جاڭا مەشىتتىڭ سىيىمدىلىعى 3000 ادامدى قۇرايدى. قۇرىلىس «قازاقمىس كورپوراتسياسى» جشس-ءنىڭ باستاماسىمەن, قازاقستان مۇسىلماندارى ءدىني باسقارماسىنىڭ بەلسەندى قولداۋىمەن جانە ۇلىتاۋ وبلىسى اكىمدىگىمەن ءوزارا تۇسىنىستىك پەن ىنتىماقتاستىق تۋرالى مەموراندۋم اياسىندا جۇرگىزىلىپ جاتىر, دەپ حابارلايدى Egemen.kz.
قۇرىلىستىڭ باستالۋىنا باس ءمۇفتي ناۋرىزباي قاجى تاعان ۇلى, «قازاقمىس كورپوراتسياسى» جشس باسقارما توراعاسى نۇراحمەت نۋريەۆ, ارداگەرلەر كەڭەسىنىڭ, قۇرىلىس كومپانياسىنىڭ وكىلدەرى جانە جەرگىلىكتى تۇرعىندار قاتىستى.
جوبا اياسىندا ەرلەر مەن ايەلدەرگە ارنالعان بولەك زالدار, دارەت الاتىن ورىندار, كىتاپحانا, وقۋ سىنىپتارى, كونفەرەنتس-زال, اكىمشىلىك كابينەتتەر, سونداي-اق اۆتوتۇراعى بار اباتتاندىرىلعان اۋماق قاراستىرىلعان. مەشىتتىڭ ارحيتەكتۋرالىق كەلبەتىندە ۇلتتىق ءداستۇر مەن زامان تالابى ەسكەرىلەدى.
قازىرگى ۋاقىتتا قۇرىلىس الاڭىندا دايىندىق جۇمىسى اياقتالىپ, مونوليت قۇيۋ جۇمىسى باستالدى. قۇرىلىستى اياقتاۋ مەرزىمى 2026 جىلدىڭ IV توقسانىنا جوسپارلانعان. قازىرگى باعالاۋ بويىنشا جوبانىڭ قۇنى 3,2 ملرد تەڭگەنى قۇرايدى.
«قازاقمىس» كورپوراتسياسى ءداستۇرلى تۇردە الەۋمەتتىك ينفراقۇرىلىم مەن رۋحاني دامۋدى نىعايتۋعا باعىتتالعان باستامالارىن جۇزەگە اسىرىپ كەلەدى. جەزقازعاندا جاڭا مەشىتتىڭ سالىنۋى – كومپانيانىڭ ءوزى قىزمەت ەتەتىن وڭىرلەردى دامىتۋعا باعىتتالعان جۇيەلى جۇمىسىنىڭ دالەلى.
ۇلىتاۋ وبلىسى