ەلىمىزدەگى سۋ سالاسىنىڭ 31 مامانى قىتايعا ەكى اپتالىق كۋرسقا اتتاندى. ەسكە سالايىق, بۇعان دەيىن اتالعان كورشىلەس ەلدە ءساۋىر جانە مامىر ايلارىندا 30 ادامنان تۇراتىن ەكى توپ ءبىلىم العانى ءمالىم, دەپ جازادى Egemen.kz.
وقۋ قاراجاتى – قىتاي تاراپىنان ۇيىمداستىرىلىپ جاتىر, وعان قر-نىڭ مەملەكەتتىك بيۋدجەتىنەن قاراجات بولىنبەگەن. جالپى بيىلعى جىلى قىتايدا وتاندىق سۋ سالاسىنىڭ 121 مامانى بىلىكتىلىگىن ارتتىرادى.
قازىرگى ۋاقىتتا سالا مينيسترلىگى قىتايمەن بىرلەسكەن وقىتۋ باعدارلاماسىن جالعاستىرۋ تۋرالى كەلىسسوزدەر جۇرگىزىپ جاتىر.
سۋ رەسۋرستارى جانە يرريگاتسيا ۆيتسە-ءمينيسترى اسلان ابدرايموۆتىڭ ايتۋىنشا ءۇشىنشى توپتىڭ قۇرامىندا سۋ سالاسىنىڭ 31 مامانى قىتايعا سۋ رەسۋرستارىن باسقارۋ جانە اعىندى سۋلاردى تازارتۋ تاقىرىبىنداعى كۋرسقا اتتاندى.
«بۇل وقۋلار پرەزيدەنت جولداۋىندا ايتىلعان, سۋ سالاسىنا بىلىكتى مامانداردى جۇيەلى تۇردە دايىنداۋ قاجەتتىلىگىنە بايلانىستى قولعا الىنعان شارالاردىڭ ءبىرى», دەدى ا.ابدرايموۆ.