ۆەتنامدا «كادزيكي» تايفۋنىنا بايلانىستى شۇعىل شارالار قابىلداندى

جاعالاۋداعى پروۆينتسيالاردا 587 مىڭ ادامدى ەۆاكۋاتسيالاۋ جوسپارى دايىندالدى. كەيبىر ايماقتاردا تۇرعىندارعا 25 تامىزدا تاڭعى ساعات 7:00-دەن باستاپ ۇيلەرىنەن شىعۋعا تىيىم سالىنادى.

تابيعي اپات كولىك قاتىناسىن توقتاتتى: اۋەجايلار جۇمىسى توقتاتىلىپ, پويىزدار كەشىكتىرىلدى, اۆتوجولدارداعى قوزعالىس شەكتەلدى. بالىقشىلارعا تەڭىزگە شىعۋعا تىيىم سالىندى.

سينوپتيكتەردىڭ دەرەگىنشە, بىرقاتار ايماقتا جاۋىن-شاشىن مولشەرى 150–250 مم-گە, كەي جەرلەردە 600 مم-گە دەيىن جەتۋى مۇمكىن. جەلدىڭ ەكپىنى ساعاتىنا 166 شاقىرىمعا دەيىن كۇشەيەدى. دەگەنمەن, ەلدىڭ ىشكى بولىگىنە جىلجىعان سايىن داۋىل بىرتىندەپ السىرەيدى.

مينيسترلىكتەرگە, پروۆينتسيالىق بيلىككە جانە اسكەري قۇرىلىمدارعا حالىقتى ەۆاكۋاتسيالاۋ, بوگەتتەر مەن سۋ قويمالارىن نىعايتۋ, بايلانىس جەلىلەرىنىڭ ۇزدىكسىز جۇمىسىن قامتاماسىز ەتۋ تاپسىرىلدى. ۆەتنام سىرتقى ىستەر مينيسترلىگى قىتاي مەن فيليپپين ەلشىلىكتەرىنە حات جولداپ, ۆەتنامدىق بالىقشىلار مەن داۋىلدان جاسىرىنعان كەمەلەرگە كومەك كورسەتۋدى سۇرادى.

ۆەتنام حالىق ارمياسىنا جەرگىلىكتى بيلىكپەن بىرلەسە قاۋىپتى ايماقتاردى انىقتاپ, تۇرعىن ۇيلەردى, مەكتەپتەردى جانە ينفراقۇرىلىم نىساندارىن كۇشەيتۋ مىندەتى جۇكتەلدى. وپىرىلىم مەن كەنەت سۋ باسۋ قاۋپى جوعارى وڭىرلەرگە ەۆاكۋاتسيالىق بولىمشەلەر جىبەرىلدى.

قاۋىپ تونگەن اۋىل شارۋاشىلىعى جەرلەرىنە شامامەن 300 مىڭ گەكتار كۇرىش القابى, 77 مىڭ گەكتار جەمىس باعى جانە 57 مىڭ گەكتار كاۋچۋك پلانتاتسياسى كىرەدى.

ەسكە سالساق, بۇعان دەيىن قىتايدىڭ حاينان پروۆينتسياسىندا «كادزيكي» تايفۋنى سالدارىنان 20 مىڭنان استام ادام ەۆاكۋاتسيالانعان بولاتىن.