ءماجىلىس دەپۋتاتتارى استاناداعى بالالاردى قولداۋ ورتالىعىنا باردى

ورتالىقتا تاۋلىك بويى جەتىمدەر, اتا-اناسىنىڭ قامقورلىعىنسىز قالعان, قاراۋسىز جانە ءۇي-كۇيسىز جۇرگەن جانە دەۆيانتتى مىنەز-قۇلقى بار كامەلەتكە تولماعان بالالار تۇرادى. ولار ارنايى ءبىلىم بەرۋ ۇيىمدارىنا جىبەرىلەدى.

قازىرگى ۋاقىتتا مەكەمەدە 76 بالا بار. ولاردىڭ ىشىندە 31 بالا رەسمي مارتەبەگە يە. سونىڭ ىشىندە ءبىرى – جەتىم, ال 30 بالانىڭ اتا-اناسى اتا-انا قۇقىعىنان ايىرىلعان نەمەسە بوستاندىعىنان ايىرىلعان ورىنداردا وتىر.

ورتالىق ديرەكتورى ينديرا نۇرمۇحامبەتوۆانىڭ ايتۋىنشا, مەكەمەنىڭ باستى مىندەتى – بالالارعا قاۋىپسىز تۇرمىستىق جاعداي جاساۋ عانا ەمەس, سونىمەن قاتار مورالدىق جانە پسيحولوگيالىق قولداۋ كورسەتۋ. ءاربىر بالامەن تاربيەشىلەر مەن ماماندار جەكە تۇردە جۇمىس ىستەيدى. ولار ومىرلىك قيىندىقتاردى جەڭۋگە جانە جەكە الەۋەتىن اشۋعا كومەكتەسەدى.

كەزدەسۋدە بالالاردىڭ ورتالىققا قايتالاي ءتۇسۋىنىڭ الدىن الۋ ماسەلەسىنە دە ەرەكشە كوڭىل ءبولىندى.

وسى جىلدىڭ باسىنان بەرى ورتالىققا 689 كامەلەتكە تولماعان بالا ءتۇستى, ولاردىڭ 27-ءسى – قايتالاپ تۇسكەندەر. نەگىزىنەن ولار قاراۋسىز جانە ءۇي-كۇيسىز جۇرگەن بالالار.

ورتالىقتىڭ جۇمىسىمەن تانىسقاننان كەيىن ماگەررام ماگەرراموۆ ۇجىمنىڭ جوعارى كاسىبيلىگىن اتاپ ءوتتى.

– ورتالىق قىزمەتكەرلەرىنىڭ جۇمىسىن باقىلاۋ وتە جاعىمدى اسەر قالدىردى. بۇل جۇمىستىڭ جوعارى كاسىبي دەڭگەيمەن قاتار, شىنايى جان جىلۋىن تالاپ ەتەتىنىن تۇسىنە وتىرىپ, مۇندا قيىن ومىرلىك جاعدايعا تاپ بولعان ءاربىر بالانىڭ تاعدىرى ءۇشىن جاسالىپ جاتقان ءىستىڭ اۋقىمى مەن ماڭىزىن تەرەڭ سەزىنەسىڭ, – دەپ اتاپ ءوتتى ءماجىلىس دەپۋتاتى.

سوڭىندا دەپۋتاتتار ءاربىر بالانىڭ جارقىن بولاشاعىن قالىپتاستىرۋ ىسىندە مەملەكەت, قوعام جانە مەتسەناتتاردىڭ ودان ءارى بەلسەندى قاتىسۋىنىڭ ماڭىزدىلىعىن ەرەكشە اتاپ ءوتتى.