استانادا اسكەريلەر اراسىندا تۇڭعىش الەم چەمپيوناتى وتەدى

پرەزيدەنت تاپسىرماسىمەن بيىل قابىلدانعان «دەنە شىنىقتىرۋ جانە سپورت تۋرالى» زاڭنىڭ جاڭا رەداكتسياسىندا قازاق كۇرەسى وليمپيادالىق جانە پاراليمپيادالىق سپورت تۇرلەرىمەن قاتار باسىم سپورت ءتۇرى مارتەبەسىنە يە بولدى. بۇل ونىڭ بولاشاقتا حالىقارالىق دەڭگەيدە دامۋىنا سەرپىن بەرمەك.

14-15 تامىز كۇندەرى وتەتىن جاھاندىق دوداعا پاكىستان, بىرىككەن اراب امىرلىكتەرى, تۋنيس, رەسەي, يتاليا, تۇركيا, ماروككو, مولدوۆا, ءۇندىستان, قىرعىزستان, قازاقستان, موڭعوليا, قىتاي, برازيليا, تايلاند, وزبەكستان, تاجىكستان, كامەرۋن, گانا, ەفيوپيا, ۆەنەسۋەلا, يران سىندى ەلدەردىڭ اسكەري سالادا قىزمەت ەتەتىن بالۋاندار كۇرەسەدى. چەمپيوناتتىڭ باعدارلاماسىنا سايكەس, سپورتشىلار 16 سالماق دارەجەسىندە (ەرلەر – 8, ايەلدەر – 8) بوزكىلەمگە شىعادى:

ەرلەر: 55, 60, 66, 74, 82, 90, 100 جانە +100 كەلى. ايەلدەر: 48, 52, 56, 60, 65, 70, 77 جانە +77 كەلى.

قازاق كۇرەسىنەن اسكەريلەر اراسىندا وتەتىن تۇڭعىش الەم چەمپيوناتىندا ەل ءۇمىتىن ارقالاپ, قارۋلى كۇشتەرى مەن مەملەكەتتىك كۇزەت قىزمەتىنىڭ تاڭداۋلى بالۋاندارى شىعادىدى. بۇل چەمپيوناتتا ەل نامىسىن قورعايتىن ۇلتتىق قۇراما 2025 جىلدىڭ باسىندا الماتى قالاسىندا وتكەن اسكەري قىزمەتشىلەر اراسىنداعى ىرىكتەۋ چەمپيوناتى نەگىزىندە جاساقتالعان بولاتىن.

قۇراما ساپىندا بالۋاندار اراسىندا الەم جانە ازيا چەمپيوندارى, سونداي-اق دۇنيەجۇزىلىك كوشپەلىلەر ويىندارى مەن دۇنيەجۇزىلىك جەكپە-جەك ويىندارىنىڭ جەڭىمپازدارى, جۇلدەگەرلەرى بار. ماسەلەن, بەكجان تولەپوۆ – 2022 جانە 2025 جىلعى الەم چەمپيونى, جۇماجان قوجامبەكوۆ – الەم جانە ازيا چەمپيونى, راۋزا نۇرماحاممەتوۆا – الەم چەمپيونى, كوشپەلىلەر ويىندارىنىڭ جەڭىمپازى, زارينا ساريپوۆا – الەم چەمپيونى, بىرنەشە دۇركىن ەل چەمپيونى.

تۋريزم جانە سپورت مينيسترلىگى, قورعانىس مينيسترلىگىنىڭ سپورت كوميتەتى جانە Qazaq Kuresi اسسوتسياتسياسى مۇرىندىق بولعان چەمپيوناتقا وراي Qazaqstan جەڭىل اتلەتيكا سپورت كەشەنىندە قۇرمەتتى قوناقتار مەن كوماندا وكىلدەرىنىڭ قاتىسۋىمەن جيىن ءوتتى. Qazaq Kuresi اسسوتسياتسياسىنىڭ باس ديرەكتورى دامير بەكبوسىنوۆ اتالمىش مارتەبەلى جارىستىڭ ماڭىزى جوعارى ەكەنىن اتاپ ءوتتى.

«قازاق كۇرەسى – ءبىزدىڭ ۇلتتىق بولمىسىمىزدىڭ كودى. CISM سياقتى بەدەلدى ۇيىمنىڭ كۇنتىزبەسىنە ەنۋى – ءتول كۇرەسىمىزدىڭ الەمدىك دەڭگەيدە تاعى ءبىر مارتە مويىندالۋى. ءوز كەزەگىندە چەمپيوناتتىڭ استانادا ءوتۋى – قازاقستاننىڭ حالىقارالىق سپورت قاۋىمداستىعىنداعى بەدەلىن ارتتىرا تۇسەدى. بۇل – بولاشاقتا قازاق كۇرەسىن ازيا ويىندارى مەن وليمپيادا باعدارلاماسىنا ەنگىزۋگە باستايتىن ناقتى قادامداردىڭ ءبىرى», دەدى دامير اسەنعازى ۇلى.

قازاقستان ارمياسىنىڭ ورتالىق سپورت كلۋبىنىڭ باسشىسى, پولكوۆنيك ارمان ابەۋوۆتىڭ ايتۋىنشا, بۇل چەمپيوناتتىڭ حالىقارالىق اسكەري سپورت كەڭەسى (Conseil International du Sport Militaire) اياسىندا ءوتۋى بۇل ءىس-شاراعا ەرەكشە مارتەبە بەرەتىنىن جەتكىزدى.

«الەم چەمپيوناتى تەك سپورتشىلاردىڭ ەمەس, بۇكىل اسكەري قۇرىلىمنىڭ ءيميدجىن كوتەرەتىن دودا. ءبىز قاۋىپسىزدىك پەن ۇيىمداستىرۋدىڭ بارلىق قىرىن پىسىقتادىق. قاتىسۋشىلاردىڭ جايلى ورنالاسۋىنان باستاپ, جارىس الاڭىنداعى ءار مينۋتتىڭ ۇيلەسىمدى وتۋىنە دەيىن قاتاڭ باقىلاۋدا. ءبىزدىڭ ساربازدار نامىستى جىعىپ بەرمەسى انىق. اتالمىش چەمپيونات جوعارى دارەجەدە وتسە, قازاق كۇرەسىن CISM-ءنىڭ تۇراقتى چەمپيوناتتار باعدارلاماسىنا ەنگىزۋ جانە 2027 جىلى اقش-تا وتەتىن دۇنيەجۇزىلىك اسكەري ويىنداردىڭ قاتارىنا قوسۋ ماسەلەسى رەسمي دەڭگەيدە قارالاتىن بولادى», دەدى ارمان سايلاۋ ۇلى.

CISM – الەمدەگى ەڭ ءىرى كوپسالالى سپورت ۇيىمدارىنىڭ ءبىرى. بۇگىندە 140-قا جۋىق ەلدىڭ اسكەري قىزمەتشىلەرىن بىرىكتىرەتىن بۇل ۇيىم قازىرگى تاڭدا حالىقارالىق وليمپيادا كوميتەتىنەن كەيىنگى ەڭ ىقپالدى سپورتتىق قاۋىمداستىقتاردىڭ ءبىرى سانالادى.

سونداي-اق, جاھاندىق دودا الدىندا كوماندا وكىلدەرىنە ارنالعان تورەشىلەر سەمينارى ءوتتى. چەمپيوناتتىڭ باس تورەشىسى – نيدەرلاندتان كەلگەن بىلىكتى مامان ەدمار ابدۋللاەۆ. ول – قازاق كۇرەسى, الىش جانە پانكراتيون بويىنشا UWW-ءدىڭ تورەشىلىك نۇسقاۋشىسى, سونداي-اق بۇكىلالەمدىك بەلبەۋ كۇرەسى كوميتەتىنىڭ مۇشەسى.

«قازاق كۇرەسىنەن اسكەري قىزمەتشىلەر اراسىندا الەم چەمپيوناتىن وتكىزۋ وراسان جەتىستىك. بۇل كۇرەستىڭ تەحنيكاسى مەن فيلوسوفياسى جاۋىنگەرلىك رۋحقا وتە جاقىن. وسى چەمپيونات – قازاق كۇرەسىن حالىقارالىق دەڭگەيدە ناسيحاتتاۋدىڭ مىقتى الاڭى بولاتىنىنا سەنىمدىمىن. چەمپيوناتتىڭ دايىندىعى وتە جوعارى. بارلىق سپورتشىلارعا ساتتىلىك تىلەيمىن», دەپ اتاپ ءوتتى باس تورەشى.

سونىمەن قاتار, نيدەرلاندىق ماماننىڭ جەتەكشىلىگىمەن شەتەلدىك سپورتشىلار ءۇشىن قازاق كۇرەسىنىڭ كىلەمدەگى ءادىس-تاسىلدەرىنە ارنالعان پراكتيكالىق وقۋ-ادىستەمەلىك تانىستىرىلىم ساباعى ۇيىمداستىرىلدى.

بۇگىندە قازاق كۇرەسى اسا تارتىستى سپورت ءتۇرى رەتىندە تەك قازاقستاندا عانا ەمەس, الەمنىڭ تۇكپىر-تۇكپىرىندە كەڭىنەن تانىلىپ, بەدەلى ارتىپ كەلەدى. قازىرگى ۋاقىتتا قازاق كۇرەسى فەدەراتسيالارى الەمنىڭ 40-تان استام ەلىندە جۇمىس ىستەيدى. جىل سايىن ءتۇرلى دەڭگەيدەگى 10-ان استام حالىقارالىق جارىستار وتكىزىلىپ, ولارعا ءتورت قۇرلىقتىڭ سپورتشىلارى قاتىسۋدا.

سوڭعى جىلدارى وتانداستارىمىزدىڭ قازاق كۇرەسىنە دەگەن قىزىعۋشىلىعى ارتىپ كەلەدى. ستاتيستيكالىق دەرەكتەرگە سايكەس, ەلىمىزدە 160 399 ادام جاتتىعاتىن قازاق كۇرەسىنىڭ 3 897 ۇيىرمەسى بار.

2004-2025 جىلدارى ارالىعىندا قازاق كۇرەسىنەن 11 الەم چەمپيوناتى, 12 ازيا چەمپيوناتى, 6 الەم كۋبوگى, 6 ەۋروپا بىرىنشىلىگى, يران مەن برازيليادا كادەتتەر مەن جاستار اراسىندا الەم چەمپيوناتتارى جانە وڭتۇستىك افريكادا 2 افريكا بىرىنشىلىگى, برازيليادا وڭتۇستىك امەريكا چەمپيوناتى ءوتتى.