عاسىردان استام تاريحى بار Kazinform حالىقارالىق اقپارات اگەنتتىگى مەرەيتويىن ەرەكشە فورماتتا اتاپ ءوتتى. فوتوكورمەگە اگەنتتىكتىڭ قورىنان الىنعان سيرەك كادرلار قويىلىپ, جۇرتشىلىق وتكەن ءداۋىر تىنىسىمەن تانىسۋعا مۇمكىندىك الدى, دەپ جازادى Egemen.kz.
العاشقى قازاق اقپارات اگەنتتىگى 1920 جىلى ورىنبور قالاسىندا روستا-نىڭ ورىنبور-تورعاي بولىمشەسى نەگىزىندە اشىلعان ەدى. اگەنتتىك عاسىردان استام ۋاقىت بويى ساياسات, ەكونوميكا, ءبىلىم, دەنساۋلىق, سپورت, مادەنيەت جانە قوعام تىنىس-تىرشىلىگى تۋرالى سەنىمدى ءارى جەدەل اقپارات كوزى رەتىندە مۇلتىكسىز ەڭبەك ەتىپ كەلەدى.
«قازاقپارات اگەنتتىگىنىڭ» 105 جىلدىعا وراي ۇيىمداستىرىلىپ وتىرعان كورمەدە 1930 جىلداردان بۇگىنگى كۇنگە دەيىنگى ەل ومىرىندەگى ماڭىزدى وقيعالاردى تۇسىرگەن اگەنتتىك تىلشىلەرىنىڭ بىرەگەي مۇراعاتتىق جانە ەكسكليۋزيۆتى فوتوسۋرەتتەرى قويىلعان. كوپتەگەن فوتوسۋرەتتەر العاش رەت قالىڭ وقىرمانعا ۇسىنىلدى.
كورمە ماتەريالى التى بولىمنەن تۇرادى: 1928-1959 جىلدارداعى جانە ەكىنشى دۇنيەجۇزىلىك سوعىس كەزىندەگى قازاقستان; 1960-1985 جىلدارداعى ءىرى قۇرىلىس جوبالارى, قالالار مەن اۋدانداردىڭ ەكونوميكالىق دامۋى, الماتى مەن استانانىڭ سوڭعى 40 جىلداعى شەجىرەسى, الەۋمەتتىك-مادەني وزگەرىستەر, سونداي-اق مەملەكەتتىڭ داۋمىنا ۇلەس قوسقان كورنەكى تۇلعالاردىڭ پورترەتتەرى.
«قازاقپارات» حالىقارالىق اقپارات اگەنتتىگى باسقارۋشى ديرەكتورىنىڭ ورىنباسارى, مۋلتيمەديالىق كونتەنت ءوندىرىسى قىزمەتىنىڭ باس رەداكتورى ۆلاديمير گەننادەۆيچتىڭ ايتۋىنشا, بۇل تەك قازاقستانداعى عانا ەمەس, تمد كەڭىستىگى مەن الەمدەگى ەڭ كونە اگەنتتىكتەردىڭ ءبىرى.
«فوتوكورمە بىرنەشە تاقىرىپتىق بلوكتان تۇرادى. ولاردىڭ ىشىندە ۇجىمداستىرۋ كەزەڭى, ەڭبەك ادامدارىنىڭ بەينەسى, ەكىنشى دۇنيەجۇزىلىك سوعىس جىلدارى, مادەنيەت قايراتكەرلەرىنە ارنالعان سيرەك سۋرەتتەر جانە قازىرگى ءداۋىردى قامتيتىن ماتەريالدار بار. «بارلىق ەكسپوناتتار ارحيۆتەن ىرىكتەلدى. مىڭداعان سۋرەتتەردىڭ ىشىنەن 3000-ى تاڭدالىپ الىنىپ, كورەرمەنگە ۇسىنىلدى. سونىمەن قاتار اگەنتتىك باسشىلارى مەن ارداگەرلەرىنە ارنالعان بولەك ءبولىم ازىرلەنگەن», دەدى ول.
Kazinform حالىقارالىق اقپارات اگەنتتىگىنىڭ باسقارۋشى ديرەكتورى ناعاشىبەك الدان كورمەنىڭ باستى ەرەكشەلىگىنە توقتالدى. ونىڭ ايتۋىنشا, مۇندا ۇسىنىلعان سۋرەتتەر حالىق نازارىنا العاش رەت شىعىپ وتىر.
«سوڭعى ەكى جىلدا رەسەي مەن قازاقستان مۇراعاتتارىندا اۋقىمدى ىزدەنىس جۇمىسى جۇرگىزىلىپ, ون مىڭنان استام فوتو مەن قۇجات جينالدى. بۇل تەك سۋرەتتەر عانا ەمەس, بۇل – قازاقستاننىڭ سوڭعى ءجۇز جىلدىق تاريحىنىڭ ايناسى. كورمەدە سوعىس پەن سوعىستان كەيىنگى كەزەڭدەر, يندۋسترياليزاتسيا جىلدارى, تاۋەلسىزدىك ءداۋىرى, الماتى مەن استانانىڭ قۇرىلىس ساتتەرى, ەلگە ەڭبەگى سىڭگەن تۇلعالاردىڭ بۇرىن-سوڭدى جاريالانباعان سۋرەتتەرى بار», دەدى ول.
ناعاشىبەك الداننىڭ ايتۋىنشا, كورمە – اگەنتتىك فوتوتىلشىلەرىنىڭ عاسىر بويعى ەڭبەگىن كورسەتەتىن بىرەگەي جۇمىس.
«بۇل بۇگىنگى كۇن ءۇشىن ەمەس, كەلەسى ۇرپاققا امانات رەتىندە ۇسىنىلىپ وتىر», دەپ تۇيىندەدى ول.
Kazinform اگەنتتىگىنىڭ پروديۋسەرى قالامقاس ءابۋوۆا فوتوكورمەنىڭ ءمان-ماڭىزىنا توقتالدى. ونىڭ ايتۋىنشا, 105 جىل ىشىندە العاش رەت وسىنداي اۋقىمدى تاريحي كورمە ۇيىمداستىرىلىپ وتىر.
«بۇل – مەملەكەتتىڭ بىزگە دەگەن كوزقاراسى عانا ەمەس, ءوزىمىزدىڭ بولاشاعىمىزدى ويلاۋىمىز. كورەرمەندەر ارحيۆتەن الىنعان سيرەك سۋرەتتەر ارقىلى اتا-اجەلەرىن, ولاردىڭ سول كەزدەگى ءومىرىن, ەڭبەك جولىن كورۋى مۇمكىن. بۇل – ەل تاريحىمەن بىرگە ورىلگەن قازاقپاراتتىڭ دا شەجىرەسى», دەدى ول.
سەنات دەپۋتاتى اينۇر ارعىنبەكوۆا «قازاقپارات» ۇجىمىن 105 جىلدىق مەرەيتوي اياسىنداعى فوتوكورمەنىڭ اشىلۋىمەن قۇتتىقتادى. ول اگەنتتىكتىڭ عاسىردان استام ۋاقىت بويى ەلگە شىنايى ءارى جەدەل اقپارات تاراتىپ كەلە جاتقانىن اتاپ ءوتتى.
«قازاقپارات – جاس مامانداردان باستاپ ارداگەر جۋرناليستەرگە دەيىن بارلىعى ءۇشىن ىستىق ۇجىم. العاشقى فوتواپپاراتتىڭ پايدا بولعانىنا 200 جىل بولسا, قازاقپاراتتا 100 جىلدان استام تاريحتى قامتيتىن فوتوسۋرەتتەر بار. بۇل – كەز كەلگەن اقپارات قۇرالىندا كەزدەسە بەرمەيتىن ەرەكشەلىك», دەدى سەناتور.