ۆەتنام ۇكىمەتىنىڭ رەسمي پورتالىندا كورسەتىلگەندەي, تابيعي اپاتتان بولعان تولاسسىز نوسەردىڭ كەسىرىنەن 7 ادام قازا تاپقان. قاتتى جەل مەن سۋ باسۋدان 12 مىڭنان استام ءۇي قيراپ, حانوي قالاسىنىڭ كوپ بولىگى سۋ استىندا قالعان, دەپ حابارلايدى Egemen.kz.
اۋىل شارۋاشىلىعى دا ۇلكەن زارداپ شەككەن. اتاپ ايتساق, 81,5 مىڭ گەكتاردان استام كۇرىش پلانتاتسياسى مەن 4,5 مىڭ گەكتار وزگە دە ەگىستىك ب ۇلىنگەن. سونىمەن بىرگە 1,6 ميلليون تۇرعىن ەلەكتر قۋاتىنسىز قالعانى حابارلاندى.
ۆەتنام پرەمەر-ءمينيسترى فام مين چين مينيسترلىكتەرگە, ۇلتتىق كورپوراتسيالاردىڭ جەتەكشىلەرىنە جانە جەرگىلىكتى بيلىككە ۇندەۋ جولداپ, تايفۋن سالدارىن جويۋ بويىنشا ناقتى تاپسىرمالار بەردى. اتاپ ايتقاندا, تۇرعىن ۇيلەردى, كولىك جانە ينجەنەرلىك ينفراقۇرىلىمدى قالپىنا كەلتىرۋ, جوعالعان ادامداردى ىزدەستىرۋ جانە اۋىل شارۋاشىلىعىنداعى شىعىندى ازايتۋعا كۇش سالۋ جۇكتەلگەن.
مەتەورولوگيالىق قىزمەتتىڭ بولجامىنشا, 27 تامىزدا جاۋىن-شاشىن جالعاسىپ, ەلدىڭ سولتۇستىك جانە سولتۇستىك-شىعىس ايماقتارىنىڭ كەيبىرىندە 70 مم-گە دەيىن نوسەر ءتۇسۋى مۇمكىن. سونىمەن قاتار 9 پروۆينتسيادا جاڭا سۋ تاسقىنى قاۋپى بار ەكەنى ەسكەرتىلدى.