ءتۇرلى جارىستا جاسىنداي جارقىلداپ جۇرگەن جارتىلاي جەڭىل سالماقتاعى اباي جالالدىڭ ەسىمى جانكۇيەرلەرگە جاقسى تانىس.
سپورتتىق مانسابىن دانيار قاسقاراۋوۆ جەتەكشىلىك ەتەتىن «الاش پرايد» كلۋبىنان باستاپ, «وكتاگوندا» جالعاستىرعان 21 جاستاعى اباي قىسقا عانا مەرزىم ارالاعىندا كورەرمەن كوزايىمىنا اينالىپ ۇلگەردى. وسى كۇنگە دەيىن جەتى جەكپە-جەك وتكىزگەن ول بىردە-ءبىر رەت جەڭىلىستىڭ كەرمەك ءدامىن تاتقان جوق. ءتورت كەزدەسۋىندە باسەكەلەستەرىن نوكاۋتقا جىبەرسە, ەكى رەت «سابميشن» ءادىسىن قولداندى. ءبىر ايتا كەتەرلىگى, سول جەتى جەكپە-جەكتىڭ التاۋىن ءبىرىنشى راۋندتا-اق اياقتادى.
كۇنى كەشە اباي جالالعا ءباا-ءنىڭ ايگىلى پروموۋتەرلىك كومپانياسىنىڭ كوزى تۇسكەنى ءمالىم بولدى. ەندى ول UAE Warriors ليگاسىندا ونەر كورسەتەدى. تۇساۋكسەر كەزدەسۋىن قازاق فايتەرى 23 شىلدەدە اتالعان مەملەكەتتىڭ استاناسى – ءابۋ-دابيدە وتكىزەدى.