قازاقستاندا اسكەرگە شاقىرىلۋشىلاردى ىرىكتەۋدىڭ جاڭا ادىستەمەسى ەنگىزىلىپ جاتىر. ىرىكتەۋ PSY-سۋيتسيدتىك مىنەز-ق ۇلىققا بەيىمدىلىكتى ەرتە انىقتاۋعا باعىتتالعان تاۋەكەلدى ادىستەمە ارقىلى جۇزەگە اسىرىلادى, دەپ جازادى Egemen.kz.
قورعانىس مينيسترلىگىنىڭ مالىمەتىنشە, بۇل جۇيە جەكە قۇرامنىڭ پسيحولوگيالىق تۇراقتىلىعىن ارتتىرۋعا جانە اسكەردەگى قايعىلى وقيعالاردىڭ الدىن الۋعا ىقپال ەتەدى. PSY-تاۋەكەل ادىستەمەسىن مينيسترلىكتىڭ اسكەري پسيحولوگتارى ازىرلەگەن.
جاڭا جوبا 2025 جىلعى كوكتەمگى شاقىرۋ كەزىندە ءساتتى سىناقتان وتكەن. سونىڭ ناتيجەسىندە سۋيتسيدكە بەيىمدىلىك بەلگىلەرى بار 470-تەن استام جاس انىقتالعان. ولار قىزمەتتەن بوساتىلىپ, قوسىمشا تەكسەرۋگە جىبەرىلگەن.
جاڭا جۇيە باستاپقى سكرينينگتى, تەرەڭ پسيحولوگيالىق تەكسەرۋدى جانە قاجەت بولعان جاعدايدا پسيحياتريالىق ساراپتامانى قامتيتىن پسيحودياگنوستيكانىڭ كوپ ساتىلى مەحانيزمى. جۇيەنىڭ ماقساتى پسيحوەموتسيونالدى تۇراقتىلىق تۇرعىسىنان قارۋلى كۇشتەردە قىزمەت ەتۋگە دايىن ەمەس ادامداردى شاقىرۋدان بوساتۋ.
PSY-تاۋەكەلدى ەنگىزۋ ماسەلەلەرى قر قك ۇلتتىق اسكەري-پاتريوتتىق ورتالىعىندا وتكەن ۆەدومستۆوارالىق جۇمىس توبى وتىرىسىنىڭ نەگىزگى تاقىرىبى بولعان. ونىڭ قۇرامىنا قورعانىس, ىشكى ىستەر, دەنساۋلىق ساقتاۋ, عىلىم جانە جوعارى ءبىلىم مينيسترلىكتەرىنىڭ وكىلدەرى, سونداي-اق ۇلتتىق قاۋىپسىزدىك كوميتەتىنىڭ, مەملەكەتتىك كۇزەت قىزمەتىنىڭ جانە باسقا دا مەملەكەتتىك قۇرىلىمداردىڭ ماماندارى كىرگەن.
قورعانىس مينيسترلىگى تاربيە جانە يدەولوگيالىق جۇمىستار دەپارتامەنتى پسيحولوگيالىق جانە اسكەري-الەۋمەتتىك جۇمىس باسقارماسىنىڭ باستىعى پودپولكوۆنيك ارمان قالىشەۆتىڭ ايتۋىنشا, باستاما ۇكىمەتتىڭ تاپسىرماسى بويىنشا ىسكە اسىرىلىپ جاتىر. بۇل باستاما اسكەرگە شاقىرۋ ناۋقانى شەڭبەرىندە جۇيەلى پروفيلاكتيكانىڭ دا ءبىر بولىگى بولادى.
ء«بىز پسيحولوگيالىق تۇراقسىز ادامداردى ەلەكتەن وتكىزىپ قانا قويماي, بولاشاق اسكەري بولىمدەردىڭ ۇجىمدارىن ىقتيمال قاۋىپتى جاعدايلاردان قورعاۋعا تىرىسامىز. بۇل بولىمشەلەردەگى دەنساۋلىق, ءومىر جانە مورالدىق احۋالعا قاتىستى», دەدى پودپولكوۆنيك ارمان قالىشەۆ.
ەلىمىزدىڭ بارلىق وڭىرلەرىندە PSY-تاۋەكەلدى جۇيەسى كەزەڭ-كەزەڭىمەن ەنگىزىلەدى. يننوۆاتسيا ىرىكتەۋ تيىمدىلىگىن ارتتىرىپ, ارمياداعى شتاتتان تىس جاعدايلاردىڭ سانىن ازايتىپ, جاس اسكەري قىزمەتشىلەردىڭ پسيحيكالىق دەنساۋلىعىن نىعايتۋداعى ماڭىزدى قادام بولادى دەپ بولجانىپ وتىر.