاسىندا 3800-دەن استام تۇرعىن ءۇي كەزەگىندە تۇر. پاتەر الۋعا كەزەككە تۇرۋ ءۇشىن «وتباسى بانكتىڭ» قوسىنىنا حابارلاسۋ قاجەتتىگىن ەسكە سالادى.
الماتى وبلىسى.