اسا جەڭىل سالماقتاعى قازاقتىڭ تانىمال ارالاس جەكپە-جەك شەبەرى ءالىبي ىدىرىس «The Ultimate Fighter 33» ءتۋرنيرىنىڭ توعىزىنشى سەرياسىنىڭ جارتىلاي فينالىندا كۇش سىناستى.
وسى كۇنگە دەيىن 11 جەكپە-جەك وتكىزىپ, بارلىعىندا جەڭىسكە جەتكەن 31 جاستاعى ءالىبي شيرەك فينالدا وزبەكستاندىق فۋركاتبەك يوكۋبوۆتى ۇپاي سانىمەن ۇتقان ەدى. جارتىلاي فينالدا ونىڭ جولى ۆەنەسۋەلانىڭ وكىلى رويبەرت ەچەۆەرريامەن قيىستى. 29 جاستاعى وڭتۇستىك امەريكا وعلانى 12 كەزدەسۋدىڭ ەكەۋىندە عانا جەڭىلگەن. دەسەك تە بۇل باسەكەدە ءالىبي ايقىن باسىمدىق تانىتتى. ءبىرىنشى راۋندتا قارسىلاسىن تىزەمەن تەۋىپ قۇلاتقان ول جىعىلعان بەتتە سوققىنى قارشا بوراتتى. تورەشىنىڭ جەكپە-جەكتى توقتاتۋدان باسقا امالى قالمادى.
ەندى الەمنىڭ ەڭ بەلدى پروموۋشەنى – UFC-گە ءوتۋ ءۇشىن ءالىبي ىدىرىسقا ءبىر عانا كەزدەسۋ وتكىزۋ قالدى. «The Ultimate Fighter» ءتۋرنيرىنىڭ فينالىندا ول مەكسيكالىق يمانول رودريگەس (5-0) پەن امەريكالىق دجوزەف مورالەس (12-2) اراسىنداعى جەكپە-جەكتىڭ جەڭىمپازىمەن كۇش سىناسادى.